Daniela

6 Nge hnei Dariu hna mekun laka, loi e troa acile la 120 lao tane provës* ngöne la baselaia. 2 Hna acile la köni atr ka musi hui angatr asë, nge Daniela hi la ketre; nge tro la itre tane provës a kuci rapor göne troa thuemacane lai ala kön, matre troa thupëne la huliwa i joxu. 3 Ngo sisitria kö Daniela hune lo lue xan me itre tane provës, ke ka draië catre kö la mekuna i angeic. Nge aja i joxu tro angeic a mus hune la baselaia asë.

4 Ngöne la ijine cili, itre ka mus me itre tane provës a thele troa upezö Daniela, pine la aqane cilën angeic la itre huliwa i Mus.* Ngo pëkö hnei angatr hna öhn, ke tha ka huliwa thoi kö Daniela, ketre atr angeic nyine mejiune kow, nge ka huliwa hnyawa, nge ka tha qenatrekënö kö. 5 Matre öni angatre jë hi: “Pëkö nyine tro sa upezö Daniela, matre loi e tro pena sa thel ngöne la wathebo ne la Akötresi angeic.”

6 Ame hnene la itre ka mus me itre tane provës hna lö asë koi joxu, me hape: “Epi tro nyipëti a mele palua Dariu joxu. 7 Hnene asë hi la itre ka huliwa ngöne la hnanyijoxu, me itre ka isenyin, me itre tane provës, me itre ka huliwa i joxu, me itre gavena, hna ce ithanatan la ketre wathebo nyine tro joxu a acil: ngöne la 30 lao drai, maine tro la ketre atr a sipo kowe la ketre haze, maine kowe ketre atr pena, ngo tha koi nyipëti kö joxu, ke tro ha kuië angeic ngöne la hnaopë liona. 8 Ngo enehila joxu, epi tro nyipëti a anyipicin me sija la wathebo, matre tha tro kö a saze ej, thenge lo hna amekötin koi angetre Madai me Peresi laka, thatreine kö troa apën.”

9 Matre hnei Dariu hna sija la wathebo cili.

10 Ame ju hi la Daniela a dreng laka, ase hë sija la wathebo, angeic a bëeke ju kowe la hnalapa i angeic; nge hna fe la itre mamala ne la hnahage i angeic e koho hune uma, lo itre ka qëmek a tro Ierusalema. Nge tune lo hnei angeic hna majemine kuca, ene la troa akönia thith ngöne la drai, hnei Daniela hmaca hna sa iwatingöneca, me thith, me atrune la Akötresi angeic. 11 Ame hnene la itre atre cili hna aca tro lö thei Daniela, me öhnyi angeic e thithi kowe la Akötresi angeic, me xëwe koi nyidrë.

12 Matre hnei angatre hna tro ju koi joxu, me amekunë nyidrëti lo wathebo hnei nyidrëti hna acil me hape: “Hapeu joxu, tha hnei nyipëti kö lo hna wathebon koi 30 lao drai, troa sipo kowe la ketre haze maine ketre atre pena, ngo koi nyipëti hmekuje hi, wanga troa kuiëne la atr cili kowe la hnaopë liona ?” Öni joxu jë hi: “Eje hi, hna acile la wathebo cili thenge la hna amekötin koi angetre Madai me Peresi, lo hna thatreine apën.” 13 Matre canga öni angatre jë hi: “Joxu, tha hnei Daniela kö, lo ketre hna kötre fë qa Iudra, hna metrötrë nyipë me nyipiewekëne lo wathebo hnei nyipëti hna acil: angeice pe a akönia thith e nöjei drai.” 14 Matre ame ju hi la kola drenge lai hnei joxu, hace pi hi la hni i nyidrë, nge nyidrëti a thele ju la aqane troa amele Daniela; uti hë la kola lö la jö, hnei nyidrëti hna isin troa amele angeic. 15 Ame hnene hmaca lo itre atr cili hna ce lö koi joxu, me hape: “The thëthëhmine kö joxu laka, thenge la hna amekötin koi angetre Madai me Peresi, thatreine kö troa saze la ketre wathebo maine ketre hna amekötin hnei joxu.”

16 Matre hnene la joxu hna amekötin troa thei Daniela, me kuië angeic ngöne la hnaopë liona. Nge önine la joxu koi Daniela: “Tro kö a amele eö hnene la Akötresi ö hnei ö pala hi hna nyihluen.” 17 Thupene lai, hna traqa fë la ketre etë atraqatr troa thinge lai hnaop; ame hnene la joxu hna pelehatren ej hnene la otrene wanakoime i nyidrë, me otrene wanakoime ne la itre tane i nyidrë, matre tha tro kö a saze la ketre ewekë göi Daniela.

18 Nge hnene la joxu hna bëeke hmaca kowe la hnanyijoxu, me tha xen ngöne la jidri ka pexej, me thipëne la nöjei nyine iamadrinë;* nge goi thatreine fe nyidrëti meköl.* 19 Nge ame ju hi la kola kaqa ne lai, hnei joxu hna mejë me canga tro kowe la hnaopë liona. 20 Nge easenyi hë nyidrë kowe la hnaop, ame hnei nyidrëti hna hë treij koi Daniela me hape: “Daniela fe, hlue ne la Akötresie ka mel, hnene kö la Akötresie, hnei ö pala hi hna nyihluen, hna amele eö qaathene la itre liona?” 21 Nge canga öni Daniela jë hi koi joxu: “Epi tro nyipëti a mele palua joxu. 22 Hnene la Akötresing hna upe la angela i nyidrë troa thinge la që ne la itre liona. Pëkö hnei angatr hna kuca koi ni, ke pëkö ngazong qëmekei nyidrë; nge ketre pëkö ewekë ka ngazo hnenge hna kuca koi nyipë joxu.”

23 Ame hna elitrauje la madrine i joxu, nge hnei nyidrëti hna iup troa huli Daniela qa lai. Ame ju hi la kola elë sai Daniela, pëkö ca eatre i angeic, ke hnei angeic hna lapaun kowe la Akötresi i angeic.

24 Thupene lai, hnene la joxu hna iup troa traqa fë lo itre ka upezö* Daniela, me ce kuië angatr, me itre nekö i angatre trahmany, me itre föi angatr kowe la hnaopë liona. Tha traqa pala kö angatr e kuhu, nge itre liona fe hë a sesë koi angatr, me pelikacane la itre june i angatr.

25 Ame hnei Dariu joxu hna cinyany kowe la nöjei atr, me nöjei nöj, me itre ka qaja la itre xaa qene hlapa e cailo fen, ka hape: “Epi troa tiqa la tingetinge thei epun! 26 Eni hë la a amekötin kowe la nöjei götran ne la baselaiang laka, loi e troa hmengöhmengön hnei xou qëmeken la Akötresi Daniela. Ke nyidrëti hi la Akötresie ka mel, nge ka mel epine palua. Tha tro kö a apatrene la baselaia i nyidrë, nge ka epine palua la mus i nyidrë. 27 Nyidrëti a thapa, me amelen, me kuca la itre hatren, me itre iamamanyikeu ka tru e koho hnengödrai me e celë fen, nyidrëti hi lo ka thepe Daniela qa ngöne la ime ne la itre liona.”

28 Nge hnei Daniela hna trenamo ngöne la baselaia i Dariu, me ngöne la baselaia i Koreso atre Peresi.