Atre Cainöj

8 Drei la ka tune la atr ka inamacan? Nge drei la ka atre la nyin* la ketre jol? Kola melemele la iqëmek ne la ketre atr hnene la inamacane i angeic, matre tha calogitre hë.

2 Öning: “Drengethenge ju la hna amekötin hnei joxu, pine la isisinyikeu hna kuca me Akötresie. 3 The canga trotriji nyidrëti kö, nge the sajuëne kö la ewekë ka ngazo. Ke ijiji nyidrëti hi troa kuca la nöjei ewekë hnei nyidrëti hna ajan. 4 Ke musi kö la trengewekë i joxu. Nge drei la ka atreine qaja koi nyidrë ka hape: ‘Nyipëti a u?’”

5 Tha tro kö a traqa la ketre ewekë ka ngazo kowe la atre drengethenge la hna amekötin. Nge tro kö la hni ka inamacan a atre la ijin me aqan troa ujë.* 6 Ame göne la nöjei jol, hetre ijin me aqan* troa kuca. Ke tru catr la akötre ne la itre atr. 7 Pine laka, pëkö ka atre la ka troa traqa, drei la ka atreine qaja la aqane trongen?

8 Pine laka, pëkö atr ka atreine musinën me xom alapan la hnamano ne mel, ketre tun, pëkö atr ka atreine musinën la drai ne mec. Nge pine laka, pëkö atr ka atreine kötrene la isi, ketre tun, thatreine kö la itre atr ka kuca la ngazo troa neëne la mec.*

9 Hnenge hna öhn asë lai, nge hnene la hning hna waipengöne la itre ewekë hna kuca fene la jö, ngöne la ijine kola musi la atr hui itre xan, matre sipu akötrë angatre kö. 10 Nge hnenge hna öhne la kola keleme la itre atr ka iakötrë, lo itre ka lö me tro qa ngöne la götrane gaa hmitrötr, ngo hna canga thëthëhmi angatr ngöne la traone cili. Ketre ka gufa fe la ewekë cili.

11 Pine laka, tha hna canga hajine kö la aqane ujë ka ngazo, tha xou hë la hni ne la itre atr troa kuca la ngazo. 12 Ngacama a 100 lao kuca la ngazo hnene la ketre atr me mel aqeany, ngo atre hi ni laka, tro kö a tro loi la mele ne la itre ka xouene la nyipi Akötresie, ke angatr a xoue nyidrë. 13 Ngo tha tro kö a tro loi la mele ne la atr ka ngazo. Ceitune hi la itre drai i angeic memine la iahnu ka tha cile huti kö, ke tha angeice kö a xoue Akötresie.

14 Nge hane hi la ketre ewekë ka gufa* e celë fen: Hna xom la itre atr ka meköt ceitu me itre atr ka ngazo, me itre atr ka ngazo ceitu me itre ka kuca la meköt. Matre öning, ketre ka gufa fe lai.

15 Ame hnenge hna upe la atr troa madrin, ke pëkö xaa ewekë ka loi fene la jö hune la troa xeni me ij, me madrin. Itre ewekë lai nyine tro angeic a kuca, la angeic a huliwa catr ngöne la itre drai ne mele angeic, lo hna hamën hnene la nyipi Akötresie fene la jö.

16 Hnenge hna axeciën e kuhu hning troa thele la inamacan, me waipengöne la itre huliwa hna kuca e celë fen. Nge goi tha meköle fe ni e lai me jidr.* 17 Thupene lai, hnenge hna goeëne la nöjei huliwa ne la nyipi Akötresie, nge öhne ju hi ni laka, thatreine kö la itre atr troa trotrohnine la ka traqa fene la jö. Maine isine ju hë angatr troa trotrohnin, ngo thatreine pala hi angatr. Ngacama angatr a selëne la inamacane i angatr, ngo tha trotrohnine hnyawa kö angatr.