Hnaaluene Tusi Itre Joxu

14 Ngöne la kola lue macatre ne mus i Ioasa joxu ne Isaraela, nekö i Iehoaza, hna acili Amazia nekö i Ioasa troa joxu ne Iudra. 2 Traqa koi 25 lao macatre i nyidrë lo kola acili joxu nyidrë, nge hnei nyidrëti hna mus e Ierusalema koi 29 lao macatre. Iehoadana la ëjene la thine i nyidrë, nge atre Ierusalema eahlo. 3 Amazia a kuca la loi koi Iehova, ngo tha tui Dravita kö qaaqaa i nyidrë. Hnei nyidrëti hna nyitipun asë la hna kuca hnei Ioasa keme i nyidrë. 4 Ngo tha hna apatrene kö la itre hnë hmi gaa hmitrötr qa ngöne la nöj, nge itre atrene la nöje pala kö a tro fë huuj e cili, me huhajine la itre huuje i angatr. 5 Nge thupene la nyidrëti ase acatrene la mus i nyidrë, hnei nyidrëti hna humuthe la itre hlue ka humuthe lo keme i nyidrë. 6 Ngo tha humuthe kö nyidrë la itre nekö ne la itre hlu, thenge lo hna amekötin hnei Iehova hnine la Trenge Wathebo i Mose, lo hna hape: “Tha tro kö a humuthe la itre kem, pine la ngazo ne la itre nekön. Nge tha tro kö a humuthe la itre nekön, pine la ngazo ne la itre kem. Ngo tro pe a humuthe la atr, pine la sipu ngazo i angeic.” 7 Nge hnei Amazia hna ngaane la angetre Edoma ngöne la hnathupe Sotr, me humuthe la ala 10 000. Ngöne la isi cili, hnei nyidrë hna thapa la traone Sela. Nge qane ju hi lai, hna hëne la traon cili ka hape, Iokethela.

8 Thupene lai, hnei Amazia hna iupi fë maca koi Ioasa, nekö i Iehoaza, nekö i Iehu joxu ne Isaraela, me hape: “Trohemi ma tro nyiso a pane isi.”* 9 Ame hnei Ioasa joxu ne Isaraela, hna iupi fë la maca celë koi Amazia joxu ne Iudra, me hape: “Hnene la feja ka ithiny ne Lebanona, hna iupi fë maca kowe la arasi ne Lebanona me hape, ‘Hamëne pi la nekö i eö jajiny troa föene la neköng.’ Ngo hnene la öni wael ne Lebanona hna cili thenge, me waja fica la feja ka ithiny. 10 Nyipici, hnei eö hna ngaane la angetre Edoma, matre pi tru hë la hni eö. Haawe, madrine jë la aqane hune i eö, ngo lapa ju kö ngöne la nöje i eö.* Hnauëne laka, eö a pi hnëjin me kei, me huli Iudra troa ce kei me eö?” 11 Ngo xele kö Amazia ma drei Ioasa, matre hnei Ioasa joxu ne Isaraela, hna isi me Amazia joxu ne Iudra, e Bethe-semes e Iudra. 12 Hna ngaa Iudra hnei Isaraela, nge itre sooc i Iudra a kötre bëeke jë kowe la isa hnalapa* i angatr. 13 Nge e Bethe-semes, hnei Ioasa joxu ne Isaraela hna othi Amazia joxu ne Iudra, nekö i Ioasa, nekö i Ahazia. Thupene lai, hnei Ioasa hna tro e Ierusalema, me thë la ketre götrane la ihag, hna e la 400 kubit* la hna thë, qa ngöne la qëhnelö ne Eferaima, uti hë la qëhnelö ne la Kona. 14 Matre nyidrëti a eöth asë jë la gool, me sileva, me nöjei ewekë hnine la uma ne hmi Iehova, me itre trengamo hnine la hnalapa i joxu, me itre xa atr, nge nyidrëti a bëeke hmaca jë a tro Samaria.

15 Nge ame la mele i Ioasa me nöjei huliwa i nyidrë, me ecatre i nyidrë, me itre isi i nyidrë me Amazia joxu ne Iudra, hna fejan asë hnine la itre itus ne la mele ne la itre joxu ne Isaraela. 16 Nge hnei Ioasa hna meköl me itre qaaqaa i nyidrë ngöne la mec, nge hna kelemi nyidrë e Samaria me itre joxu ne Isaraela. Ame hna acili joxu Ieroboama* nekö i nyidrë, troa nyihna i nyidrë.

17 Nge ame Amazia joxu ne Iudra, lo nekö i Ioasa, hnei nyidrëti hmaca kö hna mel koi 15 lao macatre thupene la meci Ioasa joxu ne Isaraela, lo nekö i Iehoaza. 18 Nge ame la mele i Amazia, hna fejan asë hnine la itre itus ne la mele ne la itre joxu ne Iudra. 19 E thupen, hnei itre xan hna thele troa humuthi nyidrë e Ierusalema. Matre Amazia a kötre pi a tro Lakisa, ngo hna upe la itre trahmany troa huzu nyidrë, nge angatr a humuthi nyidrëti jë e Lakisa. 20 Thupene lai, hna bëeke fë la ngönetrei i nyidrë a tro Ierusalema, hune la ketre ikatr hna hul hnei hoos. Ame hna kelemi nyidrë me itre qaaqaa i nyidrë ngöne la Traon i Dravita. 21 Nge hnene la nöje Iudra asë hna acili joxu Azaria,* troa nyihna i Amazia keme i nyidrë. Nge ngöne la ijine cili, traqa koi 16 lao macatre i Azaria. 22 Nyidrëti hi lo ka xupe hmaca la traon ne Elath, me hamëne hmaca koi Iudra, thupene la kola mec hnei Amazia joxu,* me thupene la kola kelemi nyidrë me itre qaaqaa i nyidrë.

23 Nge ngöne la kola 15 lao macatre ne mus i Amazia joxu ne Iudra, nekö i Ioasa, hna acili joxu Ieroboama nekö i Ioasa joxu ne Isaraela. Hnei nyidrë hna musi koi 41 lao macatre e Samaria. 24 Nyidrëti a kuca la ngazo koi Iehova. Nge tha mano kö nyidrë kuca la itre ngazo hna kuca hnei Isaraela, fene lo musi Ieroboama nekö i Nebata. 25 Hnei nyidrëti hmaca hna acile la ifego qane Hamath uti hë la Hnagejë ne Araba,* tune lo aqane qaja i Iehova Akötresi Isaraela, jëne la perofeta ne Gatha-hefera, ene Iona nekö i Amitai. 26 Ke hnei Iehova hna öhne la etrune la akötre i Isaraela, nge pëkö ala casi ka atreine xatua Isaraela, nge goi pë fe thene la itre ka puafala, me ka co. 27 Ngo ase hë Iehova sisiny ka hape, tha tro kö nyidrë a apatren qa la fen la ëje i Isaraela. Matre nyidrëti a amele angetre Isaraela jë, jëne Ieroboama nekö i Ioasa.

28 Nge ame la mele i Ieroboama me nöjei huliwa i nyidrë, me ecatre i nyidrë, me itre isi i nyidrë, me aqane thepe Hamath me Damaseko, me hamëne hmaca koi Iudra e Isaraela, hna fejan asë hnine la itre itus ne la mele ne la itre joxu ne Isaraela. 29 Nge hnei Ieroboama hna meköl ngöne la mec me itre qaaqaa i nyidrë, itre joxu ne Isaraela. Ame hna acili joxu Zakaria nekö i nyidrë, troa nyihna i nyidrë.