Zefania
1 Trengewekë i Iehova koi Zefania* nekö i Kusi nekö i Gedalia, nekö i Amaria, nekö i Hezekia, ngöne lo hneijine i Iosea nekö i Amona joxu ne Iudra:
2 “Tro ni a apatren asë qa celë fen,” öni Iehova.
3 “Tro ni a apatren la atr memine la öni.
Tro ni a apatren la itre waco ne hnengödrai me itre ie ne hnagejë,
Itre ewekë ka iakeiny* me itre atr ka iakötrë;
Eje hi, tro ni a xometrije la atr qa celë fen,” öni Iehova.
4 “Tro ni a xejë la imeng koi Iudra
Me kowe la nöjei atr e Ierusalema,
Nge tro ni a huletrij asë la itre ewekë i Baala qa la,
Ene la ëjene la itretre huuj ne la itre haze trenyiwa, me itretre huuj ka kuci idrola,
5 Me itre ka thil e koho hune la itre uma kowe la itre trongene isi e hnengödrai,
Lo itre ka thil me sisinyi troa mele nyipici koi Iehova
Me sisinyi fe troa mele nyipici koi Moleka;*
6 Me itre ka nuetriji Iehova
Lo itre ka tha hane kö thele me hnying koi Iehova.”
7 Lapa thaupu ju qëmekei Iehova Joxu Ka Sisitria, ke easenyi hë la drai i Iehova.
Hnei Iehova hna hnëkëne la ketre huuj; hnei nyidrëti hna ahmitrötrën* la itre hnei nyidrëti hna hën.
8 “Ngöne la drai ne huuje i Iehova, tro ni a amekötin la itre nekö i joxu,
Me itre nekön ne la joxu, me itre ka heetrëne la itre iheetr trenyiwa.
9 Ngöne la drai cili, tro ni a amekötin asë la itre ka elë hune la ita hmitrötr,*
Itre ka nyialien la uma ne la maseta i angatr hnei iakötrë me iaö.
10 Ngöne la drai cili,” öni Iehova,
“Tro ha nyimejen qa ngöne la Qëhnelö Ne La Itre i,
Troa hokötr ngöne la hnaaluene kartie ne la traon,
Me keciqa qa ngöne la itre sasala.
11 Hokötre jë itre atrene Maketas,*
Ke hna humuth* asë la itre ka salem;
Patre asë hë la itre ka tulu sileva.
12 Ngöne la ijine cili, tro ni a ithele hnyawa e Ierusalema memine la itre laam,
Nge tro ni a amekötin la itre ka nyi ka loi,* me ka qaja e kuhu hni i angatr ka hape,
‘Tha tro kö Iehova a kuca la loi, nge tha tro kö nyidrëti a kuca la ngazo.’
13 Tro ha thapa la itre mo i angatr nge tro ha thëtrij la itre uma i angatr.
Tro angatr a xupi uma, ngo tha tro kö angatr a lapan;
Tro angatr a traa vin, ngo tha tro kö angatr a iji wainan.
14 Easenyi hë la drai ka tru i Iehova!
Calemi hë nge saqe catre hë!
Ka iaxoueny la mejene la drai i Iehova.*
Ngöne la drai cili, kola sue la atre isi.
15 Ame la drai cili, ke ketre drai ne elëhni,
Ketre drai ne akötr me hnehengazo,
Ketre drai ne wene me apatren,
Ketre drai ka jidr me mit,
Ketre drai ka hetre iaw me menihao,
16 Ketre drai ne troa ufi trutru me sue ne isi,
Kowe la itre traon hna eköhagen me itre ita ne thup ka draië.
17 Tro ni a hetin la itre atr ngöne la akötr,
Nge tro angatr a tro tune la itre timek,
Ke hnei angatr hna ngazo koi Iehova.
Tro ha jume la madra i angatr tune la xaxau,
Me ngönetrei* i angatr tune la agetrin.
18 Thatreine kö la sileva me gool i angatr troa amele angatr ngöne la drai ne elëhni i Iehova;
Ke tro ha dreuth asë la ihnadro hnene la trenge aja i nyidrë,
Ke tro nyidrëti a apatren la itre atrene la nöj, nge tha ka co kö la aqane iapatreny.”