Deuteronomi

11 “Qa i epun troa hnimi Iehova Akötresi epun, me metrötrëne pala hi la itre hnëqa i epun koi nyidrë, me itre hna amekötin, me itre wathebo, me itre hnei nyidrëti hna ahnith. 2 Atre hi epuni laka, eni a ewekë koi epun enehila, ngo tha eni kö a ewekë kowe la itre nekö i epun, ka thatre nge ka tha hane öhne la ihaji* i Iehova Akötresi epun, memine la edraië i nyidrë, me iwanakoime i nyidrë, me ime ka catre* i nyidrë. 3 Tha hane kö angatre öhne la itre iamamanyikeu me itre huliwa hnei nyidrëti hna kuca e Aigupito koi Farao joxu ne Aigupito, memin asë la nöje i angeic, 4 memine fe la hnei nyidrëti hna kuca kowe la trongene isi i Aigupito, me itre hos, me itre ikatre i Farao, hna hetin hnene la hnagejë ka palulu, lo angatr a weji epun. Hnei Iehova hna aca tro apatrenyi* angatr. 5 Tha hane kö angatre öhne la hnei nyidrëti hna kuca koi epun ngöne la hnapapa, uti hë la epuni a traqa e celë, 6 memine la hnei nyidrëti hna kuca koi Dathana me Abirama, lue nekö i Eliaba, lo nekö i Reubena, lo kola nganga la ihnadro me ulumi nyidro, me itre fami i nyidro, me itre itate i nyidro, me itre ka ce xöle me nyidro qëmekene la angetre Isaraela asë. 7 Ngo epuni hi la ka öhne la itre huliwa ka tru hna kuca hnei Iehova.

8 “Haawe, qa i epun troa thupëne la hnenge hna amekötin koi epun enehila, matre tro epuni a catr me thapa la nöj ka ej ngöne la ketre götrane la hneopegejë Ioridrano, 9 me mel aqeany ngöne la nöj hnei Iehova hna sisiny troa hamën kowe la itre qaaqaa i epun, me itre matra i angatr, ene la nöje gaa neni gala la melek me miel.

10 “Ame la nöj hnei epuni hna troa thapa, ke tha ceitune kö memine la nöje Aigupito, lo hnei epuni hna tro qa ngön, lo nöj hnei epuni hna jumi feja, me nyi jë i tim hnei waca* ngöne la itre hlapa, tune la kola fii la itre hna eëny. 11 Ame kö la nöj hnei epuni hna troa thapa, ke nöje gaa hetre wetr me gaa paapa. Ej a ije la mani ka trotro qa hnengödrai. 12 Ketre nöje lai hnei Iehova Akötresi epun hna thupëne hnyawa. Iehova Akötresi epun pala hi a goeëne la nöje cili, qaane la kola nyiqane la macatre uti hë la pune macatre.

13 “Nge maine tro epuni a drengethenge hnyawa la itre hna amekötin hnenge hna ahnithe koi epun enehila, nge maine tro epuni a hnimi Iehova Akötresi epun me nyihlue i nyidrë hnene la hni i epun ka pexej, me mele i epun ka pexej, 14 tro hë ni a axulun kowe la nöje i epun la mani ngöne la ijine hna sa, ene la mani ngöne la pune la macatre, me mani ngöne la kola nyiqaane la macatre, nge tro hë epuni a menuëne la itre wene feja i epun, me waina ka hnyipixe i epun, me oele i epun. 15 Tro ni a aciane la itre haö ngöne la itre hlapa i epun thatraqane la itre si i epun, nge tro hë epuni a xeni mej. 16 Ngo thupëne kö, wanga iaöne pi la hni i epun, nge wanga tro epuni a nyihluen me thili kowe la itre xaa haze. 17 Ke wanga elëhni jë Iehova koi epun, nge tro hë nyidrëti a thinge la hnengödrai, matre tha tro hmaca kö a mani me hame la ihnadro, nge wanga canga patre pi epun qa ngöne la nöj ka loi hnei Iehova hna hamë epun.

18 “Tro epuni a amë hutine la itre trengewekënge celë, ngöne la itre hni i epun, me mele i epun. Tro itre ej a tune la hatren hna hnöthe kowe la ime i epun, me tune la otren hune la göbadri* i epun. 19 Inine jë itre ej kowe la itre nekö i epun: ithanatane jë, la epuni a lapa hnine la itre uma i epun, me ngöne la epuni a tro e cahu gojeny, me ngöne la epuni a meköl me mejë hmaca. 20 Cinyianyine jë itre ej ngöne la itre hune qëhnelö ne la itre uma i epun, me hune la itre qëhnelö* i epun, 21 matre tune la aqane cile hut la hnengödrai hune la ihnadro, tro fe epun me itre nekö i epun a mel aqeany ngöne la nöj hnei Iehova hna sisiny troa hamën kowe la itre qaaqaa i epun.

22 “Maine tro epuni a drengethenge me trongëne la hna amekötin celë hnenge hna hamë epun, ene la troa hnimi Iehova Akötresi epun, me trongëne la nöjei jë i nyidrë, me lapa qale koi nyidrë, 23 tro hë Iehova a helëne la itre nöj qëmekei epun, nge tro hë epuni a thapa la itre ewekë ne la itre nöje ka tru, nge ka ala nyimu kö hui epun. 24 Thatraqai epun la nöjei götran hnei epuni hna troa tro ngön. Qaane la hnapapa uti hë la Lebanona, memine la Hneopegejë, lo hneopegejë Euferate, uti hë la hnagejë e kuë,* celë hi zi i epun. 25 Pëkö ca atr ka troa atreine cil koi epun. Tro Iehova Akötresi epun a kuca matre tro la itre nöj hnei epuni hna tro kow, a xou me hmengöhmengön qëmekei epun, tune lo hnei nyidrëti hna sisinyi koi epun.

26 “Ame enehila, eni a amë qëmekei epun la manathith me hnëjin: 27 tro epuni a manathith, e tro epuni a drengethenge la itre hna amekötin hnei Iehova Akötresi epun, hnenge hna ahnithe koi epun enehila, 28 nge tro epuni a hnëjin, e tha drengethenge kö epun la itre hna amekötin hnei Iehova Akötresi epun, me jea qa ngöne la gojenyi hnenge hna upi epun troa trongën enehila, me xötrethenge la itre xaa haze, lo hnei epuni hna thatre.

29 “Ame hë la Iehova Akötresi epun a troa lö sai epun kowe la nöj hnei epuni hna troa thapa, tro epuni a qaja la manathith qa ngöne la wetre Gerizim, memine la hnëjin qa ngöne la wetre Ebala. 30 Hapeu, tha angatre kö ngöne la götrane kuë* ne la hneopegejë Ioridrano, ngöne la nöje i angetre Kanana, itre ka lapane la Araba, qëmekene Gilegala, ezine la itre sinöe ka tru e More? 31 Ke epuni a thupa la Ioridrano, matre thapa la nöj hnei Iehova Akötresi epun hna hamë epun. Nge ame hë la epuni a thapa la nöj me lapan ej, 32 thupëne kö troa trongën asë la itre hna amekötin me itre wathebo hnenge hna amamai epun ngöne la drai celë.