Esodro

33 Nge öni Iehova hmaca jë hi koi Mose ka hape: “Tro jë qa la memine la nöj, lo hnei eö hna tro xom qa Aigupito. Tro jë kowe la nöj lo hnenge hna sisinyi koi Aberahama, me Isaaka, me Iakobo ka hape: “Tro ni a hamëne la nöje celë kowe la itre matra* i eö. 2 Tro ni a upe la ketre angela qëmeke i eö, nge tro ni a helëne la angetre Kanana, me Amora, me Heth, me Perizi, me Hivi, me Iebusi. 3 Tro jë kowe la nöj gaa neni gala hnei melek me miel, ngo tha tro kö ni a tro nyipi eö, ke nöje ka catre që* pala ha eö, wanga tro na apatrenyi eö e cahu gojeny.

4 Ame hë la nöj a drenge la itre ithanata ka catr celë, hace catr koi angatr, nge pëkö ala cas ka ami nyine thaip. 5 Öni Iehova koi Mose ka hape: “Qaja jë kowe la angetre Isaraela ka hape, ‘Nöje ka catre që* eö. Maine ju, ijijinge hi troa tro nyipi eö me aca apatrene triji eö. Haawe enehila, una pi la hnei ö hna thaip, nge treqene ju la ewekë hnenge hna troa kuca koi eö.’” 6 Matre qaane ju hi la wetr Horeba, pëkö* ca ka ami nyine thaip thene la angetre Isaraela.

7 Thupene lai, Mose a xome jë la itate i angeic, me tro ananyine la lapa me acile ej. Nge angeic a ati ëjene ju, itat ne icasikeu. Matre ame la nöjei atre ka ajane troa hnyinge koi Iehova, angatr a tro kowe la itat ne icasikeu, e tröne la lapa. 8 Ame ngöne la Mose a tro kowe la itat ne icasikeu, kola mejë hnene la nöj asë, nge angatr a isa cil ngöne la itre hnë lö ne la itre tate i angatr, me goeë Mose uti hë la angeic a lö hnine la itat. 9 Nge Mose petre hi a lö hnine la itat ne icasikeu, nge uti pi hi la iaw ka cile meköt ngöne la qëhnelö ne la itat. Nge ej a cil e cili uti hë la Akötresie a ase ithanata me Mose. 10 Nge ame la nöj a öhne la iaw ka cile meköt ngöne la hnë lö ne la itat ne icasikeu, angatr a isa thili ju ngöne la itre hnë lö ne la itre itat i angatr. 11 Iehova a ithanata meköti koi Mose, tune la ketre atr a ithanata koi ketre. Nge ame la Mose a bëeke kowe la lapa, lapa ju pe hi Iosua nekö i Nuna, lo atre xatua angeic ngöne la itat.

12 Matre öni Mose koi Iehova: “Öni nyipëti koi ni, ‘Tro jë a thenge la nöj,’ ngo tha ase kö nyipëti qaja koi ni la hnei nyipëti hna troa ce upe me eni. Ketre, öni nyipë, ‘Atre hnyawa ha ni la pengöi eö,* nge ase hë ni kepe eö.’ 13 Maine nyipici laka, ase hë nyipë kepe ni, eni a sipo nyipë, pane amamai ni jë la itre aqane ujë i nyipë, matre tro ni a atrepengöi nyipë, nge matre tro pala hi nyipë a kepe ni. Nge the thëthëhmine kö laka, ame la nöje ce, ke nöje i nyipëti lai.” 14 Matre öni nyidrë: “Tro ni* a ce tro me eö. Nge tro ni a hamë tingetinge koi eö.” 15 Nge öni Mose koi nyidrë ka hape: “Maine tha tro kö nyipëti a ce tro* me eahun, the upi huni kö qa la. 16 Troa atre tune kaa ka hape, ce ini me nyipë nge ce nyipë memine la nöje i nyipë? Maine, tha tro kö nyipëti a ce tro me eahun, tro ni me nöje i nyipë a isapengöne tune kaa memine la itre xa nöj e cailo fen?”

17 Öni Iehova koi Mose ka hape: “Tro ni a kapa la sipo i eö, ke ase hë ni kepe eö, nge atre hnyawa hi ni la pengö i eö.”* 18 Nge öni angeic: “Eni a sipo nyipë, pane amamai ni jë la elolo i nyipë.” 19 Matre öni nyidrë: “Tro ni a amamane qëmeke i eö la nöjei lolong, nge tro ni a qaja trongën qëmeke i eö la ëje i Iehova. Nge tro ni a hnime la hnenge hna ajane troa hnim, nge tro ni a utipine* la hnenge hna ajane troa utipin.” 20 Ngo öni nyidrëti pe: “Thatreine kö eö troa goeëne la iqëmekeng, ke pëkö atr ka atreine goeë ni, nge tro angeic a mel.”

21 Nge öni Iehova hmaca jë: “Hane hi la ketre götran ezing, cile ju hune la git. 22 Ame hë la kola mama la elolong, tro ni a xomi eö kowe la gaa kaqa ne la git, nge tro ni a juetrë eö hnene la imeng, uti hë la tro hmaca ni a tro. 23 Thupene lai, tro ni a hule la iwanakoimeng, nge tro eö a öhne la jung, ngo ame pë hë la iqëmekeng, thatreine kö troa goeën.”