Atre Cainöj

9 Ame hnenge hna trotrohnin me wangatrune la ewekë celë: Eje ngöne la ime ne la nyipi Akötresie la itre atr ka meköt, me itre ka inamacan, me itre huliwa i angatr. Nge thatre kö la itre atr enehila, la etrune la ihnim me imethinë hna melëne hë ekö. 2 Ceitune hi la pun koi angatr asë, kowe la atr ka meköt me ka ngazo, kowe la atr ka loi thiina hna ahmitrötrën, me kowe la ka pui ngazo, kowe la ka tro fë huuj, me ka tha hane kö tro fë huuj. Nge ceitune hi la atr ka loi thiina, memine la ka kuca la ngazo. Ceitune hi la ka sisiny, memine la ka xou troa sisiny. 3 Hane hi la ketre ewekë ka jole catr hna kuca fene la jö: Pine laka, casi hi la pun kowe la nöjei atr asë, matre kolo fe a tiqa la hni i angatr hnei ngazo. Kola menu la hni i angatr ngöne la ijine angatr a mel, nge thupene lai, angatr a mec!*

4 Hetre mejiun kowe la ka mel, ke loi ju kö la kuli ka mel hune la liona ka mec. 5 Ke eje hi, atre hi la itre ka mel ka hape, tro angatr a mec. Ngo pëkö hna atre hnene la itre ka meci hë, nge pë hmaca kö thupe i angatr, ke ase hnyawa ha thëthëhmi angatr. 6 Nge ketre, patre hë thei angatre la ihnim, me imethinë, me izalukeu. Nge tha angatre hmaca kö a hane sin la itre huliwa hna kuca fene la jö.

7 Tro jë nge xeni madrine jë la a i ö, nge iji jë la waina i ö hnene la hni ka madrin, ke madrine hë la nyipi Akötresie kowe la itre huliwa i ö. 8 Loi e tro pala hi a wië* la itre iheetre i ö, nge the thëthëhmine kö troa köle oelëne la he i ö. 9 Ce madrine jë memine la föe hnei ö hna hnim, ngöne la itre drai ka gufa hna hamë eö hnei Akötresie fene la jö, lo itre drai ka gufa ne mele i ö. Celë hi edrö i ö ngöne la mel, me ngöne la itre huliwa hnei ö hna akötrehnin fene la jö. 10 Matre ame la nöjei ewekë hna pi kuca hnene la ime i ö, kuca jë hnene la trengecatre i ö ka pexej, ke pë hmaca kö huliwa, me mekun, me atrehmekun, me inamacan ngöne la Hua* hnei ö hna tro kow.

11 Hane hi la ketre ewekë hnenge hna öhn fene la jö: Tha hape kö, ka nyape nyimenyime la atr matre tro pala hi angeic a traqa pa ngöne la iwaja. Tha hape kö, ka catre la atr matre tro pala hi angeic a huun ngöne la isi. Tha hape kö, ka inamacane la atr matre tro pala hi angeic a hetre xen. Tha hape kö, ka inamacane la atr matre tro pala hi angeic a trenamo. Nge tha hnene kö laka, ka hetre atrehmekune la atr, matre tro pala hi a tro loi la mele i angeic. Ke kola traqa koi angatr asë la itre ijine jol, me itre ewekë ka iasesëkötrë. 12 Ke thatre kö la atr la hawa i angeic. Nge tune la itre ii ka jötr ngöne la ifile hna mecin, me itre waco ngöne la ketre theth, jötre hë la itre nekö i atr ngöne la ijine akötr, ngöne la kola aca tro asesëkötrë angatr.

13 Hnenge mina fe hna öhn fene la jö, la ewekë ka ketre pengön göne la inamacan: 14 Hetre neköi traon laka, xalaithe hi la itre atren. Nge hnene la ketre joxu ka catr hna cile xötreith, me xupe la itre jia ne isi, matre thapa la traon. 15 Hetrenyi fe e cili la ketre atr ka pë ewekë ngo ka inamacan, nge ka amelene la traon hnene la inamacane i angeic. Ngazo pe, pë hmaca kö ka mekune la atre cili. 16 Matre öning: ‘Ka loi ju kö la inamacan hune la trengecatr. Ngo hna methinëne pe la inamacanen la ka pë ewekë, nge tha hna nyipiewekëne kö la itre trengewekë i angeic.’

17 Ka loi ju kö la troa dreng la itre trengewekë ka menyik ne la atr ka inamacan, hune la itre trengewekë ka catr ne la atre musinëne la itre hmo.

18 Ka loi ju kö la inamacan hune la itre jia ne isi. Ngo ijije hi tro la ca atr ka ngazo a apatrene la nöjei ewekë ka loi.