Deuteronomi
15 “Ame e nöjei 7 lao macatre, tro eö a nue la gufa ne la atre lapa ezi ö. 2 Hane hi la aqane troa nue gufa: Tro la atre hamë gufa a nue la gufa ne la atre lapa ezi angeic. Nge tha tro kö angeic a ielene* la atre lapa ezi angeic, maine trejine me angeic troa ti gufa. Ke tro ha nue la gufa matre atrunyi Iehova. 3 Ngo ijiji ö pe troa ielene la trenyiwa troa të la gufa i angeic, ngo tha tro kö eö a ielene la trejine me eö. 4 Ame pe, tha tro kö la ketre atr thei ö a pë ewekë, ke tro Iehova a amanathithi ö ngöne la nöj hnei Iehova Akötresi ö hna hamën nyine edrö i ö. 5 Tro nyidrëti a kuca lai, e hnei ö hna pane drengethenge Iehova Akötresi ö, me thupëne la wathebo hnenge hna ahnithe koi ö ngöne la drai ce. 6 Ke tro kö Iehova Akötresi ö a amanathithi ö, tune lo hnei nyidrëti hna sisiny. Nge tro hë la itre nöj a sipo mani koi ö, ngo tha nyipiewekë kö tro eö a sipo mani koi angatr. Nge tro hë eö a musinëne la itre nöj, ngo tha tro kö angatr a musinë eö.
7 “Maine tro la ketre trejine me eö a pë ewekë ngöne la ketre traon hnei Iehova Akötresi ö hna hamë eö, the thinge kö la hni i ö, nge the sawa kö la ime i ö troa xatuane la trejin me eö ka pë ewekë. 8 Qa i ö pe troa saath aqeane la ime i ö me hamën qa kuhu hni, la nöjei ewekë hnei angeice hna ajan maine ka pë thei angeic. 9 Ngo wange kö, wanga cia jë e kuhu hni i ö la mekun ka ngazo celë: ‘Easenyi hë la hna 7 ne macatre, lo macatre ne nue la itre gufa,’ ke tro lai a sewe eö troa xatuane la trejin me eö ka pë ewekë. Nge zö i ö e tro angeic a treije koi Iehova. 10 Qa i ö troa hamën atrun, nge tha tro kö eö a hace fë, ke tro hë Iehova Akötresi ö a amanathithi ö ngöne la nöjei huliwa i ö asë, me nöjei ewekë hnei ö hna mekun troa kuca. 11 Pine laka, tro pala hi a hetre atr ka pë ewekë ngöne la nöj, matre eni a amekötine koi ö ka hape: ‘Qa i ö troa saath aqean la ime i ö matre xatuane la trejin me eö ka akötr, nge ka pë ewekë ngöne la nöj.’
12 “Maine hnene la ketre trejin me eö, ketre atre Heberu, hna salemë angeice koi ö, me nyihlue i ö koi 6 lao macatre, qa i ö troa nue angeice hmaca ngöne la hna 7 ne macatre. 13 Nge ame hë la eö a troa nue angeic, the nue angeice kö troa tro tune hi lai. 14 Qa i ö pe troa hamën atrun la itre ewekë qa ngöne la itre si i ö, me hna lepe qitre i ö, me hna weje wene vine me oele i ö. Tro eö a hamën thenge la hnei Iehova Akötresi ö hna amanathithi ö. 15 Nge the thëthëhmine kö laka, eö ekö la ketre hlu e Aigupito, nge hnei Iehova Akötresi ö hna itö eö. Celë hi kepin matre, eni a upi ö troa kuca la ewekë cili ngöne la drai ce.
16 “Ngo maine tro angeic a qaja ka hape: ‘Xele ni ma trotriji nyipë!,’ ke angeic a hnimi ö me fami i ö, nge ka lolo hi la mele i angeic thei ö, 17 haawe, tro hë eö a xome la nyine thin, me kuje la hnangenyë i angeic ngöne la qëhnelö, matre tro angeic a nyihlue i ö epine palua. Nge tro fe eö a hane kuca tune lai kowe la hlue i ö föe. 18 Ngo maine tro eö a nue la hlue i ö, nge angeic a trotriji ö, the dreng akötrëne kö, ke ceitune hi lo 6 lao macatre hnei angeic hna huliwa koi ö, memine la kola alua nyithupene la atre huliwa. Nge ase hë Iehova Akötresi ö amanathithi ö ngöne la nöjei huliwa hna kuca ha.
19 “Qa i ö troa ahmitrötrëne* koi Iehova Akötresi ö, la nöjei pane öni trahmany hna hnahon qa ngöne la itre öni ka tru* me itre öni ka co i ö. Qa ngöne la itre öni ka tru i ö, tha tro kö eö a huliwane la itre pane öni hna hnahon. Nge qa ngöne la itre öni ka co i ö, tha tro kö eö a xötre pene la itre pane öni hna hnahon. 20 E nöjei macatre, tro eö me fami i ö a öni itre ej qëmekei Iehova Akötresi ö, ngöne la götran hnei Iehova hna troa iën. 21 Ngo maine ka hetre ethane la öni (maine ka peje ca, maine ka timek, maine ka hetre mec ka ngazo catr), tha tro kö eö a huujën koi Iehova Akötresi ö. 22 Tro pe eö a öni la öni cili ngöne la itre traone* i ö. Nge ijije fe troa öni hnene la atr ka pui loi memine la ka pui ngazo, tune la kola öni drube. 23 Ame pe, tha tro kö eö a öni madra, ngo qa i ö pe troa anenin e kuhu hnadro, tune la tim.