Angetre Amekötin

15 Ame ngöne la ketre drai, hmekune lo kola menuë qitr, hnei Samasona hna tro troa wang la föi angeic; hnei angeic hna tro fë la ketre neköi nani. Nge öni angeic: “Eni a pi wang la föeng ngöne la hnahag.”* Ngo xele kö la keme ne la föi angeic. 2 Öni nyidrë: “Öning pena kö, ‘ma Samasona a methinë nyën.’ Matre hnenge pena hna hamë nyën kowe la ketre nekö trahmanyi ka xötrethenge eö. Ngo hane pe la jini nyën ka mingöminge catre kö. Xomi nyëne jë matre nyihnane lo ketre.” 3 Ngo sa jë hi Samasona ka hape: “Enehila, pë hmaca kö nyine tro la angetre Filisiti a qaja e tro ni a lepi angatr.”

4 Ame hnei Samasona hna tro me xolouthe la 300 lao kuli wael,* me iothekeune la itre pune i angatr, isa ala lu, me line la itre uke jina nyipine la lue pun hna iothekeun. 5 Thupene lai, hnei angeic hna amelene la itre uke jina, me nue la itre kuli wael ngöne la itre hlapa qitr ne la angetre Filisiti. Ame hna mel asë la itre uke qitr, me itre qitr hna tha menuën pala kö, me hnënge vin, me itre hlapa oliv* i angatr.

6 Ame hnene la angetre Filisiti hna hnyinge ka hape: “Drei la ka kuca la?” Nge hna sa koi angatr ka hape: “Hnei Samasona, lo tresi ne lo atre Timenatha, ke hnei nyidrëti hna xome la föi angeic, me hamëne kowe la ketre nekö trahmanyi ka xötrethenge angeic.” E cili, hnene la angetre Filisiti hna tro troa dreuthe la föi Samasona me keme i nyën. 7 Matre öni Samasona jë hi: “Pine epun ujë tun, tha tro jë kö ni a cil uti hë la tro ni a ase të koi epun.” 8 Ame hnei angeic hna humuthi angatr asë; ala nyimu pi hë la itre ka mec. Ase jë hi lai, hnei angeic hna tro troa mel ngöne la ketre ngönemenyi* ne la git e Etama.

9 Thupene lai, hnene la angetre Filisiti hna elë kowe la zi ne la angetre Iudra, me acil la lapa ne soc i angatr e cili, me tro kanothe la traon ne Lehi. 10 Matre hnene la angetre Iudra hna hnying ka hape: “Hnauëne la epuni a elë troa lepi hun?” Nge sa jë hi la angetre Filisiti ka hape: “Eahuni a traqa troa othi Samasona, matre troa të koi angeic la hnei angeic hna kuca.” 11 Ame hnene la 3 000 lao atre Iudra hna ce uti kowe la ngönemenyi e Etama, me qaja koi Samasona ka hape: “Atre hi ö laka, kola musinë së hnene la angetre Filisiti! Hnauëne la eö a ujë tun?” Matre öni angeic: “Hnenge hna kuca koi angatr, tune lo hnei angatr hna kuca koi ni.” 12 Ngo sa jë hi angatre ka hape: “Eahuni a traqa troa othi ö, me tro sai ö kowe la angetre Filisiti.” Ame hnei Samasona hna sa ka hape: “Nga pane sisinyi jë koi ni laka, tha tro kö epuni a akötrë ni.” 13 Matre öni angatre jë hi: “Eahuni hi a troa othi ö me tro sai ö kowe la angetre Filisiti. Ngo tha tro kö huni a humuthi ö.”

Ame hnei angatr hna othi angeic memine la lue eno ka hnyipixe, me elë sai angeic qa ngöne la git. 14 Matre ame hë la Samasona a traqa e Lehi, hnene la angetre Filisiti hna sue madrin. Ngo hnene la ua i Iehova hna thue trengecatre i angeic, matre hna uke la lue eno ka othe la lue ime i angeic, kösë lue lino hna dreuth. 15 E cili, hnei angeic hna öhn me hlem la june ineqë ne boliko ka hnyipi mec, me humuth la 1 000 lao trahmany memin. 16 Matre öni Samasona:

“Jëne la june ineqë ne boliko, hna xawane la ca ta me lue ta!

Jëne la june ineqë ne boliko, hnenge hna humuth la 1 000 lao trahmany.”

17 Thupene la angeic a ase ithanata, hnei angeic hna trije la june ineqë ne boliko, me ati ëjen la götrane cili, Ramalehi.* 18 Ame hnei angeic hna meci hnei pi ij, nge hnei angeic hna sipo ixatua koi Iehova me hape: “Nyipëti la ka aijijë ni troa ngaan* la itre ithupëjia. Ngo hapeu, tro kö nyipëti a nue ni troa meci hnei pi ij, me kei kowe la imene la itre atr hna tha xötrehatren?”* 19 Ame hnei Akötresieti hna fe angangan la ihnadro e Lehi, nge xulu pi hi la tim. Matre ame hë la Samasona a ase ij, ke egöcatre hmaca jë hi angeic, nge hetre trengecatre i angeice hë. Celë hi kepin matre hnei angeic hna ati ëjen la timi cili, Eni-Hakore,* nge uti hë la drai ce, eje pala hi e Lehi.

20 Haawe, traqa koi 20 lao macatre ne amekötine Samasona la nöje Isaraela, ngöne lo kola musinë angatr hnei angetre Filisiti.