Mika

5 “Nekö jajiny hna lep fe,

Eö a sijasija la ngönetrei i ö;

Kola cile xötreithi së.

 2 Nge ame eö Bethelema Eferatha,

Lo ka co catre pala ha matre troa ce e memine la itre lapa* ne Iudra,

Tro ha xulu qaathei ö la atr ka troa joxu koi ni e Isaraela,

Lo atr ka hekö, qaane lo itre drai hnapan.

 3 Tro hë nyidrëti a nuaxöji angatr

Uti hë la ijine tro la jajiny a hnaho.

 4 Tro nyidrëti a cil me engëne la itre öni jëne la trengecatre i Iehova,

Jëne la esisitriane la ëje i Iehova Akötresi i nyidrë.

Tro hë angatr a mele tingeting,

Ke tro la edraië i nyidrëti a haöthe la itre cane la fen.

Maine tro la atre Asuria a lö hnine la nöje së, me wajawaja la itre ita ne thupe së hna eköhagen,

Ke tro hë sa upe koi angeic la 7 lao atre thupë mamoe, eje hi, 8 lao nekö i joxu.*

 6 Tro angatr a lepi* Asuria hnei taua,

Memine la itre atr ngöne la itre hnë lö ne la nöje Nimeroda.

Tro nyidrëti a thepe së qaathene la atre Asuria,

Ngöne la angeic a troa lö hnine la nöje së, me wajawaja la zi së.

 7 Ame la itre matra i Iakobo ka troa mele pe nyipine la itre nöj ka nyimutre

Ke tro angatr a tune la wene lepany qaathei Iehova,

Tune la mani hune la itre hnitr

Ka tha mejiune kö kowe la atr

Nge ka tha treqene kö la itre nekö i atr.

 8 Ame la itre matra i Iakobo ka troa mele pe nyipine la itre nöj,

Nyipine la itre nöj ka nyimutre,

Ke tro angatr a tune la liona nyipine la itre öni ne hnaxulu,

Tune la neköi liona nyipine la hnënge mamoe,

Ej a tro, me sesë, me heje zezen;

Pëkö ka atreine troa amele angatr.

 9 Tro ha xejë la ime i ö* hune la ithupëjia,

Nge tro ha apatren asë la itre ithupëjia me eö.”

10 “Ame ngöne la drai cili,” öni Iehova,

“Tro ni a apatrene la itre hos me thëtrije la itre ikariota i ö.

11 Tro ni a lep apatrene la itre traon ne la nöje i ö

Nge tro ni a thëtrij asë la itre hnei ö hna eköhagen.

12 Tro ni a nyipune la itre aqane kuci haze i ö,*

Nge pë hmaca kö ka troa kuci iöni thei ö.

13 Tro ni a thëtrije la itre idrola me itre ikapa i ö,

Nge tha tro hmaca kö eö a thil kowe la itre ewekë hnei eö hna kuca.

14 Tro ni a fejetrije la itre poto ka hmitrötr* nyipi ö

Nge tro ni a lep apatrene la itre traone i ö.

15 Ngöne la elëhning me trengehning, tro ni a të me nyithupene

Kowe la itre nöj ka tha idrei.”