Angetre Amekötin
13 Hnene hmaca kö la angetre Isaraela hna kuca la ngazo qëmekei Iehova, nge hnei Iehova hna nu angatr kowe la imene la angetre Filisiti koi 40 lao macatre.
2 Ame ngöne la ijine cili, hetre ketre trahmanyi ne Zorea, Manoa la ëjen, nge atre Dana nyidrë. Tha ka hnaho kö la föi nyidrë; pëkö nekö i eahlo. 3 Ame ngöne la ketre drai, hnene la angela i Iehova hna mama kowe la föe me hape: “Pane dreng: tha ka hnaho kö nyipo, nge pëkö nekö i nyipo. Ngo tro hë nyipoti a upune, me hnaho nekö trahmany. 4 Matre qaan enehila, tha tro hmaca kö nyipoti a iji waina me iji ka haitr, me xeni la ketre ewekë ka pui ngazo. 5 Ke dreng: tro nyipoti a upune me hnaho nekö trahmany. Tha tro kö a cine la he i nyën, ke tro nyën a Nazeri* i Akötresie qaane la kola hnahon.* Tro nyën a amele Isaraela qa ngöne la ime ne la angetre Filisiti.”
6 Ame hnene la föe hna tro me qaja kowe la föi angeic ka hape: “Hnene la atr ne la nyipi Akötresie hna traqa troa ithanata me eni. Ceitu i nyidrë me angela ne la nyipi Akötresie, nge nyine haine* la iqëmeke i nyidrë. Ngo tha ase kö ni hnyingëne ka hape, atre kaa nyidrë. Nge tha qaja pi kö nyidrë la ëje i nyidrë. 7 Ngo öni nyidrëti pe: ‘Dreng: tro hë nyipoti a upune me hnaho nekö trahmany. Tha tro kö nyipoti a iji waina me kahaitr, me xeni la ketre ewekë ka pui ngazo. Ke tro la nekönatr a Nazeri i Akötresie, qaane la kola hnaho nyën uti hë la tro nyën a mec.’”
8 Ame hnei Manoa hna sipone iele Iehova ka hape: “Iehova fe, menu hë ni. Ngo epi tro nyipëti a upe hmaca lo atre ne la nyipi Akötresie, matre troa ini nyio la aqane troa hiane la nekönatr hna troa hnahon.” 9 Matre hnene la nyipi Akötresie hna kapa la sipo i Manoa, nge hnene hmaca la angela ne la nyipi Akötresie, hna tro troa wange la föe ka lapa ngöne la hlapa; ngo patre kö Manoa föi eahlo. 10 Ame hnene la föe hna canga nyenyape troa wai Manoa me hape: “Pane dreng! Ame lo trahmanyi ka traqa troa wai ni lo ketre drai, ke hnei nyidrëti hna mama hmaca koi ni.”
11 Thupene lai, hnei Manoa hna xötrethenge la föi angeic kowe lai atr, me hape: “Nyipëti hi lo ka ithanata memine la föeng?” Nge öni nyidrë: “Ö, eni hi lo.” 12 Matre öni Manoa jë hi: “Epi troa eatr la itre trengewekë i nyipë! Ngo, tune kaa la aqane tro la nekönatr elany a mel? Nge nemene la nyine tro nyën a kuca?” 13 Ame hnene la angela i Iehova hna sa koi Manoa ka hape: “Tha tro kö la föi ö a xen lo itre ewekë hnenge hna wathebo eahlo. 14 Tha tro kö eahlo a xen qa ngöne la vin, nge tha tro kö eahlo a iji waina me kahaitr, me xeni la ketre ewekë ka pui ngazo. Loi e tro eahlo a metrötrëne hnyawa la nöjei ewekë hnenge hna qaja.”
15 Nge öni Manoa jë hi kowe la angela i Iehova: “Pane lapa ju e ce, nge tro nyio a hnëkën la ketre neköi nani koi nyipë.” 16 Ngo önine la angela i Iehova: “Maine tro ni a lapa e ce, tha tro kö ni a xeni la hnei ö hna hnëkën. Ngo maine eö a ajan troa kuca la ketre huuj ne dreuth asë koi Iehova, kuca jë.” Thatre kö Manoa laka, angela i Iehova hi lai. 17 Thupene lai, hnei Manoa hna hnying kowe la angela i Iehova ka hape: “Drei la ëje i nyipë? Matre tro nyio a atrunyi nyipë e traqa jë eatr la hnei nyipëti hna qaja.” 18 Ngo sa jë hi angela i Iehova ka hape: “Hnauëne la eö a pi atre la ëjeng, nge ketre ëje pe lai ka tru catr?”
19 Ame hnei Manoa hna xome la neköi nani memine la huuj ne wene feja,* me huujëne koi Iehova hune la etë. Nge hnei Akötresie hna kuca la ketre ewekë nyine hain qëmekei Manoa me föi angeic. 20 Ame la kola elë la ukahlokin eë qa ngöne la ita ne huuj a tro hnengödrai, hnene la angela i Iehova hna ce elë memine la ukahlokin qëmekei Manoa me föi angeic. Ame hnei nyidroti hna sa iwatingöneca me thil. 21 Trotrohnine ju hi Manoa e cili laka, ketre angela i Iehova lai. Ngo qane ju hi lai, tha mama hmaca kö la angela i Iehova koi Manoa me föi angeic. 22 Ame hnei Manoa hna qaja kowe la föi angeic ka hape: “Tro hë nyiso la a mec, ke ase hë nyiso goeë Akötresie.” 23 Ngo sa jë hi la föi angeic ka hape: “Maine hnei Iehova ju hna mekune troa humuthi nyiso, ke tha tro jë kö nyidrëti a kapa la huuj ne dreuth asë, memine la huuj ne la itre wene feja i nyiso. Nge tha tro jë kö nyidrëti a amaman me thuemacanyi nyiso la nöjei ewekë celë.”
24 E thupen, hnene la föe hna hnaho nekö trahmany, me ati ëje i nyën Samasona. Nyën a tru trootro, nge Iehova a amanathithi nyën. 25 Ame hna nyiqaane huliwa la ua i Iehova thei nyën e Maane-Dana, nyipin e Zorea me Esetaol.