Salamo

9 Iehova fe, pi tro ni a atrunyi nyipë hnene la hning ka pexej;

Pi tro ni a qaja trongëne la nöjei huliwa i nyipë nyine hain.

 2 Pi tro ni a madrin me sue madrin göi nyipë;

Pi tro ni a nyimane* la elolone la ëje i nyipë, Akötresie Ka Draië Catr.

 3 Ngo ame hë la kola kötre bëeke la itre ithupëjiang,

Tro hë angatr a kei me mec qëmeke i nyipë.

 4 Ke nyipëti a cilëgöline la emeköting;

Nyipëti a lapane la therone i nyipë me amekötin ngöne la meköt.

 5 Hnei nyipëti hna hajine la itre nöj me humuth la itre atr ka ngazo,

Nge hnei nyipëti hna köletrije paluane la ëje i angatr.

 6 Patre palua ha la itre ithupëjia;

Ke hnei nyipëti hna feje trije la itre traone i angatr,

Nge tha tro hmaca kö a hane meku angatr.

 7 Ngo ka epine palua la mus i Iehova;

Hnei nyidrëti hna acile hutin la therone i nyidrë thatraqane la meköt.

 8 Tro nyidrëti a amekötine la fen ngöne la meköt;

Ame kowe la itre nöj, tro nyidrëti a ameköti angatr thenge la meköt.

 9 Tro hë Iehova a hnë zae* ka catr kowe la atr hna axösisin,

Ketre hunapo ka catr ngöne la ijin akötr.

10 Tro ha mejiune koi nyipë hnene la itre ka atre la ëje i nyipë;

Iehova fe, tha tro kö nyipëti a nuaxöje la atre thele nyipë.

11 Atrunyi Iehova jë hnene la itre nyima, lo atre lapa e Ziona;

Amamane jë nyipine la itre nöj la itre huliwa ka tru i nyidrë.

12 Ke tro Nyidrëti a mekune hmaca la madra ne la itre hna akötrën;

Tha tro kö Nyidrëti a thëthëhmine la itre hë* i angatr.

13 Iehova fe, epi kepe ni hnei nyipë; nge goeëne ju la akötr hna kuca koi ni hnene la itre ka methinë ni,

Ke nyipëti la atre thepe ni qa ngöne la itre qëhnelö ne la mec,

14 Matre tro ni a qaja la itre huliwa i nyipë nyine atrun ngöne la itre qëhnelö ne la nekö jajinyi ne Ziona,

Me madrine fë la itre huliwa ne iamele i nyipë.

15 Kei hë la itre nöj ngöne la hnaop hnei angatr hna sin;

Jole hë la lue ca i angatr ngöne la ifile hnei angatr hna juetrën.

17 Tro ha kötre bëek hnene la itre atr ka ngazo koi Hua,*

Ene la nöjei nöj ka thëthëhmi Akötresie.

18 Ngo tha tro pi kö a thëthëhmine paluane la itre ka pë ewekë;

Nge tha tro kö a patre palua la mejiun ne la itre ka ipië.

20 Iehova fe, lepi angatre ju hnei xou,

Matre tro la itre nöj a atre laka, itre atre hi angatr ka troa mec. (Sela)