Isaia
19 Itre trengewekë göi Aigupito:
Goeën! Elë hë Iehova hune la iaw ka nyimenyim, nge traqa ha nyidrë e Aigupito.
Tro hë la itre haze ka pë men a hmengöhmengön qëmekei nyidrë,
Nge tro ha pë trengecatren* la angetre Aigupito.
2 “Tro ni a kuca matre tro la angetre Aigupito a icilekeu,
Nge tro angatr a itö isi, ene la trejin me ketre trejin
Me ketre atr me atre lapa ezi angeic,
Me ketre traon me ketre traon, me ketre baselaia me ketre baselaia.
3 Eje hi, tro ha amenune la mekuna ne la angetre Aigupito,
Nge tro ni a atriane la hnei angatr hna mekun troa kuca.
Tro hë angatr a thele la itre haze ka pë menen,
Memine la itre ka kuci haze, me itre ka ithanata me itre ka mec me itre ka qajaqaja la itre drai elany.
4 Tro ni a nue la angetre Aigupito kowe la imene la ketre maseta ka catr,
Nge tro la ketre joxu ka iaxösisi a musinë angatr,” öni Iehova lo nyipi joxu ne la itre trongene isi e hnengödrai.
5 Tro ha qaqacile la hnagejë,
Nge tro ha weliwel me pë alien la hneopegejë.
6 Nge tro ha punepune la itre hneopegejë;
Tro ha uti me qaqacil la itre jë i tim ne la hneopegejë Nil e Aigupito.
Tro ha hnyiqetr la itre rozo me itre hainy.
7 Tro ha fitr la hnënge haö ka cia ezine la Nil,
Me ngöne la hna itronyi hnene la tim me hnagejë, memine la itre hlapa ezine la Nil.
Tro ha ufetrij me apatren asë itre ej.
8 Nge tro ha awe la itre ka nyi ie,
Tro la itre ka hna eu ngöne la Nil a treije latresi,
Nge tha tro hmaca kö a tru hnei atr ka troa nue ifile ngöne la tim.
9 Tro ha hmahma la itre ka huliwan la lino hna sej
Memine la itre ka hu koto* ka wië.
10 Tro ha wajahuje la itre ka ca imaano;
Tro hë la itre ka huliwa a xomi akötr.
11 Hmo hë la itre tan ne Zoana.*
Ka tria la itre eamo hna hamën,
Hnene la itre atresi i Farao ka inamacan:
“Hnauëne la epuni a qaja koi Farao ka hape, eni la neköne la itre ka inamacan,
Me matrane la itre joxu ekö”?
12 Matre, ekaa la itre ka inamacane thei ö?
Haawe, hnyingë angatre jë, maine atre hi angatr la hnei Iehova joxu ne la itre trongene isi e hnengödrai, hna mekun troa kuca koi Aigupito.
13 Ka hmo la aqane ujë ne la itre tan ne Zoana;
Hnene la itre tan ne Nofi* hna sipu amenu angatre kö;*
Hnene la itre tan la itre tribu hna iaö Aigupito.
14 Ase hë Iehova amenu angeic;
Nge hnei angatre hna ajeanyi Aigupito ngöne la nöjei huliwa i angeic,
Matre ceitu i angeice hë me ketre atr ka ij nge ka tro zimo hune la hna hmitra.
15 Nge pëhë hna atreine kuca hnei Aigupito,
Ke thatreine kö la he i angeic, maine pun, maine ziin,* maine picine sinöe troa kuca la ketre ewekë.
16 Nge ngöne la drai cili, tro Aigupito a tune la itre föe ka hmengöhmengön hnei xou, hnene la ime ka catre i Iehova, joxu ne la itre trongene isi e hnengödrai. 17 Nge tro la angetre Aigupito a xouen la nöje Iudra. Nge tro hë angatr a xou la kola qeje angeic, pine la hnei Iehova, joxu ne la itre trongene isi e hnengödrai, hna axeciëne koi angatr.
18 Ngöne la drai cili, tro la 5 lao traon e Aigupito a qene Kanana,* me sisinyi troa mele nyipici koi Iehova joxu ne la itre trongene isi e hnengödrai. Nge tro ha ati ëjene la ketre traon ka hape, Traon hna troa apatren.
19 Ngöne la drai cili, troa hetre ita ne huuj koi Iehova nyipine la nöje Aigupito, memine la ketre ikapa koi Iehova ngöne la ifegon ej. 20 Nge celë hi nyine hatren me nyine anyipicin koi Iehova joxu ne la itre trongene isi e Aigupito. Tro hë angatr a sipo ixatua koi Iehova pine la itre ka iaxösisi, nge tro nyidrëti a upe la atre iamele koi angatr, ene la ketre atre iamele ka sisitria matre amele angatr. 21 Nge tro hë Iehova a iamamanyi kowe la angetre Aigupito, nge tro hë angatr a atre Iehova ngöne la ijine cili. Tro hë angatr a tro fë la itre huuj me itre ahnahna, me sisinyi koi Iehova me eatrën. 22 Nge tro hë Iehova a lepi Aigupito. Tro nyidrëti a lepi angatr me ameun la itre eatre i angatr. Nge tro hë angatr a bëeke koi Iehova, nge tro hë nyidrëti a sa la itre thithi angatr, me ameun la itre eatre i angatr.
23 Nge ame ngöne la ijine cili, troa hetre gojenyi ka tru qa Aigupito a tro Asuria. Tro hë la angetre Asuria a tro Aigupito, nge tro la angetre Aigupito a tro Asuria. Tro hë nyidroti a ce nyihlue i Akötresie. 24 Nge ngöne la drai cili, Isaraela la hnaakönin ka troa nyixane la nöje Aigupito me Asuria, nge ketre manathithi lai kowe la fene hnengödrai, 25 ke tro Iehova joxu ne la itre trongene isi e hnengödrai a amanathithi angatr me hape: “Epi troa manathith la nöjeng Aigupito, me Asuria lo huliwa ne la lue imeng, me Isaraela edröng!”