Itre Edromë
2 Neköng, maine tro eö a kapa madrine la itre trengewekëng
Me thupëne hnyawa la itre hnenge hna amekötin,
2 Ene la troa hnangenyën hnyawan la inamacan
Me fe la hni i ö matre atreine waiewekë;
3 Nge maine tro fe eö a hëne la inamacan
Me hë catr matre troa atreine waiewekë;
4 Maine tro pala hi ö a thele lai kösë sileva,
Me catre thel tune la itre trengamo hna juetrën;
5 Tro hë eö lai a trotrohnine la xoue Iehova,
Nge tro hë eö a atrehmekunyi Akötresie.
6 Ke Iehova kö la ka hamën la inamacan;
Qa ngöne la që i nyidrë la atrehmekun me atreine waiewekë.
7 Nyidrëti a amë hnyawane la inamacan thatraqan la itre ka meköt;
Nyidrëti la petr kowe la itre ka mele nyipici.
8 Nyidrëti a hmekën la itre jë ne la itre ka meköt,
Me thupëne la gojenyi ne la itre ka mele nyipici.
9 E cili, tro fe hë eö a trotrohnine la ka loi, me meköt, me ka ijij,
Tro hë eö a trotrohnine laka, nyipi gojenyi hi lai.
10 Maine tro la inamacan a lapan la hni i ö
Nge tro la atrehmekun a amadrinë eö,
11 Tro ha thupë eö hnene la atreine thele ewekë,
Me hmekë eö hnene la atreine waiewekë,
12 Matre thupë eö qa ngöne la jë ne ngazo,
Me qaathene la atre qaja la itre trengewekë ka iaö,
13 Me itre ka trotrije la gojeny ka meköt
Matre tro ngöne la itre hmene gojenyi gaa mit,
14 Me itre ka madrine troa kuca la ngazo,
Itre ka öhnyi madrine ngöne la iakötrë me ngazo,
15 Ka tro ngöne la itre hmene gojenyi ka qaliqali
Nge ka majemine juetrë thiina.
16 Tro ha thupë eö qaathene la föe ka nyiape menu,*
Me itre trengewekë ka iahmo* ne la föe ka kuci ngazo,*
17 Lo föe ka trotrije la ka föi angeic qaane lo angeic a nekö jajiny
Nge ka thëthëhmine la isisinyikeu ne la Akötresi angeic;
18 Ke kola uti la hnalapa i angeic kowe la mec,
Nge itre hmene gojeny i angeic a tro kowe la itre ka pë trengecatr ngöne la mec.
19 Pëkö ala cas thene la itre ka ce meköl* me angeic ka troa bëek,
Me öhne hmaca la itre gojenyi ne mel.
20 Haawe, xötrethengene jë la gojenyi ne la itre atr ka loi
Nge lapa ju ngöne la itre jë ne la itre ka meköt,
21 Ke tro hmekuje hi la itre atr ka meköt a lapane la ihnadro,
Nge tro hmekuje hi la itre atr ka mele nyipici* a lapan ej.