Pane Tus Samuela
12 Thupene lai, hnei Samuela hna qaja kowe la nöje Isaraela ka hape: “Ase së hë ni kuca la hnei epun hna sipon, nge hnenge hna acile la joxu ka troa mus hui epun. 2 Haawe, hane hi la joxu i epun. Qatre hë ni la, nge qia ha la ipene heng. Nge ce epun me itre nekönge trahmany. Qaane lo eni a thöth uti hë enehila, hnenge pala hi hna elemeke i epun. 3 Eni hi la. Matre qëmeke i Iehova memine la atre hna iën, qaja amamane jë: “Hnenge kö hna hane thapa la boliko, maine kau i ketre? Hnenge kö hna atrekënö maine akötrë ketre? Hnenge kö hna kepe mani, matre tha nyipiewekëne la ngazo i ketre? Qaja jë koi ni, nge tro hmaca ni a të koi epun.” 4 Sa jë hi angetre Isaraela ka hape: “Tha ka atrekënö kö nyipë, nge tha hnei nyipëti kö hna akötrë hun, nge tha hnei nyipëti kö hna kapa la ketre ewekë qaathei ketre.” 5 Matre öni Samuela jë hi: “Enehila, eni a qaja qëmeke i Iehova, memine la atr hnei nyidrëti hna iën laka, tha hnenge kö hna ngazo koi epun.” Öni angatre jë hi: “Öhne kö nyidrë.”
6 Thupene lai, öni Samuela: “Öhne kö Iehova, atre huliwa Mose me Arona, me atre thapa la itre qaaqaa i epun qa Aigupito. 7 Haawe enehila, cile ju e celë, nge tro ha ameköti epun qëmeke i Iehova. Tro ni a amekunëne la itre huliwa ka meköt hnei Iehova hna kuca koi epun, me itre qaaqaa i epun.
8 “Ame lo Iakobo a traqa qa Aigupito, hnene la itre qaaqaa i epun hna treije koi Iehova. Ame hnei Iehova hna upi Mose me Arona troa thepe angatr qa Aigupito, me alapa angatr e celë. 9 Ngo thëthëhmi Iehova hë hnei angatr, lo Akötresi angatr. Matre hnei nyidrëti hna nue angatre koi Sisera, lo tane la itre sooce i Hazora, me kowe la angetre Filisiti, me kowe la joxu ne Moaba. Nge hnene la itre atre cili hna isi me angatr. 10 Ame hnene la itre qaaqaa i epun hna treije hmaca koi Iehova. Öni angatr: ‘Hne huni hna ngazo, ke hne huni hna nuetriji Iehova troa nyihluene la itre Baala, me itre idrola i Aseira. Ngo enehila, amele huni jë qaathene la itre ithupëjia me eahun, matre tro huni a nyihlue i nyipë.’ 11 Qa ngöne lai, hnei Iehova hna upi Ierubaala, me Bedan, me Iefetha, me eni Samuela. Hnei nyidrëti hna amele epun qaathene la itre ithupëjia xötreith, matre tro epun a mele tingeting. 12 Nge ame lo kola traqa troa isi hnei Nahasa, joxu i angetre Amona, tha mano kö epun sipone troa hetre joxu. Ngo tha öhne kö epun laka, Iehova hi lo Akötresi epun, la joxu i epun. 13 Hane hi la joxu hnei epun hna iën, lo hnei epun hna ajan. Goeën! Iehova a acile la joxu i epun. 14 Haawe, maine tro epun a xoue Iehova, me nyihlue i nyidrë, me drenge la hnei nyidrëti hna qaja, nge e tha cile kö epun kowe la hna amekötin hnei Iehova, nge e tro epun me joxu i epun a drei Iehova Akötresi epun, tro ha lolo la mele i epun. 15 Ngo e traqa jë epun xele ma drei Iehova, me cil kowe la itre hna amekötin hnei Iehova, tro Iehova a nyithupene koi epun, me itre keme i epun. 16 Enehila, cile ju e celë, nge goeëne ju la ewekë ka tru hnei Iehova hna troa kuca qëmeke i epun. 17 Ijine menuë qitre la, ngo tro ni a sipo Iehova troa axulune la hedreng, me mani. Nge tro hë epun a atre me trotrohnine laka, ka ngazo la hnei epun hna kuca koi Iehova, lo epun a aja joxu.”
18 Matre Samuela a ithanata jë koi Iehova, nge Iehova a axulune jë la mani, me hedreng ngöne la drai cili. Ame hnene la nöj hna xoue Iehova me Samuela. 19 Nge önine la nöj asë koi Samuela ka hape: “Thithi fë jë la itre hlue i nyipë koi Iehova, ke xele huni ma mec. Hne huni hna nyixane la itre ngazo hun, ke hne huni hna aja joxu.”
20 Öni Samuela jë hi kowe la nöj: “The xou kö. Maine nyipici laka, hnei epun hna kuca la itre ngazo cili, ngo the trotriji Iehova pi kö. Nyihlue i nyidrëti jë hnene la hni ka pexej. 21 The trotriji nyidrëti kö koi itre haze thoi, ka tha mele kö. Ke thatreine kö angatr amele epun, ke ume idrola lai ka pë alien. 22 Pine la ëje i Iehova ka hmitrötr, tha tro kö nyidrëti a nuaxöji epun. Ase hë Iehova mekun troa ië epun nyine nöj i nyidrë. 23 Nge ame pena ni, thatreine kö ni mekun troa tha thithi sai epun, wanga ngazo jë ni koi Iehova. Tro pala hi ni a ini epun la gojenyi ka loi, me ka meköt. 24 Nge ame epun, xoue Iehova jë. Nge huliwa nyipici jë koi nyidrë qa kuhu hni, ke tha ewekë ka co kö la hnei nyidrëti hna kuca koi epun. 25 Ngo e traqa kö epun kuca catrëne la ngazo, tro ha apatrenyi epun, epun me joxu i epun.”