Pane Tus Samuela
28 Ngöne la ijine cili, angetre Filisiti a hëne jë la trongene isi angatr troa isi me Isaraela. Ame hnei Akisa hna qaja koi Dravita ka hape: “Atre hnyawa hi eö ka hape, tro eö me itre soce i eö a ce me eni ngöne isi.” 2 Sa jë hi Dravita ka hape: “Eni la hlue i nyipë, nge atre kö nyipë la hnenge hna troa kuca.” Öni Akisa jë hi: “Öö, nga tro pala hi eö a thupëne la meleng.”*
3 Meci hë Samuela, matre Isaraela asë a treije pi angeic, me kelemi angeic e Rama, lo zi angeic. Ngo ame Saulo, hnei nyidrë hna apatren ngöne la nöj la itre ka ithanata me itre ka mec, me itre ka qajaqaja la drai elany.
4 Itre soce i Filisiti a acile jë la lapa i angatr e Sunema. Nge ame Saulo, hnei nyidrë hna acasine la nöjei soc ne Isaraela, me acile la lapa i angatr e Gileboa. 5 Matre ame hë la Saulo a öhne la lapa i angetre Filisiti, xou nyidrëti ju hi, nge manomano catre jë hi la wenethëhmi i nyidrë. 6 Nyidrë a anyimua hnyinge jë koi Iehova, ngo tha sa kö Iehova. Tha sa kö nyidrë jëne pu, maine Urim,* maine jëne perofeta. 7 Thupene lai, öni Saulo jë hi kowe la itre hlue i nyidrë ka hape: “Thele jë la ketre ka ithanata me itre ka mec, matre tro ni a wai angeic.” Sa jë hi angatre ka hape: “Hetre ka ithanata me itre ka mec e Eni-Dora.”
8 Ame hnei Saulo hna saze iheetr, matre tha tro kö a wangatrehmekunyi nyidrë. Nge e jidr, nyidrë a ce tro ju memine la lue atre i nyidrë kowe la föe cili. Öni Saulo: “Pane huliwane jë la mene i nyipo, matre ithanata me itre ka mec me qaja la drai elany, nge hnyinge jë kowe la atr hnenge hna troa qaja koi nyipo.” 9 Ngo önine lai föe: “Atre hi eö ka hape, hnei Saulo hna apatrene la itre ka ithanata me itre ka mec, me itre ka qajaqaja la drai elany. Matre hnauëne la eö a thele troa tra thethi ni? Eö a thele troa humuthi ni?” 10 Ame hnei Saulo hna sisinyi ngöne la ëje i Iehova me hape: “Qëmeke i Iehova Akötresie ka mel, pëkö ka troa traqa koi nyipo pine la ewekë celë!” 11 Önine la föe ka hape: “Drei la hnenge hna troa hën koi ö?” Sa jë hi nyidrë ka hape: “Samuela.” 12 Matre ame hë la eahlo a öhnyi Samuela,* sue catre jë hi eahlo, me hape: “Hnauëne la nyipëti a trane la heng? Saulo hi nyipë!” 13 Öni Saulo joxu: “The xou kö, qaja jë pe la hnei nyipoti hna goeën.” Matre öni eahlo: “Eni a goeëne la ketre atr kösë haze, nge ka elë qa kuhu hnadro.” 14 Thupene lai, öni Saulo: “Ka tune kaa nyidrë?” Sa jë hi eahlo ka hape: “Öhne hi ni la ketre qatr ka heetrë iheetr ka qea nge ka pë imen.” Haawe, trotrohnine ju hi Saulo laka, “Samuela hi”, matre nyidrë a sa iwatingöneca ju, me thil.
15 Thupene lai, öni “Samuela” koi Saulo: “Hnauëne la eö a ajolë ni? Nge hnauëne la eö a hë ni?” Sa jë hi Saulo ka hape: “Jole hë ni la, angetre Filisiti a isi me eni, nge tha ce Akötresieti hmaca kö me eni. Nge goi xele fe nyidrë ma sa koi ni jëne pu, maine jëne itre perofeta. Celë hi matre eni a hë nyipë, matre tro nyipëti a qaja la nyine tro ni a kuca.”
16 “Samuela” a hnyingë Saulo ka hape: “Hnauëne la eö a hnyinge koi ni, nge tha ce Iehova hmaca kö me eö, nge ithupëjia ha nyidrë me eö? 17 Tro Iehova a eatrëne la hnenge hna qaja koi eö. Nge tro Iehova a thapa la baselaia qaathei eö, me hamëne kowe la ketre atr, Dravita. 18 Tha drengethenge Iehova kö eö. Nge tha apatrene kö eö la angetre Amaleka, lo itre ka amejëne la trenge hni i nyidrë. Hane hi lai kepin matre Iehova a ujë tune lai koi eö. 19 Ketre, tro Iehova a nue eö me angetre Isaraela koi angetre Filisiti, nge elany, tro eö me itre nekö i eö a ce me eni. Tro fe Iehova a nue la itre soce i Isaraela koi angetre Filisiti.”
20 Matre ame hë la Saulo a drenge la hna qaja hnei “Samuela,” xou catre ju hi Saulo, nge nyidrë a kei pi, me meköl e kuhu hnadro. Pëhë trengecatre i nyidrë, ke hnei nyidrë hna tha xen e lai me jidr. 21 Nge hnene lai föe hna easenyi Saulo, nge öhne ju hi eahlo laka, jole hnyawa ha nyidrë, matre öni eahlo: “Ase hë ni nue mel troa kuca la aja i nyipë. 22 Ngo enehila, pane dreng, tro ni a hamë nyipë la ketre sine falawa, nge tro nyipëti a xen, matre hetre trengecatre i nyipë göi gojeny.” 23 Ngo xele kö Saulo, öni nyidrë: “Tha tro kö ni a xen.” Ngo kolo pala hi a catre fë hnene la itre hlu memine la föe, matre Saulo a drei angatre ju, me mejë, me lapa të hune ili. 24 Nge hnene lai föe hna canga humuthe* la si eahlo, ketre neköi kau. Thupene lai, eahlo a xome pi la farin, me xupexupe la farin hna ce lomën me tim, nge eahlo a sane jë la falawa ka pë leven. 25 Eahlo a hamëne pi koi Saulo me itre hlue i nyidrë. Nge angatr a xeni ju, me tro hmaca ngöne la jidri cili.