Isaia
50 Hane hi la hna qaja hnei Iehova:
“Ekaa la tusi ne triji föe lo hnenge hna hamëne kowe la thine i epun, lo eni a upetriji eahlo?
Hnenge kö hna salemë epun kowe la ketre atr matre nyithupene la itre gufang?
Waea, ngo hnene la itre ngazo i epun matre hna salemë epun,
Nge hnene la itre tria i epun, matre hna upetrije la thine i epun.
2 Hnauëne kö laka, pëkö atr la eni a traqa?
Hnauëne laka, pëkö ka sa la eni a hë?
Hohopatre kö la imeng matre troa itö epuni hmaca?
Tha ijije kö la trengecatreng matre troa amelen?
Goeën! Ame la eni a amekötin, ke kola weliwel la hnagejë;
Eni a saze la itre hneopegejë matre nyi hnapapa.
Kola meci hnei pi ij la itre ie i angatr,
Pi hë itre ej, ke tha tru kö la tim.
3 Eni a heetrëne la hnengödrai hnene la melöhlem,
Me atuth hnei ibëek ka tru thenyin.”
4 Hnei Iehova Joxu Ka Sisitria hna hamë ni la thinem* hna inin,
Matre tro ni a öhne la itre hnaewekë* nyine sa* kowe la ka kucakuca.
Nyidrëti a ahlë ni e nöjei hmakany;
Nyidrëti a fe la lue hnangenyëng, matre tro ni a dreng tune la itre atr hna inin.
5 Hnei Iehova Joxu Ka Sisitria hna fe la hnangenyëng,
Nge tha hnenge kö hna icilekeu.
Tha hnenge kö hna ujë kowe la gojenyi ka isazikeu.
6 Hnenge hna nue la jung kowe la itre ka lepi ni
Memine la lue itrasitreng kowe la itre ka hule la ienajing.
Tha hnenge kö hna juetrëne la qëmekeng kowe la hmahma, me itrahnyiju.
7 Ngo tro kö Iehova Joxu Ka Sisitria a xatua ni.
Celë hi matre, tha tro kö ni a hmahma.
Celë hi matre, hnenge hna acatrene la iqëmekeng tune la etë ka ixöj,
Nge xecie koi ni laka, tha tro kö a ahmahmanyi ni.
8 Tha nanyi kö la Atre jele meköti ni.
Matre drei la ka atreine upezö* ni?
Pane ce cile jë së.*
Drei la ka hetre iwesitrë me eni?
Epi tro angeic a alemi koi ni.
9 Goeën! Tro kö Iehova Joxu Ka Sisitria a xatua ni.
Matre drei la ka troa upezö ni?
Goeën! Tro angatr asë a hnyeqetr tune la iheetr.
Tro ha xuji angatr hnene la itre neköi öni.
10 Drei e epun la ka xoue Iehova
Me drenge la aqane ewekë ne la hlue i nyidrë?
Drei la ka tro ngöne la gaa melöhlem, nge pë pe lai?
Loi e tro angeic a mejiune ngöne la ëje i Iehova, me lapa qale kowe la Akötresi angeic.
11 “Ngo ame epuni asë itretre athi eë,
Me itretre asesëne la itre malepene eë,
Tro jë ngöne la ehudrumene la eë i epun,
Memine la itre malepene eë i epun.
Hane hi la hnei epuni hna troa kapa qa ngöne la imeng:
Tro hë epuni a meköle fë la akötr.