Angetre Amekötin

19 Ngöne la ijine cili, pë pala kö joxu e Isaraela. Nge ame ngöne la ketre götran gaa nanyi ne la itre wetr e Eferaima, hetre atre Levi ka xomi föe* qa Bethelema e Iudra. 2 Ngazo pe, ka nyixetë pala hi nyën, matre hnei nyën hna trotriji angeic, me bëeke hmaca kowe la keme i nyën e Bethelema e Iudra, me lapa e cili, koi 4 lao treu. 3 Thupene lai, hnene la föi nyën hna tro troa iele nyën troa bëeke hmaca. Nge hnei angeic hna ce tro memin la hlue i angeic, me lue boliko. Nge hnene la föe hna lö sai angeic kowe la hnalapa ne la keme i nyën. Matre ame hë la kola öhnyi angeic hnene la hmihmi* i angeic, hnei nyidrëti hna kepe angeice hnyawa. 4 Ame hnene la keme ne la föe, ene la hmihmi ne la atre Levi, hna ielene la tresi nyidrë troa lapa thei nyidrë koi köni drai. Nge hnei angatr hna ce xeni me ij, me meköl e cili.

5 Nge ame hë ngöne la hna 4 ne drai, hnei angatr hna ilë e sine hmakanyi troa tro, ngo hnene la keme ne la föe hna qaja kowe la tresi i nyidrë ka hape: “Pane xeni jë la ketre ewekë, matre hetre trengecatre i ö jë.* Ase jë hi lai, tro hë epuni a tro.” 6 Matre hnei angatr hmaca hna lapa, nge hnei nyidroti hna ce xeni me ij. Thupene lai, önine la keme ne la föe kowe la atre Levi ka hape: “Pane meköle hmaca ju e ce, matre pexeje pi la tronge i ö.”* 7 Ngo ame hë la kola mejë hnene la atre Levi, ke hnene la hmihmi i angeic hna alapa angeic. Matre hnei angeic hna meköle hmaca e cili.

8 Ame hë la hna 5 ne drai, hnei angeic hna ilë e sine hmakanyi troa tro, ngo hnene la keme ne la föe hna qaja kowe la tresi nyidrë ka hape: “Pane xeni jë la ketre ewekë, matre hetre trengecatre i ö jë.” Tro ju pë hë la itre hawa uti hë e hnaipajö hej, nge nyidroti pala kö a ce xen. 9 Ngo ame hë la kola mejë hnene la atre Levi me föi angeic, memine la hlu, ke hnene la hmihmi i angeic, ene la kemen la föe hna qaja ka hape: “Goeëne, hejiheji hë, kola ha troa jidr, matre pane meköle ju e ce. Pane meköle hmaca ju e ce, matre pexeje pi la tronge i ö. Nge elany, tro hë epuni a canga ilë me bëeke hmaca kowe la hnalapa i ö.”* 10 Ngo xele hë la atre Levi ma meköle e cili, matre hnei angeic hna tro uti hë Iebusi, ene Ierusalema. Ce angeic memine la lue boliko ka ajö trengetreng, me föi angeic, me hlue i angeic.

11 Nge ame hë la angatr a traqa ezin e Iebusi, ke kola ha hejihej. Matre hnene la hlu hna hnying kowe la maseta i angeic ka hape: “Tro kö sa cil ngöne la traon ne la angetre Iebusi matre meköl e cili?” 12 Ame hna sa hnene la maseta ka hape: “Waea, tha tro kö sa cil ngöne la traone trenyiwa, ke pëkö atre Isaraela e cili. Tro pe sa tro uti hë Gibea.” 13 Thupene lai, öni angeic hmaca jë hi: “Easë pe a isine troa tro uti hë e Gibea, maine Rama. Nge wange pi pë hë e cili la hne së hna troa meköl.” 14 Matre hnei angatre hmaca hna xome la gojeny. Nge ame hë la angatr a traqa ezin e Gibea e Beniamina, ke kola ha lö la jö.

15 Angatr a pane cile ju e Gibea troa meköl e cili. Ngo ame hë la angatr a lö ngöne la traon, me lapa ngöne la gaa tru atr, ke pëkö ala cas ka hane pi kepe angatr. 16 Thupene lai, xulu pi hi la ketre qatr ka qa hna huliwa e helep, nge ka hnyipi traqa e Gibea. Nyidrëti a traqa qa ngöne la itre wetr e Eferaima, ngo angetre Beniamina la itre atrene la traon. 17 Nge ame hë la nyidrëti a öhne la trenyiwa ka lapa ngöne la gaa tru atr, öni nyidrëti jë hi: “Eö a tro ië? Nge qa i ö kaa?” 18 Sa jë hi la trenyiwa ka hape: “Eahuni a traqa qa Bethelema e Iudra, nge eahuni a tro kowe la ketre götrane gaa nanyi ngöne la itre wetr e Eferaima, ke atre cili ni. Qange e Bethelema e Iudra, nge eni hë la tro kowe la uma i Iehova,* ngo pëkö ca atr ka hane pi kepe ni. 19 Hnei eahuni hna xometrongë qitr, me nyine xen kowe la itre boliko, me falawa me waina koi ni, me kowe la föe, me hlue i nyio. Pëkö ketre ewekë ka pë thei eahun.” 20 Matre önine la qatre koi angeic ka hape: “Epi tro eö a tingeting! Qanyinge kö nyixane la ka pë thei ö. Ngo eni a sipo, the meköle kö e celë ngöne la gaa tru atr.” 21 Ame hnei nyidrëti hna lö sai angeic kowe la uma i nyidrë, me ithuane la lue boliko. Thupene lai, hnei angatr hna wasine la lue ca i angatr, me ce xeni me ij.

22 Angatr pala kö a ce madrin, ame hna xulu pi la itre atr ka iangazo ne la traon. Hnei angatr hna cile xötreith la uma, me fenafena catrën la qëhnelö. Öni angatr jë hi kowe la atrekë hnalapan ka hape: “Lö fë pi lai trahmanyi ka lapa thei ö, matre tro huni a ce meköl memin.” 23 Matre hnene la atrekë hnalapan hna tro koi angatr me hape: “Eni a sipo epun itre trejin, the kuca kö la ngazo celë, ke eni la ka hëne la atre cili. The kuca pi kö la ewekë cili, ke nyine hmahmane lai. 24 Ngo hane pe la neköng jajiny, ka tha ce meköle pala kö me trahmany, memine la föe ne la atre cili. Tro ni a upi nyidro koi epun, nge qanyi epuni kö wang, maine troa angazo nyidro, maine kuca la hnei epuni hna ajan. Ngo the kuca pi kö la nyine hmahman kowe la atre celë.”

25 Ngazo pe, xele kö angatr ma drei nyidrë. Matre hnene la atre Levi hna xome la föi angeic, me tro sai nyën koi angatr. Nge hnei angatr hna angazo nyën ngöne la jidri ka pexej uti hë e hmakany. Thupene lai, hnei angatr hna nue nyëne hmaca troa tro e kaqa ne lai. 26 Nge e hmahmakany, hnene la föe hna traqa kowe la qënehlö ne la atr ka kapa la föi nyën, nge hnei nyën hna kei me meköl e cili, uti hë la kola fetra la jö. 27 Nge ame hë la kola hlë la maseta i nyën e hmakany, hnei angeic hna fe la itre qëhnelö troa tro. E cili, hnei angeic hna öhne la föi angeic a meköl qëmekene la qëhnelö, nge lue ime i nyën ngöne la qene qëhnelö. 28 Matre öni angeic koi nyën: “Cile jë matre tro sa tro.” Ngo tha sa pi kö nyën. Ame hnei angeic hna xomi nyën, me ati nyën hune la boliko, me bëeke hmaca kowe la hnalapa i angeic.

29 Matre ame hë la angeic a traqa kowe la hnalapa i angeic, hnei angeic hna xome la hele, me thupathupa la föi angeic koi 12 lao hnep. Thupene lai, hnei angeic hna iupi fë la isa ca hnep kowe la itre tribu ne Isaraela. 30 Nge ame asë hi la itre atr ka öhne lai, ke öni angatr: “Tha hna hane kö traqa la ewekë cili qaane lo kola thepe Isaraela qa Aigupito. Haawe, pane mekune ju la ewekë ka traqa,* ce ithanatane jë, nge tro hë epuni a qaja koi hun la nyine tro huni a kuca.”