Salamo
Thatraqane la atre jumi traem; nyine nyima ngöne Ieduthun.* Salamo i Asafa.
77 Tro ni a hë koi Akötresie;
Tro ni a hë draië koi nyidrë, nge tro nyidrëti a hnangenyë ni.
2 Ame ngöne la itre drai ne akötr, eni a thele Iehova.
Tha mano kö* ni xeji ime draië koi nyidrëti e jidr.
Pëkö ka atreine aupunyi ni.
3 Eni a meku Akötresie me treije latresi;
Eni a hnehengazo, nge kola patre trootro la trengecatreng.* (Sela)
4 Nyipëti a fe la luemekeng;
Eni a seseu, thatreine kö ni ewekë.
5 Eni hmaca a mekun lo itre drai ekö,
Lo itre macatre ka hekö hë.
6 Ame e jidr, eni a mekune lo nyimang;*
Eni a lapa mekun e kuhu hning;
Eni a ithele hnyawa göne la itre hnying celë:
7 Tro palua kö Iehova a triji hun?
Tro hmaca kö nyidrëti a kepe hun?
8 Patre palua ha la ihnimi nyipici i nyidrë?
Tro kö la itre xötr elany a öhne la kola eatre la hnei nyidrëti hna thingehnaean?
9 Thëthëhmine hë Akötresie troa kepe së?
Maine pena, hnene kö la elëhni nyidrëti hna apatrene la utipine i nyidrë? (Sela)
10 Tro kö ni a qaja lapaan ka hape:
“Ame la ka akötrë* ni, ke saze hë la aqane ujë* ne la Ka Draië Catr koi hun”?
11 Tro ni a mekune la itre huliwa i Ia;
Tro ni a mekune lo itre huliwa i nyipë nyine hain qaane lo itre drai ekö.
12 Tro ni a lapa mekun la nöjei huliwa i nyipëti asë
Nge pi tro ni a mekun la itre aqane ujë i nyipë.
13 Akötresieti fe, ka hmitrötre la itre jë i nyipë.
Akötresieti fe, drei la haze ka sisitria tui nyipë?
14 Nyipëti la nyipi Akötresie, atre kuca la itre ewekë ka mingöming.
Hnei nyipëti hna amamane la mene i nyipëti kowe la itre nöj.
15 Ase hë nyipëti amelene* la nöje i nyipë hnene la mene* i nyipë,
Ene la itre nekö i Iakobo me Iosefa. (Sela)
16 Akötresieti fe, hnene la itre tim hna öhnyi nyipë;
Hnene la itre tim hna öhnyi nyipë me hmengöhmengön.
Nge hna enienije la itre gaa jui.
17 Hna trotro la mani qa ngöne la itre iaw.
Hna ulil la hedreng qa ngöne la itre iaw,
Nge hna sesë e celë me e cili la itre ane pehna i nyipë.
18 Ame la mejen ne la hedrenge i nyipë, ke kösë itre wiil ne ikatr;
Hnene la samek hna ahudrumene la fene hnengödrai;*
Ame hna kötrekötr me enienije la ihnadro.
19 Hnei nyipëti hna fe gojeny nyipine la hnagejë,
Ketre jë ne tro nyipine la itre hneopegejë;
Ngo pëkö ka atreine öhne la itre thupaca i nyipë.
20 Hnei nyipëti hna engëne la nöje i nyipë tune la hnënge mamoe,
Jëne la ime i Mose me Arona.