Pane Tusi Itre Joxu

13 Iehova a upe jë la ketre atre i Akötresie ka lapa e Iudra a tro Bethela. Nge traqa ju hi angeic a öhnyi Ieroboama joxu ka cil ezine la ita ne huuj, nge nyidrëti a troa huhajine la itre huuj. 2 Ame hnei angeic hna ithanata kowe la ita ne huuj, angeic a suene jë la maca i Iehova. Öni angeic: “Ita ne huuj, ita ne huuje fe! Hane hi la hna qaja hnei Iehova: ‘Tro ha hnahone la nekönatr trahmany hnine la hnalapa i Dravita! Tro ha ati ëje i nyën, Iosea. Tro nyën a huujëne hui eö, la itre atre huuj ne la itre hnë hmi gaa hmitrötr, lo itre ka huhajine la itre huuj hui eö. Nge tro nyën a dreuthe trije hui eö, la itre jun atr.’” 3 Ngöne la drai cili, hnene la atre i Akötresie hna qaja ka hape, tro ha hetre hatren. Öni angeic: “Hane hi la hatren hnei Iehova hna qaja, ‘Goeëne jë, tro ha kaqa luëne la ita ne huuj, nge tro la hnatresij* a malamala e cahu fen.’”

4 Nge ame hë la joxu a drenge la hna suen hnene la atre i Akötresie kowe la ita ne huuj ne Bethela, nyidrëti a uthe ju la wanakoime qa hune la ita ne huuj, me köjane lai atr, me hape: “Xolouthi angeice ju!” Ngo fitre* ju hi lo im hnei nyidrëti hna saath, matre thatreine ju hi nyidrë enijën. 5 Thupene lai, hna kaqa la ita ne huuj, nge mala pi hi la hnatresij, tune lo hna qaja hnene la atre i Akötresie, ene lo hatren hnei Iehova hna upi angeic troa qaja.

6 Ame hnei joxu hna qaja kowe la atre i Akötresie ka hape: “Ekölö hi ni, pane xëwe* sai ni jë koi Iehova Akötresi eö, matre loi pi la imeng.” Nge hnene la atre i Akötresie hna thithi sai nyidrë koi Iehova, matre loi hmaca pi hi la ime ne la joxu. 7 Thupene lai, önine la joxu kowe la atre ne la nyipi Akötresie ka hape: “Pane trohemi kowe la hnalapang, nge tro ni a thue a i eö, me hamë ahnahna koi eö.” 8 Ngo önine la atre ne la nyipi Akötresie kowe la joxu ka hape: “Maine tro ju hë nyipë a hamë ni la sine la itre ewekë* i nyipë, tha tro jë kö ni a ce tro me nyipë. Tha tro kö ni a xeni falawa, me iji tim ngöne la götrane celë. 9 Ke hnei Iehova hna wathebo ni ka hape, ‘The tro kö eö a xeni falawa me iji tim, nge tha tro kö eö a bëeke qa ngöne la gojenyi hnei eö hna trongëne hë.’” 10 Haawe, angeic a xötrëne pi la ketre gojeny, nge tha bëeke kö angeic kowe la gojeny hnei angeic hna xotrën a tro Bethela.

11 Nge e Bethela fe la ketre qatr ka perofeta, matre ame hë la itre nekö i nyidrë a bëeke koi hnalapa, angatr a qaja jë koi nyidrë la nöjei ewekë hna kuca hnene la atre ne la nyipi Akötresie e Bethela, me itre trengewekë i angeic kowe la joxu. Ame ju hi la angatr a ase porotrikëne lai, 12 hnene la keme i angatr hna hnyingëne ka hape: “Hnei angeic hna kaa thenge?” Angatr a amamai nyidrëti jë la gojenyi hna xötrën hnene la atre i Akötresie ka traqa qa Iudra. 13 Thupene lai, önine lai qatr ka hape: “Ati biritine jë lai boliko!” Angatr a kuca ju, nge nyidrëti a të jë.

14 Matre nyidrëti a tro ju me xötrethenge la atre ne la nyipi Akötresie. Nge nyidrëti a öhnyi angeice ju e lapa fene la isinöe atraqatr. Matre öni nyidrë koi angeic ka hape: “Eö hi la atre ne la nyipi Akötresie ka traqa qa Iudra?” Sa jë hi angeic ka hape: “Öö eni hi.” 15 Önine la perofeta: “Trohemi ma hane xeni falawa ngöne la hnalapang.” 16 Ngo sa jë hi angeic ka hape: “Tha ijijinge kö troa ce bëeke me nyipë, me kapa la ihë i nyipë, ke hna wathebo ni troa xeni falawa, me iji tim me nyipë ngöne la götrane celë. 17 Ke öni Iehova koi ni, ‘The tro kö eö a xeni falawa me iji tim ngöne la götrane cili, nge tha tro kö eö a bëeke qa ngöne la gojenyi hnei eö hna trongëne hë.’” 18 Ngo önine la perofeta: “Eni fe hi la ketre perofeta, nge hnei Iehova hna ithanata koi ni jëne la angela. Öni nyidrëti koi ni, ‘Bëeke sai angeice jë kowe la hnalapa i eö, matre tro angeic a xeni falawa me iji tim.’” (Ngo nyidrëti a thoi.) 19 Matre hnene lai atr hna ce bëek memine la perofeta, troa xeni falawa me iji tim ngöne la hnalapa i nyidrë.

20 Nyidroti pala kö hune la laulau, nge traqa pi hi la maca i Iehova kowe la perofeta ka bëeke fë lai atr. 21 Ame hnene la perofeta hna suene kowe la atre ne la nyipi Akötresie ka traqa qa Iudra ka hape: “Hane hi la hna qaja hnei Iehova, ‘Hnei eö hna cile kowe la wathebo i Iehova, nge tha metrötrëne kö eö la hnei Iehova Akötresi eö hna amekötine koi eö. 22 Hnei eö hna bëeke troa xeni falawa, me iji tim ngöne la götran hnei nyidrëti hna wathebo eö troa xeni me ij. Pine eö kuca lai, tha tro kö a keleme la ngönetrei eö ngöne la hua ne la itre qaaqaa i eö.’”

23 Thupene la kola ase xeni falawa me ij hnene la atre ne la nyipi Akötresie, hnene la qatr hna ati biritine la boliko koi angeic.* 24 Matre angeic a tro ju, ngo e cahu gojeny, hnei angeic hna ixelë memine la ketre liona ka humuthi angeic. Nge kola meköle la ngönetrei i angeic e cahu gojeny ezine la ketre boliko me ketre liona. 25 Nge hnene la itre atr ka cili thenge hna öhne la ngönetrei e cahu gojeny, memine la liona ka cil ezin. Matre angatr a tro ju kowe la traon, lo traon ne lo qatr ka perofeta, nge angatr a porotrikëne la hnei angatr hna öhn.

26 Nge drei mejene hë lo perofeta ka bëeke fë lo atre ne la nyipi Akötresie, matre canga öni nyidrë: “Atre ne la nyipi Akötresieti lai, lo ka icilekeu memine la wathebo i Iehova. Celë hi matre hnei Iehova hna nue angeice kowe la liona ka hej angazo angeic, me humuthi angeic, tune lo hna qaja hnei Iehova koi angeic.” 27 Thupene lai, önine la perofeta kowe la itre nekö i nyidrë trahmanyi ka hape: “Ati biritine jë la boliko.” Matre angatr a kuca ju. 28 Nge hnene la perofeta hna tro me öhne la ngönetrei e kuhu gojeny, memine la boliko me liona ka cil ezin. Ngo tha hnene kö la liona hna öni la ngönetrei memine la boliko. 29 Matre hnene la perofeta hna xome la ngönetrei ne la atre ne la nyipi Akötresie, me atë hune la boliko, me bëeke fë ngöne la traone i nyidrë, matre treije pi angeic me kelemi angeic. 30 Nyidrëti a amë ju la ngönetrei hnine la sipu hua i nyidrë, me treij me hape: “Ekölö hi ni pe la jining!” 31 Thupene la hna kele wezipo, önine la perofeta kowe la itre nekö i nyidrë: “E meci hë ni, tro epuni a kelemi ni ngöne la götran hna keleme la atre ne la nyipi Akötresie. Tro epuni a amë la trepe juneng ezine la trapa june i angeic. 32 Nge tro kö a eatre la maca qaathei Iehova, lo hnei angeic hna suene kowe la ita ne huuj e Bethela, me kowe la nöjei uma ne hmi hna acil hune la itre hnë hmi gaa hmitrötr, ngöne la nöje Samaria.”

33 Ngacama hna traqa la ewekë cili, ngo tha nue kö Ieroboama la thiina ka ngazo i angeic. Hnei angeice pala hi hna acili* atre huuj troa huliwa ngöne la itre hnë hmi gaa hmitrötr, itre atr hna iëne menun ngöne la nöj. Angeic a acile la nöjei atre ka ajan troa atre huuj, me hape: “Loi e tro angatr a atre huuj hune la itre hnë hmi gaa hmitrötr.” 34 Haawe, pine la ngazo cili, hna apatrene la fami Ieroboama, matre patre hë angatr qa ngöne la ihnadro.