Itre Treije i Ieremia
א [Aleph]
1 Ekölöhini lo traon gaa tru atr ekö! Angeice pë hë a lapa cas!
Eje hi, ceitui angeice hë me sine föe, lo nöj ka tiqa catre kö hnei atr!
Kolo ha folosa angeic enehila, ngacama isola angeic ekö nyipine la itre xaa provës!
ב [Beth]
2 Tha mano kö angeice treij e jidr, nge cabi hë la lue itrasitre i angeic hnei trenge timidra. Patr asë hë la itre hanyi angeic troa aupunyi angeic.
Pëkö ca sinatronge i angeic ka mele nyipici. Itre ithupëjia asë hë angatr.
ג [Gimel]
3 Hna kötre sai Iudra, nge hleuhleu hë angeic, ke hna folosa angeic.
Hna musinë angeic troa mel nyipine la itre xaa nöj. Pëkö iakeukawany ka ijij.
Hnene asë hi la itre ka axösisi angeic hna ee angeic, lo kola lepi angeice hnei akötr.
ד [Daleth]
4 Kola hnëmec la itre gojenyi a tro Ziona, ke pëhë ka traqa troa sine la itre feet.
Hnyiqetre hë la itre qëhnelö i angeic. Itretre huuje i angeic a awe.
Tru la akötre ne la itre jajinyi* angeic. Hnehengazo catr angeic.
ה [He]
5 Maseta* i angeice hë lo itre ithupëjia me angeic. Pëkö hna xouen hnene la itre ithupëjia me angeic.
Eje hi, hnei Iehova hna akötrë angeic pine la itre ngazo i angeic ka nyimutre.
Hnene la itre ithupëjia hna ukune trongëne la itre nekö i angeic kowe la nöje trenyiwa.
ו [Waw]
6 Patre hë la elolone la nekö jajinyi ne Ziona.
Ceitu la itre nekö i joxu i angeic me itre drube ka tha öhnyi hnë xen,
Nge hmanono hë angatr troa tro qëmekene la atre weji angatr.
ז [Zayin]
7 Pine laka, hleuhleu hë Ierusalema nge pëhë hnalapa i angeic
Angeic hmaca a mekun lo itre mo i angeic ekö.
Ame lo kola thapa la nöje i angeic hnene la ithupëjia, nge pëkö ka xatua angeic,
Hnene la itre ithupëjia hna öhnyi angeic, me hnyimasai* angeic la angeic a kei.
ח [Heth]
8 Hnei Ierusalema hna kuca la itre ngazo ka tru.
Matre ketre ewekë ka sisi hë angeic.
Ame lo itre ka atrunyi angeic ekö, angatre ha methinë angeic, ke hnei angatr hna öhnyi angeic a cile pë iut.
Nge ame pena angeic, angeic a treij. Angeic a ujë hnei hmahma.
ט [Teth]
9 Dro hë la iheetre i angeic hnene la aqane pui ngazo i angeic.
Tha mekune kö angeic la mele i angeic elany.
Nyine haine la aqane kei angeic. Pëkö ka troa akeukawanyi angeic.
Iehova fe, pane goeëne jë la akötreng, ke itre ithupëjia a susu fë la aqane lepi ni.
י [Yod]
10 Hnene la ithupëjia hna thapa la itre mo i angeic asë.
Eje hi, hnei angeic hna öhne la itre xaa nöj a lö hnine la hnë hmi i angeic,
Kolo itre nöj hnei nyipëti hna wathebon troa cememine la nöje i nyipë.
כ [Kaph]
11 Itre atre i angeic asë hi a hokötr. Angatr a thele falawa.
Hnei angatr hna hamëne la itre mo i angatr matre troa hetre xen me mel.
Iehova fe, goeën! Ceitunge hë me ketre föe* ka pë eloin.
ל [Lamed]
12 Epuni asë itre ka trongëne la gojeny, tha kolo kö lai a ketri epun?
Goeëne jë nge wange ju!
Hetre akötre kö ka tune lo akötr ka traqa koi ni,
Lo hnei Iehova hna axulun koi ni hnene la elëhni atraqatre i nyidrë?
מ [Mem]
13 Qa koho, hnei nyidrëti hna upe la eë kowe la itre juneng. Matre nyidrëti ha musinëne la itre juneng.
Hnei nyidrë hna amë ifile qëmeken la lue cang. Matre hnenge pë hë hna bëek hnei nyidrë.
Hnei nyidrë hna kuca matre ketre föe pe hi ni ka lapa cas.
Ngöne la drai ka pexej, eni pala hi a wezipo.
נ [Nun]
14 Hnene la ime i nyidrë, hnei nyidrëti hna xawan la itre ngazong matre kuca la nyine isilekeun, me atë hune la nyinawang.
Hna atë itre ej hune la nyinawang, matre pëhë trengecatreng.
Hnei Iehova hna nue ni kowe la ime ne la itre atr hnenge hna thatreine cile kow.
ס [Samekh]
15 Hnei Iehova hna xometrij asë qaatheng la itre soc ka catr.
Hnei nyidrë hna acasine la itre soc matre cile koi ni, me waja fica la itre nekö trahmanyi theng.
Ame ngöne la hnë wejeweje vin, hnei Iehova hna wajawaja la nekö jajiny,* lo jajinyi ne Iudra.
ע [Ayin]
16 Hane hi lai kepin matre eni a treij. Kola xölaxöla la trenge timidra qa ngöne la luemekeng.
Eje hi, nanyi hë qaatheng la itre ka atreine akeukawanyi ni me thue trengecatreng.
Pëhë mejiune ne la itre neköng trahmany, ke hune kö la ithupëjia.
פ [Pe]
17 Hnei Ziona hna line la lue ime i angeic, ngo pëkö ka aupunyi angeic.
Itre ithupëjia me Iakobo a cile xötreithi angeic. Iehova la ka upi angatr troa lepi angeic.
Nge sisi hë Ierusalema koi angatr.
צ [Tsade]
18 Ka meköti Iehova, ke hnenge hna cil kowe la hnei nyidrëti hna amekötin.*
Drenge ju epuni asë itre nöj, nge goeëne ju la akötreng.
Hna kötre fë la itre jajinyi* me itre nekö trahmanyi qaatheng.
ק [Qoph]
19 Hnenge hna hëne la itre hanying ngo hnei angatr hna nuetriji ni.
Meci hë la itre atre huuj me itre qatre thup ngöne la traon,
Lo angatr a thele xen matre mel.
ר [Resh]
20 Goeën Iehova fe! Atraqatre la akötreng.
Tha loi kö la hning.*
Hace catre la hning, ke tru la hnenge hna icilekeu.
E kuhu trön, kola hnëmec hnei taua. Nge kolo fe a mec e hnine la uma.
ש [Shin]
21 Hna dreng la eni a hokötr. Pëkö ka aupunyi ni.
Drenge hë la itre ithupëjia la akötreng.
Angatr a madrin, ke nyipëti la ka axulune lai.
Ngo tro kö nyipëti a axulun la drai hnei nyipëti hna sa, lo drai ne tro angatr a tui ni.
ת [Taw]
22 Epi troa mama qëmekei nyipë la nöjei ngazo i angatr. Akötrë angatre jë,
Tune la aqane akötrë ni hnei nyipë, pine la itre ngazong.
Ke tru la treijeng, nge wezipo hë la hning.