Angetre Amekötin
3 Hane hi la itre nöj hnei Iehova hna nu matre troa tupathe la angetre Isaraela, lo itre ka tha hane kö öhne la itre isi e Kanana, 2 (hna aijijëne lai göne hi matre tro la itre xötr e thupen a atre la isi, ke tha hane fe kö angatr melën lai): 3 ene lo 5 lao joxu ne Filisiti, me angetre Kanana asë, me angetre Sidona me Hivi ka lapan la wetre Lebanona, nyipine la wetre Baalaheremona me Lebo-Hamath.* 4 Hna nue la itre nöje cili troa tupath la angetre Isaraela, matre wang ka hape, tro kö angatr a trongëne la itre wathebo i Iehova, lo hnei nyidrëti hna ahnith kowe la itre keme i angatr jëne Mose. 5 Matre hnene la angetre Isaraela hna mele nyipine la angetre Kanana, me Heth, me Amora, me Perizi, me Hivi, me Iebusi. 6 Nge hnene la angetre Isaraela hna xome la itre nekö i angatre jajiny troa faipoipo memin, me hamën la itre nekö i angatre jajinyi kowe la itre nöje cili. Ame hnei angatr hna nyiqaane nyihluen la itre haze ne la itre nöje cili.
7 Qa ngöne lai, hnene la angetre Isaraela hna kuca la ngazo qëmekei Iehova, me thëthëhmi Iehova Akötresi angatr, me nyihluen la itre Baala, memine la itre ipoto ka hmitrötr.* 8 Ame hna palulu la elëhni i Iehova koi Isaraela, nge hnei nyidrëti hna nue* angatr koi Kusani-Risathaima, joxu ne Mesopotamia.* Nge hnei angatr hna nyihluen la joxu cili koi 8 lao macatre. 9 Ame hnene la angetre Isaraela hna hë Iehova, me sipo ixatua koi nyidrë. Nge hnei Iehova hna upe koi angatr la ketre atre iamele: ene Otheniela nekö i Kenaza, jini Kaleba. 10 Hna huliwa la uati hmitrötre i Iehova thei Otheniela, matre ketre atre amekötin hë angeic e Isaraela. Nge ame ju hi la Otheniela a tro troa isi me Kusani-Risathaima joxu ne Mesopotamia,* hnei Iehova hna nue la joxu koi angeic. Celë hi ka aijijë angeic troa ngaa Kusani-Risathaima. 11 Thupene lai, hnene la nöj hna mele tingeting koi 40 lao macatre. Ame hna meci hnei Otheniela nekö i Kenaza.
12 Ngo hnene hmaca kö la angetre Isaraela hna kuca la ngazo qëmekei Iehova. Matre hnei Iehova pë hë hna nue Egelona joxu ne Moaba troa lepi angatr, pine angatr kuca la ngazo qëmekei Iehova. 13 Ketre, hnei Egelona fe hna ukune la angetre Amona me Amaleka troa lepi angatr. Nge hnene la itre nöje cili, hna lep la angetre Isaraela, me thapa la traon ne la itre pama.* 14 Matre hnene la angetre Isaraela hna nyihlue i Egelona joxu ne Moaba koi 18 lao macatre. 15 Thupene lai, hnene hmaca la angetre Isaraela hna hë Iehova, me sipo ixatua koi nyidrë. Ame hnei Iehova hna upe koi angatr la ketre atre iamele: ene Ehuda nekö i Gera, atre Beniamina ka sine wami. Ngöne la ketre ijin, hnene la angetre Isaraela hna upi Ehuda troa tro fë hotr* koi Egelona, joxu ne Moaba. 16 Ngöne la ijine cili, hnei Ehuda hna hnëkën la ketre taua ka ca kubit* la eqean, nge hna xöl la lue götran. Nge hnei angeic hna hnöthe la taua ngöne la itrepë maca i angeic, fene la iheetre i angeic. 17 Thupene lai, hnei angeic hna tro fë la hotr koi Egelona joxu ne Moaba, ketre atr ka tru ngön.
18 Ame hë la Ehuda a ase tro fë hotr, hnei angeic hna bëeke hmaca memine lo itre ka xututhe la hotr. 19 Ngo ame ju hi la angeic a traqa ngöne la itre idrola hna tratraun* ezin e Gilegala, hnei angeic hna bëeke hmaca kowe la joxu me hape: “Joxu, hetre macange koi nyipëti hmekuje hi!” Matre önine la joxu: “The nyi mejene kö!” Ame hnene la itre hlue i nyidrë hna nue nyidroti cas. 20 Nge hnei Ehuda hna easenyine la joxu ka lapa cas e koho hun la hnahage i nyidrë ka menyik. Öni angeice jë hi: “Ca macange koi nyipë qaathei Akötresie.” Matre mejë jë hi la joxu qa ngöne la therone i nyidrë. 21 Ame hnei Ehuda hna hul hnene la ime mi i angeic, lo taua hna hnöthe ngöne la itrepë maca i angeic, me thin alön kowe la hni i joxu. 22 Nge hna lö asë la taua memine la tan ngöne la hni i nyidrë, goi tha mama fe la taua hnene la giris i nyidrë; eje hi, tha hnei Ehuda kö hna hule hmaca la taua qa ngöne la hni i nyidrë. Ame hna hulia pi la trenge agetrine i nyidrë. 23 Nge hnei Ehuda hna kiin asë la itre qëhnelö ne la hnahag ka ej e koho hune la uma, me kötr qa ngöne la ketre verada.* 24 Thupene la Ehuda a tro, hnene la itre hlue ne la joxu hna bëeke hmaca, me öhn laka, hna kiin asë la itre qëhnelö. Matre öni angatr: “Ma nyidrëti jë a tro agö* ngöne la hnahage i nyidrë ka menyik.” 25 Ame hnei angatr hna pane itreqe, ngo tha fe pala ha nyidrë. Matre hnei angatr hna nyiqane seseu, me xom la kii, me fe la itre qëhnelö. E cili, öhne ju hi angatr la joxu i angatr e kuhu hnadro, meci hë nyidrë!
26 Hmitre i angatre pala kö, nge patre fe hë Ehuda. Angeice fe hë ezine la itre idrola hna tratraun, nge traqa hnyawa hi angeic e Seira. 27 Matre ame hë la angeic a traqa ngöne la itre wetr e Eferaima, hnei angeic hna ufi trutru; nge hnene la angetre Isaraela hna uti qa ngöne la itre wetr, me xötrethenge angeic. 28 Thupene lai, öni angeice jë hi: “Jë fe, ke ase hë Iehova nue la angetre Moaba, lo itre ithupëjia me epun.” Ame hnei angatr hna xötrethenge angeic, me thapa la itre gaa tëtë* ne la hneopegejë Ioridrano, matre tha tro kö la angetre Moaba a sasaith ej; tha hnei angatre pi kö hna nue la ketre atr troa thupa la hneopegejë. 29 Matre ame ngöne la ijine cili, hnei angatr hna humuthe la 10 000 lao atre Moaba ka catr; pëkö ala cas ka atreine kötre mel. 30 Qane ju hi lai, angetre Moaba hë a lapa fene la musi Isaraela. Ame hna mele tingeting la nöj koi 80 lao macatre.
31 Thupei Ehuda, hna acili Samegara nekö i Anath. Hnei angeic hna humuth la 600 lao Filisiti hnene la ketre usis nyine engë kau; hnei angeice fe hna hane amele Isaraela.