Angetre Amekötin
2 Ame hnene la angela i Iehova hna elë qa Gilegala a tro Bokim, me hape: “Hnenge lo hna thepe epun qa Aigupito, matre tro sai epun ngöne la nöj hnenge hna sisinyi kowe la itre qaaqaa i epun. Ketre, öninge lo: ‘Tha tro pi kö ni a apëne la isisinyikeung me epun. 2 Ame kö epun, tha tro pi kö epuni a isisinyikeu memine la itre atren la nöje celë, ngo qai epuni pe troa thëtrij la itre ita ne huuje i angatr.’ Ngazo pe, tha hnei epuni kö hna drei ni. Hnauën la epuni a ujë tun? 3 Celë hi kepin matre öninge fe lo ka hape: ‘Tha tro kö ni a helë angatr qëmekei epun. Nge tro hë angatr a trathethi epun, nge tro la itre haze i angatr a huli epun.’”
4 Thupene ju hi la kola ase qaja lai hnene la angela i Iehova, hnene la angetre Isaraela hna itreijeny. 5 Celë hi matre ati ëjene jë angatr la götrane cili, Bokim;* nge hnei angatr hna tro fë e cili la itre huuj koi Iehova.
6 Ame hë la Iosua a upe la nöj troa isa ije, hnene la angetre Isaraela hna tro kowe la götran hna isa thawa koi angatr, matre lapane la nöj. 7 Hnene la nöj hna catre nyihlue i Iehova ngöne la itre drai ne mele Iosua, me itre qatr ka mec thupei angeic. Hnene la itre qatre cili hna öhn asë la nöjei huliwa ka tru hnei Iehova hna kuca thatraqane la angetre Isaraela. 8 Thupene lai, hna mec hnei Iosua nekö i Nuna, lo hlue i Iehova; traqa koi 110 lao macatre i angeic. 9 Ame hna kelemi angeic ngöne la zi i angeic e Timena-Heres, ngöne la itre wetr e Eferaima, e kolopi ne la wetre Gasa. 10 Hna acasin asë la itre xötre cili memine la itre qaaqaa i angatr.* Ngo thatre Iehova kö hnene la xötre thupen, memine la nöjei ewekë hnei nyidrëti hna kuca koi Isaraela.
11 Matre hnene la angetre Isaraela hna kuca la ngazo qëmekei Iehova, me nyihluen la itre Baala. 12 Celë hi aqane nuetriji Iehova hnei angatr, lo Akötresie ne la itre keme i angatr, atre thepe angatr qa Aigupito. Hnei angatr hna xötrethenge la itre xaa haze ne la itre nöj xötreith; hnei angatr hna thili kow, me jel la trengehni i Iehova. 13 Hnei angatr hna nuetriji Iehova, me nyihlue i Baala, memine la itre hnasaatre i Aseira.* 14 Ame hnei Iehova hna elëhni koi Isaraela, me nue angatr kowe la itre atrekënö, matre thapa la itre ewekë i angatr. Hnei nyidrëti fe hna nue* angatr kowe la itre ithupëjia ka lapa xötreith, uti hë la thatreine hë angatre cil kowe la itre ithupëjia me angatr. 15 Ngöne la nöjei jë i angatr, hnei Iehova hna axulune* la akötr koi angatr, tune lo hnei Iehova hna qaja koi angatr, me tune lo hnei Iehova hna sisinyi koi angatr; ame hna traqa la itre akötr ka tru koi angatr. 16 Nge hnei Iehova hmaca hna hamën la itre atre amekötin, matre amele angatr qa ngöne la ime ne la itre atrekënö.
17 Ngo goi xele fe angatr ma drenge la itre atre amekötin, nge hnei angatr hna kuci ngazo* me thil kowe la itre xaa haze. Canga saqe hi angatr thëthëhmine la tulu ka lolo ne lo itre qaaqaa i angatr, lo itre ka trongën la itre wathebo i Iehova. Tha hnei angatre kö hna tune lo itre qaaqaa i angatr. 18 Ngöne la nöjei ijine Iehova a upe koi angatr la ketre atre amekötin, ke ce Iehova pala hi me angeic. Nge e nöjei drai ne mel la atre amekötin, hnei nyidrëti pala hi hna thepe angatr qa ngöne la ime ne la itre ithupëjia; ke hna amejën la trenge utipin* i Iehova, la nyidrëti a dreng la aqane awe* i angatr, pine la itre ka axösisin me akötrë angatr.
19 Ngo ame ju hi la kola mec la atre amekötin, ke angatre hmaca a kuca la ngazo, nge loi hmaca ju kö la itre huliwa ka sis hna kuca hnene lo itre keme i angatr ekö, itre ka drengethenge, me nyihluen, me thil kowe la itre xaa haze. Goi tha nuetrije fe angatr la itre huliwa me itre aqane ujë i angatr ka icilekeu. 20 Ame hna palulu la elëhni i Iehova koi Isaraela, nge öni nyidrë: “Ase hë la nöje celë thë lo isisinyikeu hnenge hna amekötin kowe la itre qaaqaa i angatr troa trongën, nge tha hnei angatre kö hna drei ni. 21 Celë hi matre, tha tro hmaca kö ni a helën la itre nöj hna tha lep hnei Iosua, lo mele pala kö angeic. 22 Qa ngöne lai, tro ni a tupath la angetre Isaraela matre wang ka hape, tro jë kö angatr a nyitipune la itre keme i angatr, me trongëne la gojeny hnei eni Iehova hna köjane koi angatr.” 23 Matre hnei Iehova pala hi hna nue la itre nöje trenyiwa troa lapa e cili. Tha hnei nyidrëti kö hna canga helë angatr, me nue angatr kowe la ime i Iosua.