Pane Tusi Itre Joxu
21 Thupene la itre ewekë cili, hna traqa la ketre jol göne la hlapa vine* i Nabotha, atre Iezerela. Ame la hlapa vin cili, ej ezine la hnalapa i Ahaba, joxu ne Samaria. 2 Matre öni Ahaba koi Nabotha ka hape: “Hamë ni pi la hlapa vine i eö, ke ej ezine la hnalapang, eni a pi eëny e cili. Nge tro pë hë ni a hamë eö la ketre hlapa vin ka lolo catre kö, maine pena, tro ni a nyithupen, qanyi eö kö.” 3 Ngo öni Nabotha ka hape: “Pi Iehova, thatreine kö ni mekun troa hamë nyipë la edrö ne la itre qaaqaang.” 4 Ame hnei Ahaba hna bëeke kowe la hnalapa i nyidrë, nge kola ngazo ngazo la hni nyidrë, me jol pine la aqane sa i Nabotha. Ke öni angeic: “Tha tro kö ni a hamë nyipë la edrö ne la itre qaaqaang.” Matre hnei nyidrëti hna sath aqeany hune ili, me qëmek kowe la ngöne uma, me tha xen.
5 Nge traqa pi hi Iezebela föi nyidrë, öni angeic: “Hnauëne la nyipëti a xele ma xen? Nyipëti* a hleuhleu fë nemen?” 6 Öni nyidrëti jë hi: “Hnenge hna sipo Nabotha qa Iezerela troa salemëne la hlapa vine i angeic koi ni, maine tro pena ni a isazen me angeic hnei ketre hlapa vin. Ngo öni angeic ka hape, ‘Tha tro kö ni a hamë nyipë la hlapa vineng.’” 7 Matre öni Iezebela föi nyidrë: “Tha nyipëti kö la joxu ne Isaraela? Mejë jë nge xeni jë, nge the hleuhleu hmaca kö. Tro kö ni a hamë nyipë la hlapa vine i Nabotha qa Iezerela.” 8 Iezebela a cinyianyi tusi jë ngöne la ëje i Ahaba, me peleth hnene la ewekë nyine pelehatrene i Ahaba. Thupene lai, angeic a iupi fë pi kowe la itre qatr, me itre he ne nöj ka mel ngöne la traone i Nabotha. 9 Hnine la itre tus, hnei angeic hna cinyianyine ka hape: “Amekötine jë troa tha xen, nge upi Nabotha jë troa lapa nyipine la ka ala nyim. 10 Nge alapane ju qëmeke i angeic la lue ka pë hnënyöngön, nge tro nyidroti a upezö angeic me hape, ‘Hnei eö hna eji Akötresie me joxu!’ Nge tro hë epuni a tro sai Nabotha tröne la traon, me trane humuthi angeic hnei etë.”
11 Matre hnene la itre trahmany ne la traon, itre qatr me itre he ne nöj ka mel ngöne la traone i Nabotha, hna kuca la hnei Iezebela hna upi angatr hnine la itre tus. 12 Angatr a amekötine jë troa tha xen, me alapa Nabotha nyipine la ka ala nyim. 13 Nge hnene la lue ka pë hnënyöngön hna lapa qëmeke i Nabotha, me sili ithanata qëmekene la ka ala nyimu me hape: “Hnei Nabotha hna eji Akötresie me joxu!” Thupene lai, hna tro sai Nabotha tröne la traon, me trane humuthi angeic. 14 Ase jë hi, hna iupi fë la maca celë koi Iezebela: “Ase hë trane humuthi Nabotha.”
15 Nge ame ju hi la Iezebela a drenge ka hape, meci hë Nabotha, öni angeic koi Ahaba: “Tro jë nyipë a xome la hlapa vine i Nabotha qa Iezerela, lo hnei angeic hna xele ma salemëne koi nyipë, ke patre hë Nabotha, meci hë angeic.” 16 Matre ame ju hi la Ahaba a drenge ka hape, meci hë Nabotha, nyidrëti a tro ju troa xome la hlapa vine i Nabotha qa Iezerela.
17 Ngo öni Iehova koi Elia atre Tisebi ka hape: 18 “Mejë jë troa wai Ahaba joxu ne Isaraela, lo ka lapa e Samaria, ke angeice hë ngöne la hlapa vine i Nabotha troa xom. 19 Tro eö a qaja koi angeic ka hape, ‘Hane hi la hna qaja hnei Iehova: “Tha ijije kö la hnei eö hna humuthe la atr, ngo eö fe a atrekënö* la zi angeic!”’ Nge tro fe eö a qaja koi angeic ka hape, ‘Hane hi la hna qaja hnei Iehova: “Ngöne la götrane hnei itre kuli hna hadrumëne la madra i Nabotha, tro fe nyudreni a hadrumëne la madra i eö.”’”
20 Öni Ahaba jë hi koi Elia: “Öhnyi ni hë hnei eö, mething!” Matre öni Elia ka hape: “Eje hi, öhnyi eö hë ni. Öni Akötresie, ‘Pine eö catre kuca* la ngazo koi Iehova, 21 tro hë ni a axulune la akötre koi eö. Eje hi, tro ni a burumëne hnyawa thupei ö, tro ni a apatrene la nöjei trahmanyi* ne la lapa i ö, nge uti fe hë la neköi ka co e Isaraela. 22 Nge tro ni a kuca kowe la fami ö, tune lo hnenge hna kuca kowe la fami Ieroboama nekö i Nebata, me fami Baasa nekö i Ahia, ke hnei ö hna amejëne la trenge hning, me uku Isaraela troa kuca la ngazo.’ 23 Hnei Iehova fe hna ahnithe koi ni la maca koi Iezebela, ‘Tro itre kuli a öni Iezebela ngöne la hnepadro e Iezerela. 24 Nge ame la nöjei atrene la fami Ahaba ka mec ngöne la traon, tro itre kuli a öni. Nge ame la itre ka mec ngöne la itre hlapa, tro itre waco a öni. 25 Ke eje hi, pëkö atr ka catre që* tui Ahaba, me kuca catrëne la ngazo koi Iehova, ke hnei angeic hna kei thenge Iezebela föi angeic. 26 Tha fene ngazo kö la aqane ujë i angeic. Hnei angeic hna nyihluene la itre idrola ka sis,* tune hnyawa hi lo aqane kuca i angetre Amora, itre hnei Iehova hna helën qa ngöne la nöj, matre hamën koi Isaraela.’”
27 Matre ame ju hi la Ahaba a drenge lai, nyidrë a kuie zezene pi la iheetre i nyidrë, me heetrëne la ngönetrei nyidrë hnei ibëek ka tru thenyin, me tha xen, me meköl hune ibëek ka tru thenyin, me tro hleuhleu. 28 Matre öni Iehova jë hi koi Elia atre Tisebi ka hape: 29 “Öhne hi eö la aqane ipië i Ahaba lo angeic a drenge la hnenge hna amekötin? Pine laka, angeic a ipië qëmekeng, tha tro kö ni a axulune la akötr e mele pala kö angeic. Ngo tro pe ni a axulun kowe la fami angeic, e musi jë la nekö i angeic.”