Pane Tus i Aqane Lapa Itre Joxu
16 Hna traqa fë la Pua ne la nyipi Akötresie, me amë hnine la itat hnei Dravita hna acil thatraqan ej. Nge hna tro fë la itre huuj ne dreuth asë, me itre huuj ne tingeting qëmekene la nyipi Akötresie. 2 Thupene la hna tro fë huuj ne dreuth asë, me itre huuj ne tingeting, Dravita a amanathithine ju la nöj ngöne la ëje i Iehova. 3 Nge hnei nyidrëti hna isa hamën kowe la angetre Isaraela, trahmanyi me föe, la falawa ka raon, me ca gato hna kuca hnei wene pama, me ca gato vin* ka qaqacil. 4 Nge Dravita a iëne jë la itre xa atre Levi, matre tro angatr a huliwa qëmekene la pua i Iehova, me atrunyi* Iehova Akötresi Isaraela, me olene koi nyidrë, me atrunyi nyidrë. 5 Asafa la tan, nge Zakaria la ka xatua angeic. Nge ame Ieiela, me Semiramoth, me Iehiela, me Matathia, me Eliaba, me Benaia, me Obed-edoma, me Ieiela, angatr a elone la itre nyine elo miuzik ka hetre filen, me arp. Nge Asafa a lepe sëbal. 6 Nge ame la lue atre huuj, Benaia me Iaziela, nyidroti a ufi trutru lapaa qëmekene la pua ne isisinyikeu ne la nyipi Akötresie.
7 Ngöne la drai cili, hnei Dravita hna xötrei sili nyima nyine olene koi Iehova, me hamën koi Asa me itre trejin me angeic. Kola hape:
8 “Olene jë koi Iehova, atrune* jë la ëje i nyidrë,
Qa ngöne la itre nöj, amamane jë la itre huliwa atraqatr i nyidrë!
9 Nyima jë koi nyidrë, itre nyima* ne atrunyi nyidrë,
mekune* jë la itre huliwa ka draië i nyidrë.
10 Selëne jë la ëje i nyidrë ka hmitrötr.
Epi madrin la hni ne la itretre thele Iehova.
11 Thele Iehova jë me trengecatre i nyidrë.
The mano kö thele ixatua* thei nyidrë.
12 Mekune kö itre huliwa ka draië i nyidrë,
me itre iamamanyikeu me itre iameköti hnei nyidrëti hna acil
13 Nyipunie itre nekö i Isaraela, itre hlue i nyidrë;
Nyipunie itre nekö i Iakobo, itre hna iën hnei nyidrë.
14 Nyidrëti hi Iehova Akötresi së.
Kowe la fen asë la itre iameköti nyidrë.
15 Mekune paluane jë la isisinyikeu i nyidrë,
Koi 1000 lao xötr atr lo hnei nyidrëti hna sisiny,*
16 Isisinyikeu me Aberahama
me ewekë hna sisinyi koi Isaaka,
17 lo hna ahnithe fe kösë wathebo koi Iakobo,
isisinyikeu lai ka cile hut me Isaraela,
18 lo öni nyidrë: ‘Tro ni a hamë eö la nöje Kanana,
Edrö i ö hë lai.’
19 Tha ala nyimu kö angatre lo,
Nyipici, xalaithe hi angatr nge trenyiwa angatr ngöne la nöj.
20 Angatr a feke trootro koi itre nöje,
qaane la ketre baselaia kowe la ketre nöj.
21 Tha nue kö nyidrë la ketre atr troa akötrë angatr,
nge pi angatr, hnei nyidrëti hna wesitrëne la itre joxu,
22 me hape: ‘The ketre kö la itre hnenge hna iën.
Nge the akötrëne kö la itre perofetang.’
23 Nyima jë koi Iehova nyipunie, itre atrene la fen asë!
O drai, qaja trongëne jë la iamele i nyidrë!
24 Atrune jë la lolo i nyidrë nyipine la itre nöj
Me itre huliwa i nyidrë ka draië nyipine la nöjei nöj.
25 Iehova la ka draië catr nge nyine selën.
Hna xouene* hune la nöjei haze asë.
26 Haze ka pë pengöne la itre haze ne la itre nöj
Ngo Iehova hi la atre xupe la hnengödrai.
27 Thei nyidrë la lolo me mingöming
Nge hnine la hnalapa i nyidrë la men me madrin.
28 Hamë Iehova jë la ewekë i nyidrë, nyipunie itre fami ne la itre nöj.
Hamë Iehova jë la ewekë i nyidrë, ke ka draië nyidrë nge trene men.
29 Atrune jë la ëje ka draië i Iehova,
traqa fë ahnahna jë, nge tro jë koi nyidrë,
thili ju qëmeke i Iehova memine la itre iheetr ka hmitrötr.*
30 Hmengöhmengöne jë qëmeke i nyidrë, nyipunie itre atrene la fen asë!
Hna acatrene la ihnadro, nge pëkö ka atreine enienijën.
31 Madrine jë hnengödrai, nge epi madrine jë la ihnadro,
qaja ju nyipine la itre nöj: ‘Joxu hë Iehova!’
32 Epi nyi mejene jë la hnagejë me nöjei alien ej,
nge epi madrine jë la itre hlapa me itre ka lapan ej.
33 Nge epi sue madrine jë itre sinöe ne hnitr qëmeke i Iehova,
ke nyidrëti a traqa* troa amekötine la fen.
34 Ole Iehova jë, ke ka loi hni nyidrë,
nge ka cile hut la ihnimi nyipici i nyidrë.
35 Hape jë: ‘Amele huni jë Akötresie atre amele hun,
acasi huni jë, nge amele huni pi qaathene la itre nöj,
matre tro huni a atrune la ëje i nyipë,
me madrine troa atrunyi nyipë.
Matre önine la nöj asë ka hape: “Amen!”* Nge angatr asë a atrunyi Iehova jë.
37 Ame hnei Dravita hna nue Asafa me itre atrene la fami angeic, qëmekene la Pua ne isisinyikeu i Iehova, matre tro pala hi angatr a huliwa o drai qëmekene la Pua, thenge la ketre porogaram hna athip. 38 Dravita a acili Obed-edoma ju, me itre trahmany ne la fami angeic, ala 68 angatr, me Obed-edoma nekö i Ieduthun me Hosa, itre ka thupë qëhnelö lai. 39 Nge hnei nyidrë hna ami Zadoka, me itre xa atre huuj ka ce huliwa me angeic, qëmekene la uma maano i Iehova, hune la hnë hmi gaa hmitrötr e Gibeona. 40 Hnëqa i angatr troa huuje lapaa koi Iehova, e nöjei hmakanyi me hej, hune la ita ne huujë itre huuj ne dreuth asë, me trongëne hnyawa la hna qaja hnine la Trenge Wathebo i Iehova, lo hna hamën koi Isaraela. 41 Ce angatr me Heman me Ieduthun, me itre xa hna iën, itre hna qeje ëjen göi troa olene koi Iehova, ke “ka cile hut la ihnimi nyipici i nyidrë.” 42 Hna acili Heman me Ieduthun troa ufi trutru, me lepe sëbal, me itre xa nyine elo miuzik hna huliwan nyine atrune* la nyipi Akötresie. Nge hnëqa ne la itre nekö i Ieduthun troa thupë qëhnelö. 43 Ame hnene la nöj asë hna isa bëeke koi hnalapan, nge Dravita a tro ju fe troa amanathithine la fami i nyidrë.