Iosua

18 Ame hnene la nöje Isaraela asë hna icasikeu e Silo, nge hna acil e cili la itat ne icasikeu, ke ase hë angatr thapa la nöj. 2 Ngo hetrenyi pala kö la 7 lao tribu nyine troa hamë götrane kow. 3 Matre öni Iosua jë hi kowe la angetre Isaraela: “Tro pala kö epuni a treqen uti hë eu troa thapa la nöj hna hamë epun hnei Iehova Akötresi ne la itre qaaqaa i epun? 4 Iëne jë hë la köni trahmanyi qa ngöne la isa ca tribu. Tro hë ni a upi angatr troa trongëne la nöj, nge tro angatr a fejan la itre götran nyine troa thawa kowe la itre tribu. Thupene lai, tro hmaca angatr a bëeke koi ni. 5 Tro hë angatr a thawa la nöj koi 7 lao götran. Tro kö la tribu i Iudra a lapane la itre götrane i angatr e kolojë. Nge tro kö la itre matra i Iosefa a lapane la itre götrane i angatr e kolopi. 6 Nge ase jë hi lai, tro epuni a fejan la nöj hna thawa koi 7 lao götran, me bëeke fë koi ni. Nge tro pë hë ni a uthidrönegöti* e celë qëmekei Iehova Akötresi së, matre troa thawa la nöj thatraqai epun. 7 Ngo tha tro kö a hane thue götran ne la angetre Levi nyipi epun, ke edrö i angatr la troa atre huuj koi Iehova. Nge ame la itre tribu ne Gada me Reubena, memine la ketre sine la tribu i Manase, ke ase hë hamë götrane i angatr e koië ne la hneopegejë Ioridrano, lo hna hamë angatr hnei Mose hlue i Iehova.”

8 Ame hnene la itre trahmanyi hna hnëkë troa tro. Matre hnei Iosua hna qaja kowe la itre ka troa fejan la aqane thawa la nöj ka hape: “Tro jë troa waipengöne la nöj, nge fejane jë la itre götran. Thupene lai, bëeke hmaca jë koi ni, nge tro pë hë ni a uthidrönegöti* thatraqai epun, e celë e Silo qëmekei Iehova.” 9 Ame hna tro hnene la itre trahmanyi troa waipengöne la nöj. Hnei angatr hna fejan la nöj thenge la itre traon, me thawa koi 7 lao götran. Hnei angatr hna fejane lai ngöne la ketre itus. Thupene lai, hnei angatr hna bëeke hmaca kowe la lapa e Silo, me tro fë koi Iosua. 10 Ame hnei Iosua hna uthidrönegöti* thatraqai angatr e Silo qëmekei Iehova. E cili hi la hnei Iosua hna thawa la nöj kowe la angetre Isaraela. Hnene la itre tribu hna isa kapa la itre götrane i angatr.

11 Ame la pane götran hna uthidrönegöti,* ke hna hamëne kowe la tribu i Beniamina, nge hna thawa thenge la itre fami i angatr. Ame la götrane cili, ke ej e nyipine la götran ne la tribu i Iudra, memine la götran ne la itre matra i Iosefa. 12 Ame la ifego i angatr e kolopi, ke ej a nyiqaane qa ngöne la hneopegejë Ioridrano; ej a elë kowe la sasala ne Ieriko e kolopi, me elë hmaca kowe la wetr e kuë. Nge ej a tro uti hë la hnapapa e Beth-Aven. 13 Ame la ifego, ej a tro qa lai a tro Luza, ngöne la gaa utiut e kolojë ne Luza, ene Bethela; ej a uti trootro a tro Ateroth-Adara, hune la wetr e kolojë, e Bethe-Horona e Kuhu. 14 Nge hna ami ifego i angatr e kuë; ej a kano uti hë e kolojë, qa ngöne la wetr ka qëmek a tro Bethe-Horona e kolojë; nge ej a hmaca e Kiriatha-Baala, ene Kiriatha-Iarim, ketre traon ne Iudra. Celë hi la ifego i angatr e kuë.

15 Ame la ifego i angatr e kolojë, ke ej a tro qa ngöne la pune Kiriatha-Iarim a tro kuë; ej a tro uti hë la qeqe ne tim e Nefetoa. 16 Ej a ut uti hë e kuhu trepen ne la wetr ka qëmek kowe la hnathup ne la Nekö i Hinom, lo ka ej ngöne la hnathup ne la angetre Refai e kolopi. Ej a uti qa ngöne la hnathup e Hinom, kowe la gaa utiut ne la atre Iebusi e kolojë, uti hë e Eni-Rogel. 17 Hna ami ifego i angatr ngöne la götrane kolopi; ej a tro uti hë e Eni-Semes, me tro hmaca a tro Geliloth, lo ka qëmek kowe la gaa elë e Adumim, nge ej a uti hmaca kowe la etë i Bohan nekö i Reubena. 18 Ej a tro kowe la gaa utiut e kolopi, ka qëmek kowe la Araba, me ut kowe la Araba. 19 Ame la ifego, ej a tro kowe la gaa utiut e kolopi, e Beth-Ogela, nge ej a hmaca ngöne la ngönegejë ka ej e kolopi ne la Hnagejë Sotr,* hmekune la hna itronyi ne la hneopegejë Ioridrano e kolojë. Celë hi la ifego i angatr e kolojë. 20 Ame la ifego i angatr e koië, ke ene la hneopegejë Ioridrano. Celë hi la itre ifego ne la götran hna thawa kowe la itre matra i Beniamina, nge hna thawa thenge la itre fami i angatr.

21 Nge hane hi la itre traon hna thawa thenge la itre fami ne la tribu i Beniamina: Ieriko, me Bethe-Ogela, me Keziz, 22 me Beth-Araba, me Zemari, me Bethela, 23 me Avi, me Para, me Ofera, 24 me Kefara-Hamonai, me Ofeni, me Geba. Traqa koi 12 lao traon me itre hunahmi ezin.

25 Gibeona, me Rama, me Berotha, 26 me Mizepa, me Kefira, me Moza, 27 me Rekem, me Irepel, me Tarala, 28 me Zela, me Elef, me Iebusi, ene Ierusalema, me Gibea, me Kiriatha. Traqa koi 14 lao traon me itre hunahmi ezin.

Celë hi götran hna thawa nyine edrö kowe la itre matra i Beniamina, nge hna thawa thenge la itre fami i angatr.