Angetre Amekötin
11 Ame Iefetha qa Gileada, ke ketre atr ka maca troa isi. Ketre föe ne gojeny la thine i angeic, nge Gileada la keme i angeic. 2 Nge ame fe lo sipu föi Gileada, hnei eahlo hna hnahone la itre nekö trahmany. Matre ame hë la kola tru la itre nekö i eahlo, hnei angatr hna helë Iefetha me hape: “Tha tro kö eö a hane kepe edrö qaathene la fami i kaka, ke eö la nekön ne la ketre föe.” 3 Ame hnei Iefetha hna kötrene la itre trejin me angeic, me lapa ngöne la nöje Tob. Ce angeic memine la itre atr ka pë huliwa; hnei angatr hna ce ut kowe la itre ithupëjia.
4 Ngöne la ketre ijin, hnene la angetre Amona hna tro troa isi memine la angetre Isaraela. 5 Nge ame hë la angetre Amona a isi me Isaraela, hnene la itre qatr ne Gileada hna canga tro e Tob, troa sipo Iefetha troa bëek. 6 Öni angatre jë hi: “Trohemi, nge elemeke i eahuni jë matre troa lep la angetre Amona.” 7 Ngo hnei Iefetha hna sa kowe la itre qatr ne Gileada ka hape: “Tha epuni kö lo ka methinë ni me helë ni qaathei kaka? Nge enehila la epuni a akötr, epuni ha atre ni?” 8 Ame hnene la itre qatr hna sa koi Iefetha ka hape: “Celë hi kepin matre eahuni pi la. Maine tro nyipëti a ce cas me eahun matre lep la angetre Amona, ke tro hë nyipëti a tan ne la angetre Gileada asë.” 9 Matre öni Iefetha jë hi koi angatr: “Maine tro ni a ce tro me epun troa isi me angetre Amona, nge maine tro Iehova a nue angatr koi ni, nga tro hë ni a tan i epun.” 10 Ame hnei angatr hna sa koi angeic ka hape: “Qëmekei Iehova,* tro huni a kuca asë la hnei nyipëti hna qaja.” 11 Ame hnei angeic hna ce tro me angatr, nge hnene la nöj hna acili joxu angeic me tan i angatr. Nge qëmekei Iehova, hnei Iefetha hna amexeje e Mizepa lo hnei angeice hna qaja ha.
12 Thupene lai, hnei Iefetha hna iupi fë maca kowe la joxu ne Amona ka hape: “Hnauëne la eö a traqa troa isi memine la nöjeng? Nemene la hnenge hna kuca koi ö?” 13 Ame hnene la joxu ne Amona hna sa kowe la itre ka tro fë maca ka hape: “Ame lo angetre Isaraela a traqa qa Aigupito, hnei angatr hna thapa la nöjeng, qa Arenona uti hë Iaboka, nge uti fe hë la hneopegejë Ioridrano. Haawe, hamëne hmaca pi la itre götraneng ngöne la tingeting.” 14 Ngo hnei Iefetha pe hna upe hmaca la itre ka tro fë maca kowe la joxu ne Amona 15 troa qaja ka hape:
“Hane hi la maca i Iefetha: ‘Tha hnene kö la angetre Isaraela hna thapa la nöj ne la angetre Moaba, memine la nöj ne la angetre Amona. 16 Ke eje hi, ame lo angatr a traqa qa Aigupito, hnei angatr hna trongën la hnapapa uti hë la Hnagejë Ka Palulu, me traqa e Kadesi. 17 Ame hnene la angetre Isaraela hna iupi fë maca kowe la joxu ne Edroma ka hape: “Pane nue huni pi troa thupa la nöje i nyipë.” Ngo xele kö la joxu ne Edroma. Matre hnei angatr pena hna iupi fë maca kowe la joxu ne Moaba, ngo casi pala hi. Matre hnene pë hë la angetre Isaraela hna pane lapa e Kadesi. 18 Nge ame hë la angatr a trongëne hmaca la hnapapa, hnei angatr hna tro ezine la nöje Edroma me Moaba. Hnei angatr hna koië thenge hmekune la nöje Moaba, me acil la lapa i angatr ngöne la nöje Arenona. Tha hnei angatre pi kö hna lö hnine la nöje Moaba, ke Arenona la ifego ne la nöje Moaba.
19 “‘Thupene lai, hnene la angetre Isaraela hna iupi fë maca koi Sihona joxu i angetre Amora ka musi e Hesebona, me hape: “Pane nue huni pi troa thupa la nöje i nyipë, matre tro huni a traqa kowe la götran hne huni hna mekun troa tro kow.” 20 Ngo xele kö Sihona ma nue angatr troa thupa la nöje i nyidrë, ke tha mejiune kö nyidrëti koi angatr. Matre hnei nyidrëti hna acasin la trongene isi i nyidrë, me acil la lapa i angatr e Iahaza troa isi me Isaraela. 21 Ame hnei Iehova Akötresi Isaraela hna nue Sihona me itre trongene isi angeic kowe la imene la angetre Isaraela. Celë hi aqane thapa angatre la itre götran hna lapan hnene la angetre Amora ngöne la nöje cili. 22 Qa ngöne lai, hnei angatr hna thapa la nöjei götran asë ne la angetre Amora, qaan e Arenona uti hë Iaboka, nge qaan e la hnapapa uti hë la hneopegejë Ioridrano.
23 “‘Iehova Akötresi Isaraela la ka helëne la angetre Amora qa ngöne la nöj, matre hamëne pena kowe la nöje i nyidrë. Ngo enehila, eö pe kö a mekun troa helëne la angetre Isaraela? 24 Hapeu, tha eö kö a lapan la itre nöj hna hamë eö hnei Kemosa haze i ö? Nga ame eahun, tro huni a helën la nöjei atr hnei Iehova Akötresi hun hna helën qa la, matre hamën la nöje koi hun. 25 Hapeu, sisitria kö eö hui Balaka nekö i Zipora joxu ne Moaba? Tha hnei angeice kö hna hane iwesitrë me thele isi memine la angetre Isaraela. 26 Traqa ha enehila koi 300 lao macatre ne lapa la angetre Isaraela e Hesebona me itre hunahmi ezin, me e Aroera me itre hunahmi ezin, me ngöne la itre traon ka lapa xötrën la hneopegejë Arenona. Ngo hnauëne laka, tha hnei ö kö hna thel troa xome hmaca la itre traon cili? 27 Pëkö ngazo hnenge hna kuca koi ö, matre ka tria hnyawa eö la eö a thele isi me eni. Haawe, loi e tro Iehova Atre Amekötin, a amekötin enehila la iwesitrë ne la angetre Isaraela me angetre Amona.’”
28 Ngo tha semesinene kö la joxu ne Amona la maca hna iupi fë hnei Iefetha.
29 Ame hna huliwa la ua i Iehova thei Iefetha, nge hnei angeic hna trongëne la nöje Gileada me Manase, matre traqa e Mizepa e Gileada. Nge qa cili, hnei angeic hna tro troa isi memine la angetre Amona.
30 Ame hnei Iefetha hna sisinyi koi Iehova me hape: “Maine tro nyipëti a nue ni troa ngaan la angetre Amona, 31 nge tro ni a bëeke hmaca cememine la tingeting, ke tro hë ni a hamën nyine huuj ne dreuth asë koi Iehova, la pane atr ka tro qa ngöne la umang troa ixelë me eni.”
32 Ame hnei Iefetha hna tro troa isi memine la angetre Amona, nge hnei Iehova hna nue angatr kowe la ime i angeic. 33 Ngazo catre pi hë la aqane lepi angatr hnei angeic (traqa jë kö koi 20 lao traon hnei angeic hna thapa) qa Aroera uti hë e Minith, nge uti fe hë e Keramim. Celë hi lai aqane ngaa Amona hnei Isaraela.
34 Matre ame hë la Iefetha a traqa kowe la hnalapa i angeic e Mizepa, ke hnene la nekö i angeic jajinyi hna tro troa ixelë me angeic. Nyën a lepelep la itrapë me fiafia, nge nyëne hmekuje hi la nekö i angeic. Pëkö xaa nekö i angeic trahmany maine jajiny. 35 Matre ame hë la angeic a öhne la nekö i angeic a fetra, hnei angeic hna kuie zezen la iheetre i angeic me hape: “Ekölöhini neköng! Hace hë la hning,* ke asë hë ni akötrë hmunë. Asë hë ni sisinyi koi Iehova, nge thatreine hmaca kö ni troa apëne hmaca.”
36 Ngo öni nyën jë hi: “Kaka, maine asë hë nyipëti sisinyi koi Iehova, kuca jë tun lo hnei nyipëti hna qaja. Ke ase hë Iehova aijijë nyipë troa të kowe la angetre Amona, lo itre ithupëjia me nyipë.” 37 Nge öni nyën hmaca jë hi: “Ngo casi hi la sipong, pane nue ni pi troa ce tro me itre sineeng koi lue treu ngöne la itre wetr, matre tro huni a treij, ke tha tro hmaca kö ni a faipoipo.”
38 Matre öni Iefetha jë hi: “Tro jë.” Hnei angeic hna pane nue nyën troa tro koi lue treu. Matre hnei nyën hna ce tro memine la itre sinee i nyën hune la itre wetr, me treije pin laka, tha tro hmaca kö nyën a faipoipo. 39 Thupene la lue treu, hnei nyën hna bëeke hmaca kowe la keme i nyën. Ame hnei Iefetha hna eatrën lo hnei angeic hna sisiny, nge tha hnei nyëne kö hna hane iatre me trahmany. Qa ngöne lai, hna acil la ketre qenenöje* ka hnyipixe e Isaraela, laka: 40 E nöjei macatre, tro la itre nekö jajinyi ne Isaraela a tro koi 4 lao drai, troa atrune la nekö i Iefetha atre Gileada.