Deuteronomi

8 “Qa i ö troa trongën asë la itre hna amekötin hnenge hna hamë eö enehila, matre tro pala hi ö a mel, me mana, nge matre tro eö a thapa la nöj hnei Iehova hna sisiny troa hamën kowe la itre qaaqaa i ö. 2 Mekune ju eö la nöjei gojenyi asë hnei Iehova Akötresi ö hna tro sai ö koi 40 lao macatre ngöne la hnapapa, matre ahmahmanyi ö me tupathi ö, nge matre mama pi la itre aliene hni i ö laka, tro kö eö a trongëne la itre wathebo i nyidrë maine waea. 3 E cili, hnei nyidrëti hna ahmahmanyi ö, me nue eö troa mecijin, me thua i ö mana, lo hnei ö me itre keme i ö hna thatre, matre tro eö a atre laka, ame la atr, tha angeice kö a mele hnei falawa hmekuj, ngo hnene la nöjei trengewekë hna qaja hnei Iehova. 4 Goi tha hnyiqetre fe la itre iheetre i ö me cipa lue waca i ö, ngöne lo 40 lao macatre. 5 Atre hnyawa hi ö e kuhu hni i ö laka, Iehova Akötresi ö hi lo a haji ö, tune la kem a hajine la nekön.

6 “Nge qa i ö troa trongëne la itre hna amekötin hnei Iehova Akötresi ö, me trongëne la itre jë i nyidrë, me xoue nyidrë. 7 Ke Iehova Akötresi ö a lö sai ö kowe la nöje ka lolo, lo nöje ka hetre tim ka neni, me itre qeqe ne tim, me itre tim ka kaca, nge ka neni ngöne la itre gaa paapa me ngöne la itre wetr, 8 ketre nöje gaa tiqa hnei qitr me bali, me itre vin, me itre iwacua, me itre grenad, lo nöje gaa hetre oelë oliv, me miel, 9 ketre nöje laka, tha tro kö a pë xen, nge tha tro kö eö a hane pë, lo nöje laka, hetre fao ngöne la itre etë, nge hnë tro eö a sine la kopa qa ngöne la itre wetr.

10 “Ame hë la eö a ase xeni mej, qa i ö troa atrunyi Iehova Akötresi ö, ke hnei nyidrëti hna hamë eö la nöje ka lolo. 11 Ngo wange pala kö wanga tro eö a thëthëhmi Iehova Akötresi ö, me tha nyipiewekëne la itre hna amekötin, me itre wathebo, me itre hna ahnith, hnenge hna hamë eö enehila. 12 Ame hë la eö a ase xeni mej, me xupi uma ka mingöming, me lapan itre ej, 13 nge tiqa ha la itre öni i ö ka tru me ka co, me itre sileva i ö me gool, nge e tru hë hnei ewekë i ö, 14 the nue kö la hni i ö troa pi tru, me thëthëmi Iehova Akötresi ö, lo ka thepe eö qa Aigupito, lo nöj ka thahluë eö, 15 nge ka eatrongë eö ngöne la hnapapa ka tru me hna xouen, nge gaa qaqacil me gaa pë tim, lo hna lapa hnene la itre un ka ihej me itre sekopio. Hnei nyidrëti hna axulune la tim qa ngöne la git, 16 nge ngöne la hnapapa cili, hnei nyidrëti hna thua i ö mana, lo hna thatre hnene la itre keme i ö, matre ahmahmanyi ö me tupathi ö, nge nyine loi koi ö ngöne la drai elany. 17 Maine öni ö ka hape: ‘Eni a trenamo hnene la sipu trengecatreng me ecatrene la lue imeng,’ 18 ke the thëthëhmine kö laka, Iehova Akötresi ö la ka hamë trengecatre i ö matre trenamo jë eö, ke aja i nyidrë troa metrötrëne la isisinyikeu hnei nyidrë hna kuca me itre qaaqaa i ö, tun enehila.

19 “Maine tro epuni a thëthëhmi Iehova Akötresi epun, me xötrethenge la itre xaa haze, me nyihluen me thili kow, haawe, eni a qaja koi epun enehila ka hape, tro hë epuni a mec. 20 Tro hë epuni a mec tune la itre nöj hnei Iehova hna apatren qëmekei epun, ke tha drenge kö epun la nine i Iehova Akötresi epun.