Pane Tusi Itre Joxu

7 Ame hnei Solomona hna xupe la hnalapa i nyidrë,* nge hnei nyidrëti hna afenesin asë la huliwa thupene la 13 lao macatre.

2 Nyidrëti a acile jë la Hnalapa Ne La Hnaxulu Ne Lebanona, nge traqa koi 100 kubit la eqean, 50 kubit la eisaisan, nge 30 kubit* la edraiën. Hna acil ej hune la 4 lao xötre poto arasi, nge hune la itre poto, hna atë la itre agö arasi. 3 Nge hetre pano arasi hna acatren hune la itre agö, ka të hune la itre poto. Hna e* la 45 lao pano: E ca xötr, 15 lao pano. 4 Nge ngöne la köni xötr* e koho hun, hna isa cane la ca xötre mamala hna nyi tane xötreith. Nge qëmekene la ketre mamala, hetre ketre mamala. 5 Nge ceitu hi la tulu ne la 4 lao kona ne la nöjei qëhnelö, me hune qëhnelö. Nge ketre tune hi kowe la itre tane mamalama, ka iqëmekekeu ngöne la köni xötr* e koho hun.

6 Nge hnei Solomona fe hna xupe la Hnahag* Ne La Itre Poto, nge traqa koi 50 kubit la eqean, nge 30 kubit* la eisaisan. Nge qëmekene la hnahag, hna kuci verada me acile la wenge poto, nge hna thing ej e koho hun.

7 Nge hnei nyidrëti fe hna xup la Hnahag* Ne La Theron, hna hëne fe ka hape, Hnahag Ne Iameköti. E cili la hnë iameköti hnei Solomona. Ame la itre ngöne uma, hna heetrën asë hnei pano arasi, qane ju hi la trepen uti hë la plafo.*

8 Nge ame la uma hnei Solomona hna lapan, eje ngöne la ketre götran, nge nango nanyi qa ngöne la Hnahag,* ngo casi hi la aqane xup ej. Nge Solomona a xupe jë la ketre uma ka tune la Hnahag kowe la föi nyidrë, lo nekö i Farao.

9 Hna kuca asë la nöjei batima hnei itre ietë ka tru thupen, nge hna isa sa thenge la tulu, me giline hnyawa e hnin me e trön hnei gili ne etë. Hna huliwane la itre ietë cili, qaane la trepene la itre batima, uti hë la hune uma, me e trön, uti hë la götrane ka tru nge gaa pë ihakun. 10 Hna xupe la itre trepen hnei itre ietë atraqatr, nge ka tru thupen. Ame itre xan, 10 kubit* la eqean, nge 8 kubit* la itre xan. 11 Hune la itre ietë cili, hna atë la itre xa etë ka tru thupen, hna sa thenge la tulun, me itre sinöe arasi. 12 Nge hna eköhagene la götrane gaa pë ihakun ka tru, hnene la itra ietë hna sa tulun ka köni xötr, nge hna nyixan hnei ca xötre agö arasi. Ceitune hi la aqane xupe la ihage celë, memine lo ihag ne la götrane gaa pë ihakun ne la uma ne hmi i Iehova, memine la hnahag hnë lö ne la uma.*

13 Ame hnei Solomona joxu hna hë Hirama, lo atre ka lapa e Turo. 14 Angeic la nekö ne la ketre sine föe qa Nafatali, nge atre Turo la keme i angeic, ketre atre huliwa kopa. Atre ka maca catre lae Hirama, nge ka inamacan, nge ka atreine kuca la itre ewekë kopa. Matre angeic a traqa ju koi Solomona joxu, me eatrëne la nöjei huliwa hnei nyidrëti hna upi angeic troa kuca.

15 Hnei angeic hna ahmune la kopa troa kuca la lue poto, nge isa 18 kubit* la edraiën. Nge maine kola pi tuluthe la eisaisan, ke nyipiewekë troa hetre eno ka 12 kubit nyine troa kanothe la ca ipoto. 16 Ame hnei angeic hna ahmune la kopa troa kuca la he ne poto, nyine atë hune la poto. Isa 5 kubit* la edraiën la lue he ne poto. 17 Nge hune la lue he ne poto, angeic a acatrene jë la lue ifile hna kuca hnei itre neköi cein hna el, kösë itre eno. Nge hna ielekeun la 7 lao hnep göi troa kuca la isa ca cein. 18 Nge hune la ketre cein hna el, hnei angeic hna athipe la lue xötre grenad, matre heetrëne la he ne poto. Nge hnei angeic hna kuca tune lai, kowe la lue he ne poto. 19 Nge ame la lue he ne poto, ke kösë lue lili, nge ame la edraiëne la lue lili, ke 4 kubit. 20 Nge ame la götrane cili, ej e hune la lue ipoto, thupene la götrane ka nango jua, lo hna kanoth hnene la cein hna el. Nge e ca poto, ke traqa koi 200 lao xötre grenad ka kanoth ej.

21 Nge angeic a acile jë ngöne la hnë lö ne la uma ne hmi,* la lue ipoto. Casi ngöne la götrane maca,* hna ati ëjene ka hape, Iakina,* nge ketre ngöne la götrane mi* hna ati ëjen, Boaza.* 22 Nge ame la pune la lue poto, ke kösë lili. Celë hi aqane afenesin angeic la huliwa ne xupi poto.

23 Thupene lai, hnei angeic hna kuca la ketre itrapene si atraqatr, hna hëne ka hape, Hnagejë Kopa. Ka raone la itrape cili, nge kola e la 10 kubit qane la ketre can uti hë la ketre. Nge 5 kubit la edraiën, nge e troa xomi tulun me kanoth ej, nyipiewekë troa hetre eno ka 30 kubit. 24 Nge hna amingömingöne la itrapene si* hnei itre fuo hna sija xötreith, e koho hun me e kuhu fen. Hna sija la 10 lao fuo thupene la ca kubit, nge hna sija la lue xötre fuo. Nge ame la itrap memine la itre fuo, hna aca tro xupe hi. 25 Hna atë la itrapene si hune la 12 lao kau. Köni ka goe kolopi, nge köni ka goe kuë, nge köni ka goe kolojë, nge köni ka goe koië. Hna atë la itrap hune la itre kau, nge angatr a hutrö kowe la nyipine la itrap. 26 Nge ame la aqane hmekönine lai itrapene si, ke ca hnatrapaim.* Nge ame la hun ne la trapene si, ke kösë ulane ver, me lili. Ej a nyi trengene la 2 000 lao bath.*

27 Thupene lai, angeic a kuca jë la 10 lao ikatr* kopa. Ame la eqeane la ca ikatr, ke 4 kubit, nge 4 kubit la eisaisan, nge 3 kubit la edraiën. 28 Hane hi la aqane kuca la itre ikatr: Hna ami pano ngöne la lue götran, nge hna kanoth hnene la itre sine agö kopa. 29 Nge hune la itre pano hna acatren nyipine la itre sine agö, hna sija la itre liona me itre kau, me itre kerubi. Nge hna tune fe hune la itre sine agö kopa. Nge hune la itre kau, me fene la itre liona, hetre nyine thaip* hna tratraun. 30 Ame la itre ikatr, isa hetre foa lao wil kopa, nge hetre reio kopa ngöne la iwil, hna acatren hnene la 4 lao ewekë ka uti qa ngöne la itre kona ne la ikatr. Nge hetre iwacane lai trepene tim, nge hune la itre iwacan, hna xup la itre nyine thaip. 31 Nge ame la ulane lai itrepene tim, ej e hnine la ketre korona. Matre qaane la trepene lai trepene tim, uti hë la fene lai korona, kola e la ca kubit la edraiën. Nge ka raon la ulane lai trepene tim. Matre qaane la ulan uti hë la itre wacan, kola e la ca kubit nge sin, nge hetre ewekë hna tratraun nyine amingömingön. Nge ame la itre pano, tha ka raone kö, ngo ka ceitu pe la tulu ne la 4 lao kona. 32 Hna acatrene la itre wil fene la itre pano ka kanothe la ikatr. Nge ame la itre ewekë ka acatrene la itre wil, hna acatrene kowe la ikatr. Nge ame la edraiëne la itre wil, ke ca kubit nge sin. 33 Ame la itre wil, ceitu hi me itre wil ne ikatr. Nge ame la trepen, memine la ifao ne wil, me itre reio, memine la nyipine wil, hna kuca asë hnei kopa hna ahmun. 34 Ame la foa lao ewekë ka acatrene la itre wil, itre ej ngöne la foa lao kona ne la ikatr. Hna aca tro xupe* hi la foa lao ewekë cili, memine la ikatr. 35 Hune la ikatr, hetre ewekë ka kanothe la trepene tim, nge ca kubit nge sine la edraiën ej. Hna kuca la ewekë cili hnei itre pano me sine agö kopa, nge hna ce xup* itre ej memine la ikatr. 36 Nge hune la itre sine agö kopa me itre pano, hna sija la itre kerubi, me itre liona, me itre pama, thenge la göhnë ka hetreny. Nge hetre nyine thaip xötreith. 37 Hane hi la aqane kuca angeic la 10 lao ikatr. Ceitu hi la aqane ahmun me ce xup, nge casi hi la etrun, nge casi hi la pengön.

38 Thupene lai, hnei angeic fe hna xupe la 10 lao trepene tim kopa. Nge 40 bath la etrune la isa alien. Nge 4 kubit* la eisaisan ne la itre trepene tim cili. Hetre trepene tim hune la 10 lao ikatr. 39 Nge angeic a acilëne ju la 5 lao ikatr ngöne la götrane maca ne lai uma,* nge 5 ngöne la götrane mi. Angeic a amë ju fe la Hnagejë ngöne la götrane maca, akawan e kolojë me koië.

40 Nge hnei Hirama fe hna kuca la itre neköi trap, me itre pel, me itre kap. Nge celë hi aqane afenesine Hirama la itre huliwa hna upi angeic hnei Solomona joxu, thatraqane la uma ne hmi i Iehova. Hane hi la itre huliwa i angeic: 41 Lue poto, me lue hune poto kösë kap, me lue ifile nyine heetrëne la lue hune poto, 42 memine la 400 lao grenad thatraqane la lue ifile, lue xötre grenad ngöne la lue ifile, matre heetrëne la lue hune poto ka ceitu me kap, 43 memine la 10 lao ikatr, me 10 lao trepene tim hune la itre ikatr, 44 memine la Hnagejë, me 12 lao kau fene la Hnagejë, 45 me itre trapë hnatresij, me itre pel, me itre kap, me nöjei ewekë kopa ka jijia, hna kuca hnei Hirama koi Solomona joxu, me kowe la uma ne hmi i Iehova. 46 Hnene la Joxu hna iup troa ahmun me neng itre ej ngöne la itre mul hna kuca hnei dro ka fedr. Hna kuca lai ngöne la hnathup e Ioridrano,* nyipine Sukotha me Zaretana.

47 Nyimutre catre la itre ewekë, matre tha tuluthe kö Solomona. Nge goi tha tuluthe fe nyidrë la ehacene kopa hna huliwan. 48 Hnei Solomona hna kuca asë la itre ewekë thatraqane la uma ne hmi i Iehova, ene la ita ne huuj gool, me laulau gool, lo hnë atë la itre falawa nyine amaman,* 49 me itre tane laam hna kuca hnei nyipi gool, lo hna acil ngöne la hnë lö ne la Gaa Nyipi Hmitrötr,* 5 ngöne götrane maca, nge 5 ngöne götrane mi, memine la itre iengen, me itre laame cil, me itre akofe gool; 50 me itre itrap, me itre fizi, me itre kap, me itre ver, me itre trengene eë hna kuca hnei nyipi gool, me itre ewekë gool ka jui, nyine trepene la itre waca ne la qëhnelö ne la uma* e hnin, ene la Gaa Nyipi Hmitrötr, me itre qëhnelö ne la uma ne hmi.

51 Celë hi aqane afenesine Solomona joxu, la nöjei huliwa thatraqane la uma ne hmi i Iehova. Thupene lai, hnei Solomona hna xome la itre ewekë hnei Dravita keme i nyidrë hna amë acon thatraqane la hmi.* Solomona a amë ju la sileva, me gool, me nöjei ewekë ka lolo, hnine la itre hnahag ne ami mo ne la uma ne hmi i Iehova.