Iosua

15 Ame la itre götrane hna hamëne* kowe la tribu ne Iudra me itre fami i angatr, ke kola tro qa ngöne la nöje Edroma, ene la hnapapa Zin uti hë la Negeb e kolojë qa. 2 Ame la ifego i angatr e kolojë, ke ej a tro qa ngöne la Hnagejë Sotr,* lo ngönegejë ka qëmeke kolojë. 3 Ej a uti a tro kolojë ngöne la gojenyi ka elë a tro Akerabima, me Zin thenge. Thupene lai, ej a elë qa kolojë a tro Kadesi-Banea, me Hezerona, me elë hmaca a tro Adara, me jea a tro Karekaa. 4 Ase jë hi lai, ej a Azemona thenge uti hë la tim e Aigupito; ame la Hnagejë,* ke celë hi ka nyi ifegone la götrane i angatr e kolojë.

5 Ame la ifego i angatr e koië, ke kola tro qa ngöne la Hnagejë Sotr, uti hë la pune la Hneopegejë Ioridrano. Nge ame la ifego i angatr e kolopi, ke kola tro qa ngöne la ngönegejë, uti hë la pune la Hneopegejë Ioridrano. 6 Ame la ifego i angatr, ke ej a elë a tro Beth-Ogela, me kolopi thenge a tro Beth-Araba, me elë hmaca a tro kowe la etë i Bohan nekö i Reubena. 7 Kola elë la ifego a tro Debira ezine la hnathup e Akora, me jea a tro kolopi e Gilegala qëmekene la sasala ne Adumim, lo ka eje ngöne la itre tim e kolojë; ame la ifego, ke ej a tro kowe la itre tim e Eni-Semes, me hmaca e Eni-Rogel. 8 Ej a elë kowe la hnathup ne la nekö i Hinom, uti hë e kolojë ngöne la gaa utiut ne la angetre Iebusi, ene Ierusalema. Ej a elë kowe la he ne wetr ka qëmek kowe la hnathup e Hinom e kuë, lo ka ej e kolopi pun ne la hnathup ne la angetre Refai. 9 Hna ami ifego i angatr qane la he ne wetr a tro kowe la itre qeqe ne tim e Nefetoa, nge uti hë la itre traon ne la wetr e Eferona; hna ami ifego i angatre ngöne la gojenyi ne tro Baala, ene Kiriatha-Iarim. 10 Kola kano la ifego i angatr qa Baala e kuë, a tro kowe la wetre Seira, nge ej a elë kowe la wetre Iarim e kolopi, ene Kesalona; ej a uti a tro Bethe-Semes, me Timena thenge. 11 Nge ej a tro kowe la itre gaa utiut e Ekerona e kolopi; hna nyi ifego i angatr hnene la gojenyi ne tro Sikerona, me wetre Baala thenge uti hë e Iabenel; nge ej a hmaca ngöne la hnagejë.

12 E kuë, hna ami ifego i angatr hnene la Hnagejë Ka Tru,* memine la ngöne gejë trootro. Celë hi la itre ifego ne la nöjei götran hna hamën kowe la itre matra i Iudra, lo itre götran hna thawa pë hë thenge la itre fami i angatr.

13 Nge tune lo hnei Iehova hna amekötin, hnei Iosua hna hamë Kaleba nekö i Iefune, la ketre götrane nyipin la itre nekö i Iudra, ene Kiriatha-Areba, ene Heberona (Areba lo keme i Anaka). 14 Ame hnei Kaleba hna helëne qa lai la köni nekö i Anaka: ene Sesai, me Ahiman, me Talemai, lo köni matra i Anaka. 15 Thupene lai, hnei angeic hna tro troa isi me angetre Debira. (Hna hë Debira ekö, Kiriatha-Sefer.) 16 Matre öni Kaleba jë hi: “Tro ni a hamë Akesa, lo nekönge jajiny, kowe la atr ka troa lep me thapa la traon e Kiriatha-Sefer.” 17 Ame hnei Otheniela nekö i Kenaza, trejin me Kaleba, hna thapa la traon. Matre hnei Kaleba pë hë hna hamë Akesa nyine föi angeic. 18 Nge ame hë la Akesa a tro koi Otheniela, hnei angeic hna ielene la föi angeic troa sipo hnepadro kowe la keme i angeic.* Thupene lai, hnei angeic hna uti qa hune la boliko* i angeic. Matre öni Kaleba jë hi: “Nemene la aja i ö?” 19 Sa jë hi angeic ka hape: “Epi amanathithi ni hnei nyipë kaka, ke ase hë nyipëti lo hamë ni la ketre götran e kolojë.* Hamë ni pi fe la götran e Guloth-Maim.”* Ame hnei Kaleba hna nue Guloth e koho, me Guloth e kuhu koi angeic.

20 Celë hi la edrö ne la tribu i Iudra, edrö hna thawa thenge la itre fami i angatr.

21 Hane hi la ëjene la itre traon hna hamën kowe la tribu i Iudra, lo ka ej ezine la ifego ne Edroma e kolojë: ene Kabezeela, me Eder, me Iagur, 22 me Kina, me Demona, me Adada, 23 me Kadesi, me Hazora, me Ithenan, 24 me Zif, me Telem, me Bealoth, 25 me Hazora-Hadata, me Kerioth-Hezeron, ene Hazora, 26 me Amam, me Sema, me Molada, 27 me Hazara-Gada, me Hesemon, me Bethe-Palet, 28 me Hazarasual, me Bere-Seba, me Biziothia, 29 me Baala, me Iima, me Azem, 30 me Eletolad, me Kesil, me Horema, 31 me Zikelag, me Mademan, me Sanesana, 32 me Lebaoth, me Silehim, me Aina, me Rimona; traqa koi 29 lao traon me itre hunahmi ezin.

33 Ame ngöne la Sefela, ke Esetaol, me Zorea, me Asena, 34 me Zanoa, me Eni-Ganim, me Tapua, me Enaima, 35 me Iamuth, me Adulama, me Soko, me Azeka, 36 me Saraim, me Adithaim, me Gedera, me Gederothaim*: traqa koi 14 lao traon me itre hunahmi ezin.

37 Zenan, me Hadasa, me Migedola-Gada, 38 me Dilean, me Mizepa, me Ioketheela, 39 me Lakisa, me Bozekath, me Egelona, 40 me Kabona, me Lamam, me Kithelis, 41 me Gederoth, me Bethe-Dagona, me Naama, me Makeda: traqa koi 16 lao traon me itre hunahmi ezin.

42 Libena, me Ethera, me Asan, 43 me Iefetha, me Asena, me Nezib, 44 me Keila, me Akeziba, me Maresa: traqa koi 9 lao traon me itre hunahmi ezin.

45 Ekerona me itre traon ka ce tro memin, me itre hunahmi ezin. 46 Qa Ekerona a tro koië, ene la götran ezin e Asedoda, me itre hunahmi ezin.

47 Asedoda me itre traon ka ce tro memin, me itre hunahmi ezin; Gaza me itre traon ka ce tro memin, me itre hunahmi ezin, uti hë la tim e Aigupito memine la Hnagejë Ka Tru, memine la götran ka nyi ifegon.

48 Nge ame ngöne la itre wetr: Samira, me Iatira, me Soko, 49 me Dana, me Kiriatha-Sana, ene Debira, 50 me Anabi, me Esetemo, me Anim, 51 me Gosena, me Holon, me Gilo: traqa koi 11 lao traon me itre hunahmi ezin.

52 Araba, me Duma, me Esean, 53 me Ianum, me Bethe-Tapua, me Afeka, 54 me Humeta, me Kiriath-Areba, ene Heberona, me Ziora: traqa koi 9 lao traon me itre hunahmi ezin.

55 Maon, me Karemela, me Zif, me Iuta, 56 me Iezerela, me Iokedeam, me Zanoa, 57 me Kaina, me Gibea, me Timena: traqa koi 10 lao traon me itre hunahmi ezin.

58 Halehul, me Bethe-Zur, me Gedor, 59 me Maarath, me Bethe-Anoth, me Eletekon: traqa koi 6 lao traon me itre hunahmi ezin.

60 Kiriatha-Baala, ene Kiriatha-Iarim, me Raba: traqa koi lue traon me itre hunahmi ezin.

61 Nge ame ngöne la hnapapa: ke Beth-Araba, me Midin, me Sekaka, 62 me Nibesan, memine la Traone Sotr, me Eni-Gedi: traqa koi 6 lao traon me itre hunahmi ezin.

63 Ame la angetre Iebusi ka lapa e Ierusalema, ke thatreine kö troa helë angatr hnene la itre trahmanyi ne Iudra. Celë hi kepin matre angatre pala hi enehila a lapa e Ierusalema memine la nöje Iudra.