Pane Tusi Itre Joxu
10 Hnene la joxu föe ne Sheba, hna drei mejene la aqane hlemu fë Solomona la ëje i Iehova. Matre eahlo a traqa pi troa tupathi Solomona hnei itre hnyinge* ka jol. 2 Hnei eahlo hna traqa e Ierusalema me nyimu hlu, me itre kamela ka thue la itre trengene oel ne göti, me nyimu gool, me itre etë ka tru thupen. Eahlo a lö jë koi Solomona me nyiqaane ithanatane la nöjei ewekë ka tru koi eahlo. 3 Nge hnei Solomona hna sa la nöjei hnyinge i eahlo, nge pëkö hnying ka jol* koi joxu, atreine hi Solomona qejepengön asë koi eahlo.
4 Öhne hi la joxu föe ne Sheba la inamacane i Solomona, me hnalapa i joxu hnei nyidrëti hna xup, 5 memine la xen hna hnëkën, memine la aqane alapane la itre atre i joxu ngöne la laulau, me aqane eli xen ne la itre hlue i nyidrë, me itre iheetr ne la itre hlu, me itre ka nei ime i joxu, me itre huuj ne dreuth asë hnei Solomona hna huujën hnine la uma ne hmi i Iehova. Matre ame la eahlo a öhne asë lai, goe ju pe hi eahlo.* 6 Öni eahlo jë hi koi joxu ka hape: “Nyipici asë hi la nöjei ewekë hnenge hna dreng ngöne la nöjeng, göne la itre huliwa* i nyipë, me inamacane i nyipë. 7 Tha jelenyipicine kö ni la hnenge hna drenge göi nyipë, uti hë la eni a traqa e celë, me sipu öhn. Ngo wamine hi la hna porotrikëne koi ni göne la inamacan me itre trengamo i nyipë, ke sisitria catre kö hune la hnenge hna dreng. 8 Manathithi ka tru kowe la itre atre i nyipë, me itre hlue i nyipë ka ce mel me nyipë, me drenge la itre trengewekë ka inamacane i nyipë. 9 Epi troa atrunyi Iehova Akötresi nyipë, atre alapa nyipë hune la therone i Isaraela, ke atraqatre la ihnimi nyidrëti koi nyipë. Ka epine palua la ihnimi Iehova koi Isaraela, celë hi matre nyidrëti a acili nyipë troa joxu, matre ameköti ewekë hnyawa, me mus thenge la meköt.”
10 Thupene lai, eahlo a hamëne pi koi joxu la 120 talane* gool, me itre trenge oel ne göti, me itre etë ka tru thupen. Qaane ju hi lai, pëkö ala cas ka hane traqa fë oel ne göti, tune la aqane kuca ne la joxu föe ne Sheba koi Solomona joxu.
11 Nge ame fe la itre he i Hirama ka bëeke qa Ofira, itre ej a traqa fë gool, me itre sinöe alemuga* ka nyimutre, me itre etë ka tru thupen. 12 Matre hnene la joxu hna xome la itre sinöe alemuga, troa kuci tan nyine sajuëne la uma ne hmi Iehova, me hnalapa i joxu, me itre arp, me itre nyine elo miuzik ka hetre fil, thatraqane la itre ka nyima. Qaane ju hi lai, tha hna hane kö öhn me traqa fë alemuga atruny hnine la traon.
13 Nge ame Solomona joxu, hnei nyidrëti hna hamëne kowe la joxu föe ne Sheba, la nöjei ewekë hnei eahlo hna ajan, me nöjei ewekë hnei eahlo hna sipon, me itre ewekë hnei Solomona hna nyi ahnahna* koi eahlo. Thupene lai, eahlo a ce bëeke jë me itre hlue i eahlo, kowe la nöje i eahlo.
14 E nöjei macatre, Solomona a kapa la 666 lao talane gool, 15 nge kolo hi lai a nyixane la hna hamën hnei itre ka saleme trootro, me itre xa ka salem, me nöjei joxu ne Arab, me itre gavena ne la nöj.
16 Hnei Solomona joxu hna kuca la 200 lao petr ka tru hnei gool hna ithuenyikön. (Troa 600 sekele* gool nyine pele goolëne la isa ca petr ka tru.) 17 Hnei joxu hna kuca fe la 300 lao neköi petr* gool hna ithuenyikön. (Troa köni mina* gool nyine pele goolëne la isa ca neköi petr.) Nge hnei joxu hna amë la itre neköi petr ka co, hnine la Hnalapa Ne La Hnaxulu Ne Lebanona.
18 Nge hnene la joxu hna kuca la ketre theron atraqatr, hna kuca hnei jiane elefa, nge nyidrëti a heetrën asë jë hnei nyipi gool. 19 Nge hetre eskalie ka sikisi lao nyine tro waja troa elë kowe la theron, nge hune la theron, hetre ketre ewekë ka raon, kösë neköi plafo. Nge ngöne la lue götrane la theron, hetre hnë ati im, nge kola lapa ezin la lue liona. 20 Nge ngöne la lue götrane la 6 lao nyine tro waja, hna isa amë la ca liona, matre kola e la 12 lao liona. Nge pëkö xa baselaia ka hetre theron tune la therone celë.
21 Nge ame la nöjei trepene iji i Solomona, hna kuca asë hi hnei gool. Nge ame la nöjei ewekë ne la Hnalapa Ne La Hnaxulu Ne Lebanona, hna kuca asë hi hnei nyipi gool. Pëkö ewekë sileva, ke ngöne la ijine i Solomona, hna wangacone la sileva. 22 Eje hi, hetre itre he i joxu e Tasesa, itre ej a ce xötr memine la itre he i Hirama joxu. Nge e nöjei köni macatre, itre he qa Tasesa a bëek nge ka tiqa hnei gool, me sileva, me jiane elefa, me cako, me tuki.*
23 Matre trenamo catre kö Solomona, nge inamacane kö nyidrë hune la itre joxu asë e cailo fen. 24 Itre atr qa ngöne la nöjei nöj a sipone troa lö* koi Solomona, matre drenge la inamacan hnei Akötresie hna hamë nyidrë. 25 Angatr a isa traqa fë ahnahna koi Solomona, itre ewekë sileva me gool, me itre iheetr, me itre jia ne isi, me oel ne göti, me itre hos, me itre miul. Itre ewekë lai ka traqa e nöjei macatre.
26 Kolo pala hi a kökötre la etrune la itre ikatr, me itre hos* i Solomona, matre traqa jë kö koi 1 400 lao ikatr, me 12 000 lao hos. Nyidrëti a pane amë ju la itre xan ngöne la itre traon ne ami ikatr, nge itre xan e Ierusalema, ezine la hnalapa i nyidrë.
27 Hnei Solomona hna kuca matre tiqa pi Ierusalema hnei sileva, kösë itre etë, nge tiqa pi hnei sinöe arasi, kösë sukamore ne Sefela.
28 Hnei Solomona hna itöne la itre hose i nyidrë qa Aigupito. Nge itre ka salem koi joxu a itöne la itro hos* kowe la ca thupen hna athip. 29 Nge ame la thupene la ca ikatr qa Aigupito, ke 600 lao pies sileva. Nge ame la thupene la ca hos, ke 150 lao pies sileva. Thupene lai, itre ka saleme koi joxu a salemëne hmaca pi kowe la itre joxu ne Heth, me Suria.