Hnaaluene Tus i Aqane Lapa Itre Joxu
30 Hnei Hezekia hna iupi fë maca koi Isaraela asë, me Iudra, me cinyianyi tus kowe la itre ka lapa e Eferaima me Manase, matre tro fe angatr a hane traqa kowe la uma ne hmi Iehova e Ierusalema, troa feetëne la Paseka koi Iehova Akötresi Isaraela. 2 Nge hnene la joxu me itre he ne nöj, memine la icasikeu asë e Ierusalema, hna mekune troa feetëne la Paseka ngöne la hnaluene treu, 3 ke tha hnei angatre ju kö hna feetën ngöne lo drai hna majemin. Eje hi, tha ijije kö la etrune la itre atre huuj ka ahmitrötrë angatr, nge tha hna icasikeu kö la nöj e Ierusalema. 4 Matre hnene la joxu memine la icasikeu asë hna mekune ka hape, ka loi la aqane kuca celë. 5 Angatr a ce axeciëne jë troa iupi fë maca ngöne la nöje Isaraela asë, qane Bere-seba uti hë Dana, matre tro la itre atren a traqa e Ierusalema troa feetëne la Paseka koi Iehova Akötresi Isaraela. Ke eje hi, tha hnei angatre kö hna ce feetëne la Paseka, tune lo hna amekötin hnene la Trenge Wathebo.
6 Ame hnene la itre ka tro fë maca* hna kuca la hna amekötin hnei joxu, me tro fë ngöne la nöje Isaraela asë me e Iudra asë, la itre tus ne la joxu me itre he ne nöj. Kola hape: “Angetre Isaraela fe, bëeke jë koi Iehova Akötresi Aberahama, me Isaaka me Isaraela, matre tro fe nyidrë a hane bëeke kowe la itre atrene la nöje së ka mele pe, itre ka mele pe qa ngöne la ime ne la itre joxu ne Asuria. 7 The tune kö la itre qaaqaa i epun, me itre trejin me epun, itre ka tha mele nyipici koi Iehova Akötresi ne la itre qaaqaa i angatr. Nge öhne hë epuni laka, hnei nyidrëti hna kuca matre, kola sisi angatr. 8 Haawe enehila, the catre he kö tune lo itre qaaqaa i epun, ngo drengethenge Iehova jë, nge trohemi kowe la uma ne hmi nyidrë, lo hnei nyidrëti hna ahmitrötrën paluan. Nge nyihlue i Iehova jë Akötresi epun, matre lapa kötre pi la trenge elëhni i nyidrë koi epun. 9 Nge e bëeke hë epun koi Iehova, tro la itre ka othe la itre trejin me epun, me itre nekö i epun a utipi angatr, me nue angatr troa bëeke kowe la nöje ce. Ke ka itrotrohni, nge ka iutipi Iehova Akötresi epun, matre tha tro kö nyidrëti a nue epun, e tro epuni a bëeke koi nyidrë.”
10 Matre hnene la itre ka tro fë maca hna tro ngöne la itre traone trootro ne la nöje Eferaima me Manase, nge uti fe hë e Zebulona. Ngo hnene pe la itre atr hna qenahmo angatr, me hnyimasai angatr. 11 Eloine pe, hnene la itre xan qa Asera me Manase, me Zebulona hna ipië, matre angatr a tro ju a tro Ierusalema. 12 Nge hnene la ime ne la nyipi Akötresie hna enijëne la hni ne la itre atre Iudra, matre tro angatr a cas,* me trongën la itre hna amekötin hnene la joxu me itre he ne nöj, thenge lo trengewekë i Iehova.
13 Hnene la ka ala nyimu hna icasikeu e Ierusalema troa feetëne la feet ne la Itre Falawa Ka Pë Levenen, hmekune la hnaaluene treu. Ala nyimu catre la itre ka traqa. 14 Angatr a nyiqaane huliwa jë, me apatrene la itre ita ne huuj e Ierusalema, me itre ita ne dreu ka pui loi, me trij ngöne la hnathup ne Kederon. 15 Thupene la hna 14 ne drai ne la hnaaluene treu, angatr a humuthe pi la itre öni göne la Paseka. Ame hna hmahma pi la itre atre huuj me angetre Levi, matre angatr a ahmitrötrë angatre ju, me traqa fë kowe la uma ne hmi Iehova, la itre öni nyine huuj ne dreuth asë. 16 Angatr a cile ju ngöne la itre göhnë hna ahnithe koi angatr, hnine la Trenge Wathebo i Mose lo atre ne la nyipi Akötresie. Thupene lai, hnene la itre atre huuj hna thathane la ita ne huuj, hnene la madra hna hamë angatr hnei angetre Levi. 17 Nge pine laka, ala nyimu e hnine la icasikeu ka tha ahmitrötrë angatr, hna upe la angetre Levi troa humuthe la itre öni göne la Paseka. Itre öni thatraqane la nöjei atr ka tha hane ahmitrötrë angatr, matre tro fe angatr a hmitrötr koi Iehova. 18 Eje hi, ala nyimu ngöne la icasikeu, me thene la angetre Eferaima me Manase, me Isakara, me Zebulona, la ka tha ahmitrötrë angatr. Ame pe, tha trongëne kö angatr lo Wathebo, ke hnei angatr hna xeni la Paseka. Nge hnei Hezekia hna thithi sai angatr me hape: “Epi tro Iehova, atre ka loi hni a trotrohnine la 19 nöjei atr ka hnëkëne la itre hni angatr, matre troa thele Iehova la nyipi Akötresie, Akötresi ne la itre qaaqaa i angatr, ngacama tha hnei angatre kö hna ahmitrötrë angatr, thenge lo hna amekötin.” 20 Nge hnei Iehova hna drei Hezekia, me nue* la ngazo ne la nöj.
21 Hnene la angetre Isaraela ka traqa e Ierusalema, hna feetëne la Itre Falawa Ka Pë Levenen koi 7 lao drai, nge angatr a madrin. Ame la angetre Levi me itre atre huuj, angatr a atrunyi Iehova e nöjei drai, me ahone la itre nyine elo miuzik i angatr koi Iehova. 22 Ketre, hnei Hezekia hna thuecatrene* la angetre Levi ka huliwa inamacan koi Iehova. Nge hnene la nöj asë me angetre Levi, hna ce xen ngöne la 7 lao drai ne feet. Angatr a huujëne la itre huuj ne tingeting, me olene koi Iehova Akötresi ne la itre qaaqaa i angatr.
23 Thupene lai, hnene la icasikeu asë hna ce mekun troa aqeane la feet koi 7 lao drai. Matre angatr a feete madrine jë koi 7 hmaca lao drai. 24 Nge hnei Hezekia joxu ne Iudra, hna huujëne kowe la icasikeu la 1 000 lao kau, me 7 000 lao mamoe. Nge ame la itre he ne nöj, angatr a huujëne jë kowe la icasikeu la 1 000 lao kau, me 10 000 lao mamoe. Nge ala nyimu fe la itre atre huuj ka hane ahmitrötrë angatr. 25 Nge kola ce madrine hnene la itre atre Iudra ka icasikeu, me itre atre huj, me angetre Levi, me nöjei atr ka traqa qa Isaraela, me nöjei trenyiwa ka lapa e Isaraela, me ka lapa e Iudra. 26 Nge kola madrin atraqatr e Ierusalema, ke thupene lo mus i Solomona joxu ne Isaraela, lo nekö i Dravita, kolo petre hi a hane feete tun e Ierusalema. 27 Ame hë la kola fenes, hnene la itre atre huuj i angetre Levi hna cil, me amanathithine la nöj. Nge Akötresie a drenge la nine ithanata i angatr, nge kola elë la itre thithi angatr a tro hnengödrai, kowe la hnalapa i nyidrëti ka hmitrötr.