Pane Tus Samuela

15 Öni Samuela jë hi koi Saulo: “Eni la hnei Iehova hna up, troa acili joxu eö hui Isaraela nöje i nyidrë. Matre drenge ju la itre trengewekë i Iehova. 2 Hane hi la hna qaja hnei Iehova, Joxu ne la itre trongene isi e hnengödrai: ‘Tro ni a të koi angetre Amaleka, ke hnei angatr hna isi me Isaraela, lo Isaraela a tro qaa Aigupito. 3 Enehila, tro jë troa humuthi angetre Amaleka. Qa i eö troa apatrenyi angatr asë, me itre ewekë i angatr asë. Tha tro kö eö a nuamelene* la ketre, tro eö a humuthi angatr asë. Itre trahmanyi me föe, ha nekönatr me medreng, nge uti fe hë la itre kau, me itre mamoe, me itre kamela, me itre boliko i angatr.’” 4 E cili Saulo a hëne jë la itre soce i angeic, nge angeic a e jë la etru i angatr e Telaim. Qa ngöne la tribu i Iudra, ala 10 000, nge qa ngöne la itre xa tribu ne Isaraela, ala 200 000 ka trongë ihnadro.

5 Ame hnei Saulo hna easenyine la traon ne Amaleka, nge angeic a zae ju ngöne la itre hnathup troa lepi angatr. 6 Ngo öni angeic koi angetre Keni: “Ananyine pi la angetre Amaleka, matre tha tro kö ni a ce apatrenyi epun me angatr. Ke hnei epun hna amamane la ihnimi nyipici i epun koi angetre Isaraela, lo angatr a tro qa Aigupito.” Ame hnei angetre Keni hna ananyine la angetre Amaleka. 7 Thupene lai, Saulo a lepi angetre Amaleka jë, qaan e Havila uti hë Sura, ezine Aigupito. 8 Angeic a othi Agaga jë, joxu ne Amaleka. Ngo ame la itre atrene la nöj, hnei angeic hna humuthi angatr asë hnei taua. 9 Ngo hnei Saulo me itre soce i angeic hna nue* Agaga troa mel, me itre öni ka mingöming, me itre mamoe, me itre kau, me itre öni ka giris, me itre nani trahmany, me nöjei ewekë ka lolo. Xele kö angatr ma apatrene la itre ewekë cili. Ngo ame la itre ewekë ka pë eloin, nge hnei angatr hna xele ma wang, celë hi hnei angatr hna apatren.

10 Öni Iehova jë hi koi Samuela: 11 “Epi a tha* ië Saulo ju ni troa joxu, ke hnei angeic hna trotriji ni, me tha trongëne la itre hnenge hna amekötin.” Hace ju hi la hni Samuela, matre angeic a iele Iehova jë jidri ka pexej. 12 E hmahmakany, hnei Samuela hna canga ihlë troa wai Saulo. Ngo öni ketre jë hi: “Qa i Saulo Karemela, nge hnei angeic hna acile la ketre sine feni nyine atrunyi angeic. Nge hnei angeic hna tro hmaca pi a tro Gilegala.” 13 Matre ame la Samuela a öhnyi Saulo, öni Saulo: “Epi tro Iehova a amanathithi nyipë. Ase hë ni kuca la hna amekötin hnei Iehova.” 14 Ngo öni Samuela jë hi: “Nga hnauëne la eni a drenge la itre mamoe me kau a ho?” 15 Matre öni Saulo: “Hna xome itre ej qaathei angetre Amaleka, ke hnime pala ha itre soc la itre mamoe me kau ka mingöming, nyine huujëne koi Iehova, Akötresi nyipë. Ngo ame la munën, hne huni hna apatren asë.” 16 Ame hnei Samuela hna hape: “Loi ju hë! Drenge ju la hnei Iehova hna qaja koi ni ngöne la jidr.” Nge öni Saulo: “Qaja jë!”

17 Öni Samuela: “Ame lo kola acili eö troa joxu ne la itre tribu ne Isaraela, nge kola ië eö hnei Iehova troa joxu i Isaraela, eö lo a wai eö ceitu me atr ka pë pengön. 18 Nge e thupen, hnei Iehova hna upi eö me hape, ‘Tro jë troa humuthi angetre Amaleka, ke nyimutre la itre ngazo i angatr. Humuthi angatre jë, uti hë la troa apatrenyi angatr asë.’ 19 Matre hnauëne laka, tha drei Iehova kö hnei eö? Hnauëne laka, hnei eö hna piin me saqe xome la itre ewekë ka lolo, me ngazo koi Iehova?”

20 Ngo hnei Saulo hna sa koi Samuela ka hape: “Hnenge hna drei Iehova! Hnenge hna tro troa kuca la hna upi ni hnei Iehova. Nge nyipici laka, hnenge hna bëeke sai Agaga joxu ne Amaleka, ngo ame la angetre Amaleka, ase hë ni humuthi angatr asë. 21 Nge ame la itre ewekë hna thapa, itre soc la ka xome la itre mamoe me kau ka mingöming. Nge hna xom nyine huuj, koi Iehova Akötresi nyipë e Gilegala.”

22 Qa ngöne lai öni Samuela: “Ngo nemene la ka tru koi Iehova? Itre huuj ne dreuth asë me itre xa huuj, maine troa kuca la hna qaja hnei Iehova? Dreng! Ka nyipiewekë kö la idrengethenge hune la huuj. Nge nyipiewekë kö troa idrei, hune la troa huhajine la giris ne la itre mamoe trahmany. 23 Ame la troa catre që, ceitune hi lai me kuci iöni. Nge ame la troa pi tru, ceitune hi lai me kuci haze me thili koi idrola. Nge pine laka, hnei eö hna trije la trengewekë i Iehova, nyidrëti fe a triji eö, nge tha tro hmaca kö eö a joxu.”

24 Öni Saulo jë hi koi Samuela: “Ase hë ni ngazo koi Iehova, ke tha trongëne kö ni la hna qaja hnei Iehova me nyipë, hnenge hna xouene la itre soceng, matre hnenge hna kei thenge la mekuna i angatr. 25 Ngo enehila, pane nue pi la ngazong, nge ce tro jë me eni troa thili qëmeke i Iehova.” 26 Ngo sa jë hi Samuela ka hape: “Tha tro kö ni a ce tro me eö, ke hnei eö hna trije la trengewekë i Iehova, nge hnei Iehova hna triji eö. Tha tro hmaca kö eö a joxu ne Isaraela.” 27 Ngo ame hë la Samuela a tha ujë me tro, canga ea ju hi Saulo la pune iheetre ka qea nge ka pë imen i nyidrë, ngo zezenyi pi hi. 28 Matre öni Samuela: “Enehila, ase hë Iehova thapa qaathei eö la mus e Isaraela. Nge tro nyidrëti a hamëne kowe la ketre atr ka sisitria kö hui eö. 29 Nge ame la Akötresi Isaraela ka lolo, thatreine kö nyidrë thoi, nge tha tro kö nyidrëti a saze mekun.* Ke tha ketre atr kö nyidrë matre troa saze mekun.”

30 Öni Saulo jë hi: “Ase hë ni ngazo, ngo, pane atrunyi ni pi qëmekene la itre qatr ne la nöjeng, me qëmekene la nöje Isaraela. Trohemi me eni, nge tro ni a sa iwatingöneca qëmeke i Iehova, Akötresi nyipë.” 31 Samuela a tro ju me Saulo, nge Saulo a sa iwatingöneca pi qëmeke i Iehova. 32 Thupene lai öni Samuela: “Traqa sai Agaga pi koi ni, lo joxu i angetre Amaleka.” Nge Agaga a acatreihni* troa tro koi Samuela, ke ase hë angeic mekun ka hape: “Tha tro hmaca kö a humuthi ni.” 33 Ngo öni Samuela: “Ala nyimu la itre föe ka pë nekön hnene la taua i eö, ngo enehila, thine i eö la ka troa latresi catr hune la nöjei föe.” Ame hnei Samuela hna humuthi Agaga qëmeke i Iehova, e Gilegala.

34 Nge Samuela a tro ju kowe la hnalapa i angeic e Rama, nge Saulo e Gibea. 35 Uti hë la Samuela a mec, tha iöhnyi hmaca kö angeic me Saulo, ke akötre catre la hni angeic pi Saulo. Nge Iehova a hacene la hna ië Saulo troa joxu ne Isaraela.