Pane Tus Samuela
8 Qatre hë Samuela, matre hnei angeic hna acile la lue nekö i angeic troa iameköti e Isaraela. 2 Ioela la ëjene la ka tru, nge Abia la hnaaluen. Nyidroti a iameköti e Bere-seba. 3 Ngo tha nyitipune kö nyidro la tulu ne la keme i nyidro. Lue ka majemine huliwa qenatrekënö, me kepe mani juetrë troa amekötine triane la itre jol.
4 Ame la ketre drai, hnene la nöjei qatr ne Isaraela hna icasikeu, me tro koi Samuela e Rama. 5 Öni angatre jë hi: “Pane drei huni ju! Qatre hë nyipë, nge tha nyitipu nyipëti kö hnene la lue nekö i nyipë. Haawe, acile jë la ketre joxu ka troa ameköti hun, tune la itre xa nöj.” 6 Ngo tha madrine kö* Samuela, ke öni angatr: “Acile jë la ketre joxu ka troa ameköti hun.” Matre angeic a thithi jë koi Iehova, 7 nge Iehova a sa jë ka hape: “Kuca asë jë la hna qaja hnene la nöj, ke tha eö kö la hnei angatr hna trij, ngo eni pe. Xele kö angatr ma tro ni a joxu i angatr. 8 Casi pala hi la aqane ujë i angatr qaane lo eni a thepe angatr qa Aigupito. Anyimua triji ni hë hnei angatr troa nyihluene la itre xa haze. Nge enehila, angatre hmaca a ujë tune koi eö. 9 Haawe, kuca jë la hnei angatr hna sipon. Ngo hmekë angatre ju, nge qejepengöne hnyawa jë ka hape, ijije hi tro la joxu a amekötine koi angatr la hnei nyidrëti hna ajan.”
10 Matre Samuela a qaja jë kowe la nöj ka aja joxu, la nöjei ewekë hna qaja hnei Iehova. 11 Öni angeic: “Hane hi la itre ewekë hna aijijën kowe la joxu ka troa mus: Tro angeic a xome la itre nekö i epun trahmany, troa thupëne la itre ikatre i angeic, me tithe la itre hose i angeic, me nyinyap qëmekene la itre ikatre i angeic. 12 Tro angeic a acile la itre tan hune la 1 000 lao soc, me 50 lao soc. Nge tro fe la itre xa nekö i epun trahmany a eënyi koi angeic, me menuë hlapa koi angeic, me kuca la itre jia ne isi i angeic, me hnëkëne la itre jia thatraqane la itre ikatre i angeic. 13 Nge tro fe angeic a xome la itre nekö i epun jajiny troa hnëkë senitr, me kuci xen, me sa falawa. 14 Nge tro fe angeic a xome la itre hlapa ka ham i epun, me itre hlapa vin* ka ham i epun, me itre hlapa oliv ka ham i epun, troa hamën kowe la itre hlue i angeic. 15 Nge tro angeic a xome la sine* la itre ewekë hna menuën hnine la itre hlapa, me itre hlapa vin i epun. Nge tro angeic a hamën kowe la itre ka huliwa koi angeic, me itre hlue i angeic. 16 Tro fe angeic a xome la itre hlue i epun, trahmanyi me jajiny, me itro kau i epun ka lolo, me itro boliko i epun troa huliwa koi angeic. 17 Nge tro fe angeic a xome la sine* la itro mamoe i epun, nge tro epun a hlue i angeic. 18 Nge tro ha traqa la drai ne tro epun a eetre pine la joxu hnei epun hna iën, ngo ngöne la drai cili, tha tro kö Iehova a sa koi epun.”
19 Ngo xele kö la nöje ma drei Samuela, angatre kö a pi hun. Öni angatr: “Nyine u, ngo ase hë huni mekun troa hetre joxu. 20 Tro hë huni a tune la itre xa nöj, nge tro la joxu hun a ameköti hun, me troxomi hun, me isi me itre ithupëjia me eahun.” 21 Thupene la hna pane drenge hnyawa la nöj, Samuela a qajaqaja jë koi Iehova. 22 Nge öni Iehova jë hi: “Drei angatre ju, tro eö a acile la ketre joxu ka troa musinë angatr.” Haawe, öni Samuela kowe la itre trahmany ne Isaraela: “Bëeke hmaca jë kowe la itre hnalapa i epun.”