Pane Tusi Itre Joxu
9 Ame hë la Solomona a ase xup la uma ne hmi i Iehova me hnalapa i joxu, memine la nöjei ewekë hnei nyidrë hna ajane troa kuca, 2 hnei Iehova hna mama hmaca koi Solomona, tune lo nyidrëti a mama e Gibeona. 3 Öni Iehova: “Drenge hë ni la thithi eö me xëwe i eö. Ame la uma celë hnei eö hna xup, ase hë ni ahmitrötrëne hnene la ëjeng epine palua. Nge tro hë la luemekeng memine la hning a lapa palua e celë. 4 Nge e tro eö a nyihlueng* tune la aqane kuca i Dravita keme i ö, hnene la hni ö ka pexej, me meköt, me kuca asë la hnenge hna amekötine koi ö, nge e tro eö a trongëne la itre wathebong asë, 5 tro hë ni a acile hutin la musi ö hui Isaraela, tune lo aqane sisiny ni koi Dravita, keme i ö ka hape: ‘Tro pala hi a hetre matra i ö hune la theron ne Isaraela.’ 6 Ngo maine tro epun me itre nekö i epun a nuetriji ni, me nuetrije la itre wathebong, me itre hnenge hna amekötin, nge e tro epuni a nyihluene la itre xa haze me thili kow, 7 tro hë ni a apatrene* la angetre Isaraela qa ngöne la nöj hnenge hna hamë angatr, nge tro ni a apatrene la uma qëmekeng, lo hnenge hna ahmitrötrëne thatraqane la ëjeng. Nge tro la nöjei nöj a methinë Isaraela, me hnyima sai angatr. 8 Nge tro ha hnyiqetre la uma celë, nge tro la nöjei atr ka tro ezin a goeëne me sesëkötr. Tro angatr a qej me hnyinge ka hape, ‘Hnauëne laka, Iehova a kuca tun kowe la nöje celë memine la uma celë?’ 9 Nge tro ha sa koi angatr ka hape, ‘Kolo ke hnei angatr hna nuetriji Iehova Akötresi angatr, lo ka thapa la itre qaaqaa i angatr qa Aigupito, nge hnei angatr hna fedre kowe la itre xa haze, me thili kow, me nyihluen. Hane hi la kepin matre axulune pi Iehova la ngazo ka tru celë koi angatr.’”
10 Traqa koi 20 lao macatre ne xupe Solomona la lue uma, ene la uma ne hmi i Iehova, me hnalapa i joxu. 11 Ngöne la ijine cili, hnei Hirama joxu ne Turo hna hamë sinöe arasi me göti, me gool hna sipon hnei Solomona. Matre hnei Solomona joxu hna hamëne koi Hirama, la 20 lao traon ne la nöje Galilaia. 12 Hirama a tro ju qa Turo troa wange la itre traon hna hamë angeic hnei Solomona, ngo tha madrine* kö angeic. 13 Öni angeic: “Trejin* nemene traone la hnei eö hna hamë ni?” Celë hi matre enehila, kolo pala hi a hëne la itre traone cili ka hape, nöje Kabul.* 14 Nge ngöne la ijine cili, hnei Hirama hna iupi fë koi joxu la 120 lao talane gool.
15 Hane hi la itre ithuemacany göne la itre atr hnei Solomona hna musinën troa kuca la itre huliwa hna athip. Hnei nyidrëti hna upi angatr troa xupe la uma ne hmi i Iehova, memine la hnalapa i joxu, me kuca la Hna Ji Dro,* memine la ihag atraqatr e Ierusalema, me Hazora, me Megido, me Gezera. 16 (Ngöne la ketre tronge i Farao troa isi, hnei angeic hna thapa la traon ne Gezera, me manith, me humuthe la angetre Kanana ka lapan. Thupene lai, hnei angeic hna hamëne lai traon nyine iahni memine la nekö i angeice jajiny, lo föi Solomona.)* 17 Matre hnei Solomona hna xupi* Gezera hmaca, me Bethe-horona e kuhu, 18 me Baalath, me Tademora ngöne la gaa qaqacil e hnine la nöj, 19 me nöjei traon nyine ami ewekë i Solomona, me itre traon ne ami ikatr, me itre traon ne la itre ka ti ikatr. Nyidrëti a xupe ju fe la nöjei aja i nyidrë e Ierusalema, me Lebanona, me nöjei götran hna musi kow hnei nyidrë. 20 Ngo mele pala kö e cili la itre atre Heth, me Amora, me Perizi, me Hivi, me Iebusi, itre ka tha sine la nöje Isaraela. 21 Kolo itre matra ne la itre atr ka lapa ngöne la nöj, lo itre matra ne la itre atr hnei angetre Isaraela hna thatreine lep apatren, matre hnei Solomona hna folosa angatr. Nge uti pala hi enehila, itre hlue angatr. 22 Ngo pëkö ca atre Isaraela hnei Solomona hna folosan, ke angatre la itre sooce i nyidrë, me itre ka huliwa koi nyidrë, me itre he ne nöj, me itre kapiten, me itre tane la itre ka ti ikatr me ti hos. 23 Nge ala 550 la itre tan ne la itre tane huliwa i Solomona. Angatre la itre hna acil troa thupëne la itre ka huliwa.
24 Ame hnene la nekö i Farao jajiny hna tro qa ngöne la Traone i Dravita, me lapa hnine la uma hnei Solomona hna xupe koi eahlo. Thupene lai, Solomona a kuca jë la Hna Ji Dro.
25 Nge ngöne la macatre, hnei Solomona hna akönia tro fë huuj ne dreuth asë, me itre huuj ne tingeting hune la ita ne huuj hnei nyidrëti hna xup koi Iehova. Nge hnei nyidrëti fe hna huhajin e cili la itre huuj qëmeke i Iehova. Celë hi aqane afenesin Solomona la uma ne hmi.
26 Nge hnei Solomona fe hna cane la itre he e Eziona-gebera ezine Elath,* ngöne la Hnagejë Ka Palulu, hmekune la nöje Edoma. 27 Nge Hirama a upe jë kowe la itre he cili, la itre atre i angeic, matre tro angatr a ce huliwa me itre hlue i Solomona. Itre atre ka atrepengöne la hnagejë. 28 Matre angatr a tro ju e Ofira, me bëeke fë koi Solomona joxu, la 420 lao talane gool.