Itre Edromë
14 Ame la föe ka nyipi inamacan, angeic a xupe la uma i angeic,
Ngo ame kö la föe ka hmo, angeic a thë hnene la lue ime i angeice kö.
2 Ame la ka tro ngöne la meköt, ke ka xoue Iehova,
Ngo ame la ka qali thiina, ke ka methinë nyidrë.
3 Ame la itre trengewekë ka pi tru ne la itre hmo, ke ceitu me jia,
Ngo kola thupëne la itre ka inamacan hnene la ukeineqë i angatr.
4 Maine pëkö kau, tha ka dro kö la trepene a i öni,
Ngo tro ha mana la xen hnene la trengecatrene la kau trahmany.
5 Ame la temoë ka mele nyipici, ke tha ka thoi kö,
Ngo ame la temoë ka thoi, ke angeic a thoi lapaa tune la angeic a mano.
6 Kola thele inamacan hnene la ka ihnyima sai, ngo tha öhne kö angeic,
Ngo ame la atr ka lai he, angeic a canga xolouthe la atrehmekun.
7 Ananyine pi la hmo,
Ke pëkö atrehmekun hnei ö hna troa dreng qa ngöne la që i angeic.
8 Jëne la inamacan, canga öhne hi la atr ka hmek la gojeny nyine tro angeic a xom,
Ngo hna amenune* la itre hmo hnene la itre tria i angatr.
9 Ka pë pengöne kowe la itre hmo, la itre tria i angatr,*
Ngo kola thele* troa iloi hnene la itre atr ka meköt.
10 Atre kö la hni, la etrune la akötre i angeic,*
Nge pëkö ka atreine ce thawa la madrine i angeic.
11 Tro ha thë la uma ne la itre atr ka ngazo,
Ngo tro ha atrune la itat ne la itre atr ka meköt.
12 Hetre gojeny hna mekun hnene la atr laka, ka loi hi,
Ngo ame pe, meci la pun.
13 Ngacama hnyima ju hë la ketre atr, ngo ka treije la hni i angeic,
Nge tro pena la madrin a saze koi akötr.
14 Tro la atr ka tha mele nyipici qa kuhu hni a xeni pune la aqane ujë i angeic,
Ngo ame la atr ka loi thiina, tro angeic a kepe thangane la itre huliwa i angeic.
15 Ame la atr ka qene nekönatr,* ke angeic a kapa asë la hna qaja,
Ngo ame la atr ka hmek, angeic a thupën la aqane tro i angeic.
16 Ame la atr ka inamacan, angeic a thupën la aqane ujë i angeic me ananyine la ngazo,
Ngo ame la hmo, ke pëkö xou* i angeic, nge angeic a nyi ka atre.
17 Ame la atr ka elëelëhni, ke ka ujë tune la hmo,
Ngo kola methinën la atr ka atreine tulu ewekë.*
18 Edrö ne la itre ka majemin kapa asë la hna qaja,* la qenahmo,
Ngo korona ne la itre ka atreine waiewekë, la atrehmekun.
19 Tro la itre atr ka ngazo a thil qëmekene la itre ka loi thiina,
Nge tro la itre atr ka ngazo a thil ngöne la qëhnelö ne la itre ka meköt.
20 Kolo fe a methinëne la ka pë ewekë hnene la itre ka lapa ezi angeic,
Ngo ala nyimu la itre sinee ne la trenamo.
21 Ame la atre methinëne la ka lapa easenyi angeic, ke ka kuca la ngazo,
Ngo ame la atre utipine la itre ka co, ke ka madrin.
22 Hapeu, tha tro kö a tro menu la itre atr ka eköthe la ngazo?
Ngo ame kö la itre ka isine troa kuca la loi, ke tro angatr a menuëne la ihnimi nyipici me nyipici.*
23 Hetre thangane ka loi hna kapa qa ngöne la hna catre huliwa,
Ngo tro ha pë ewekë la atr ka ithanata hi ngo pëkö hna kuca.
24 Ame la korona ne la itre ka inamacan, ke celë hi trengamo i angatr;
Ngo ame la itre ka hmo, tro pala hi angatre lai a hmo.
25 Ame la temoë ka nyipici, ke angeic a amelene la itre atr,
Ngo ame la temoë ka thoi, ke angeic a thoi lapaa tune la angeic a mano.
26 Ame la ka xoue Iehova, ke ka pexej la mejiune i angeic koi nyidrë,
Nge tro la xou cili a hnë zae ne la itre nekö i angeic.
27 Ame la troa xoue Iehova, ke qeqe ne mel,
Ej a ajeane la atr qa ngöne la itre hnö ne la mec.
28 Ame la emingömingöne la joxu, ke troa ala nyimu la itre atrene la nöj,
Ngo nyine u la troa joxu e pëkö jin.
29 Ame la atr ka hmitre troa elëhni, ke ka atreine waiewekë,
Ngo ame la atr ka thatreine itreqe, angeic a amamane la aqane menu i angeic.
30 Ame la hni ka tingeting, ke ka aegöcatrene la ngönetrei,
Ngo ame la zalu, ke ketre mec ka xuje la itre jun.
31 Ame la atr ka atrekënöne la ka co, ke angeic a qaqane la Atre Xupi nyën,
Ngo ame la atre amamane la utipine i angeic kowe la ka pë ewekë, ke kola atrunyi nyidrë.
32 Tro ha apatrene la atr ka ngazo, hnene la aqane iakötrë i angeic,
Ngo hnë zae ne la atr ka meköt la aqane mele nyipici i angeic.
33 Kola lapa hnyawa la inamacan ngöne la hni ne la atre trotrohnin,
Ngo ej a thele jëne troa pi mama thene la itre hmo.
34 Kola atrune la ketre nöj hnene la meköt,
Ngo kola ahmahmane la nöj hnene la ngazo.
35 Tru la madrin ne la joxu kowe la hlu ka atreine thelewekë,
Ngo atraqatre la elëhni i nyidrë kowe la atr ka kuca la nyine hmahman.