Angetre Amekötin
17 Hetre ketre atr ka mel ngöne la itre wetr e Eferaima, Mika la ëjen. 2 Ame ngöne la ketre drai, öni angeic kowe la thine i angeic: “Mekune pala hi eapo lo 1 100 lao pies sileva hna xom qaathei eapo, memine lo eapo a ejin qëmekeng la atrekënö? Nga eni hi la ka xome la mani cili.” Matre önine jë hi la thine i angeic: “Epi tro Iehova a amanathithine la neköng.” 3 Ame hnei angeic hna hamëne hmaca la 1 100 lao pies sileva kowe la thine i angeic, ngo öni eahlo jë hi: “Loi e tro ni a huliwane la mani cili thatraqai* Iehova. Xome jë la mani nyine kuca la ketre idrola hna tratraun, me ketre idrola hna ahmun. Matre öhö, xome jë.”
4 Ame hë la angeic a hamëne hmaca la mani kowe la thine i angeic, hnei eahlo hna xome la 200 lao pies sileva, matre hamëne pena kowe la atre huliwa sileva. Nge hnei nyidrëti pë hë hna kuca la idrola hna tratraun, memine la idrola hna ahmun, nge hna amë la lue idrola ngöne la uma i Mika. 5 Hetre hnë hmi i Mika, matre hnei angeic hna kuca la ketre iefoda,* me itre neköi idrola* ne hnalapa. Nge angeic a acile jë la ketre nekö i angeic trahmany troa atre huuj. 6 Ngöne la ijine cili, pë pala kö joxu e Isaraela, matre angatr a isa amekötin la ka loi* koi angatr.
7 Ngo ame e Bethelema e Iudra, hetre nekö trahmanyi qa ngöne la fami i Iudra,* ketre atre Levi angeic. Hnei angeic hna lapa e cili koi hnepe ijine hi. 8 Thupene lai, hnei angeic hna tro qa Bethelema e Iudra, matre thel la ketre götran hnë lapa. Nge traqa ju hi angeic ngöne la itre wetr e Eferaima, ngöne la hnalapa i Mika. 9 Ame hnei Mika hna hnyingë angeic ka hape: “Eö a traqa qa kaa?” Sa jë hi la nekö trahmanyi ka hape: “Atre Levi ni qa Bethelema e Iudra, nge eni a thel la ketre götran matre troa lapan.” 10 Nge öni Mika hmaca jë hi: “Nga lapa ju e celë ngöne la hnalapang, nge tro hë eö a nyi kemeng,* me atre huuj koi ni. E nöjei macatre, tro ni a hamë eö la 10 lao pies sileva, me ca hnaheetr ka pexej, nge qanyinge kö ithua i ö.” Ame hnei angeic hna lö kowe la hnalapa i Mika. 11 Hnene la atre Levi hna kapa la ihë i Mika, me lapa thei nyidrë, kösë sipu nekö i nyidrë. 12 Ketre, hnei Mika hna upe la atre Levi troa atre huuj koi nyidrë, nge hnei angeic hna lapa thei Mika. 13 Matre öni Mika jë hi: “Atre hë ni enehila laka, tro Iehova a amanathithi ni, ke ase hë kapa hnene la atre Levi troa atre huuj koi ni.”