Pane Tus Samuela
10 Thupene lai, Samuela a xome pi la ketre neköi butei oel, me neng hune la he i Saulo. Nyidrëti a dremi angeice jë me hape: “Nyipici, hnei Iehova hna ië eö troa joxu kowe la nöje i nyidrë. 2 Enehila, thupene la eö a tro qaatheng, tro eö a ixelë me lue trahmany, ezine la hua i Rakela, ngöne la itre lapa i Beniamina e Zeleza. Tro nyidroti a hape koi eö: “Öhne hmaca ha lo itre boliko hnei eö hna thel. Ngo enehila, tha keme i eö hmaca kö a hnehengazo itre boliko, ngo epone pe. Nyidrëti a thele la aqane troa öhne hmaca la nekö i nyidrë.” 3 Thupene lai, tro jë kowe la sinöe atraqatr e Tabora. Nge tro hë eö a ixelë me köni trahmany ka elë a tro Bethela. Angatr a tro troa hmi kowe la nyipi Akötresie. Tro la ketre a xome trongëne la köni neköi nani, nge tro la ketre a xome la köni falawa, nge tro la hnaakönin a xututhe la trengene waina ka tru. 4 Tro angatr lai a hnyingëne ka hape, tune kaa eö. Nge tro angatr a hamë eö la lue falawa, nge tro eö a kapa. 5 Thupene lai, tro hë eö a elë kowe la sasala ne la nyipi Akötresie. Nge tro eö a öhne la itre sooc i angetre Filisiti. Nge ame hë la eö a lö hnine la traon, tro eö a ixelë me itre perofeta ka uti qa ngöne la hnë hmi gaa hmitrötr, nge angatr a isa perofeta. Nge qëmeke i angatr, tro eö a öhne la itre atr ka elone la itre nyine elo miuzik ka hetre ifilen, me lepe itrapë, me ufi neköi trutru, me elo arp. 6 Nge tro hë la uati hmitrötr i Iehova a huliwa hui ö, nge tro fe hë eö a ce perofeta me angatr, matre kösë ketre atr pena ha eö. 7 Haawe, e eatre hë la nöjei ewekë cili, isine jë troa eatrëne la hnëqa i eö, ke ce eö memine la nyipi Akötresie. 8 Thupene lai, tro eö a uti a tro Gilegala. Tro eö a tro pa, nge qanyinge pë hë troa tro fë la itre huuj ne dreuth asë, me itre huuj ne tingeting. Nge tro eö a pane itreqe koi 7 lao drai qëmeken tro ni a traqa. Nge tro hë ni a traqa koi eö, me qaja la nyine tro eö a kuca.”
9 Saulo a trotriji Samuela jë. Matre qaane ju hi lai, Akötresieti a nyiqaane saze la hni Saulo. Nge ngöne la drai cili, hna eatr asë la nöjei ewekë hna qaja hnei Samuela. 10 Hnei Saulo me hlue i angeic hna tro kowe la sasala, nge ixelë ju hi angeic me itre perofeta. Matre hnene la ua i Akötresie hna huliwa hui angeic, nge angeic a nyiqaane ce perofeta jë me angatr. 11 Nge ame hë la kola öhnyi angeic e perofeta me itre perofeta, önine la itre ka atre angeic ka hape: “Nemene la ka traqa kowe la nekö i Kiso? Perofeta ha Saulo?” 12 Sa jë hi la ketre atr qa cili ka hape: “Drei la keme i angatr?” Nge qa cili hi lo trengewekë hna hape: “Perofeta ha Saulo?”
13 Ase jë hi Saulo perofeta, angeic a tro ju kowe la hnë hmi gaa hmitrötr. 14 Nge e thupen, hnene la trejin memine la keme i Saulo hna hnyinge koi angeic me hlue i angeic ka hape: “Qai epon ekaa?” Sa jë hi Saulo ka hape: “Qai nyio hna thele la itro boliko, ngo tha öhne ju kö nyio. Matre nyio pë hë a tro ju koi Samuela.” 15 Matre önine lo keme i Saulo koi nyidro ka hape: “Pane qaja jë koi ni la hnei Samuela hna qaja koi epon.” 16 Öni Saulo: “Öni nyidrë koi nyio ka hape, öhne hë lo itro boliko.” Ngo tha qaja pi kö Saulo laka, tro angeic a joxu.
17 Samuela a hëne jë la nöj troa cil qëmeke i Iehova e Mizepa. 18 Nge öni nyidrë koi angetre Isaraela: “Drenge la hna qaja hnei Iehova, Akötresi Isaraela. Eni lo ka thepe Isaraela qa Aigupito, nge ka thepe nyipunie qaathei angetre Aigupito, me nöjei mus ka akötrë nyipunie. 19 Ngo enehila, nyipunieti a thipetrije la Akötresi nyipunie, lo atre Amele nyipunie qa ngöne la nöjei akötr me hleuhleu. Nge öni epun, qa i eö troa ië joxu hun. Haawe, cile jë qëmeke i Iehova, thenge la isa tribu, me lapa i epun.
20 Samuela a alemine jë la nöjei tribu ne Isaraela, nge hna iëne la tribu i Beniamina. 21 Thupene lai, nyidrëti a alemine jë la tribu i Beniamina, thenge la isa lapa, nge hna iëne la lapa i Materi. Ame hna ië Saulo nekö i Kiso. Matre angatr a thele angeice jë, ngo patre kö angeic. 22 Angatr a hnyinge jë koi Iehova me hape: “Angeic hi e celë?” Sa jë hi Iehova ka hape: “Angeic hi e ce, kola zae nyipine la itre watreng ka tru.” 23 Angatr a nyinyape pi troa thele angeic, matre Saulo a cile jë nyipine la angetre Isaraela. Nge qaane la lue hnaiape i angeic uti hë la he, draië catre kö angeic hune la nöjei atr. 24 Öni Samuela jë hi kowe la nöj: “Öhne hi epun la hnei Iehova hna iën? Pëkö ka tui angeic ngöne la nöj.” Matre hnene la nöj hna suene ka hape: “Epi manathithe la joxu!”
25 Samuela a qaja jë kowe la nöj, la nöjei ewekë hna aijijëne la joxu troa kuca, nge angeic a fejane jë ngöne la ketre itus, me amë qëmeke i Iehova. Thupene lai, hnei angeic hna upe la angetre Isaraela troa isa ije, me isa bëeke koi hnalapan. 26 Hnei Saulo fe hna bëeke kowe la hnalapa i angeic e Gibea. Nge ce angeic me itre xa sooc, ke hna ketr la hni angatr hnei Iehova. 27 Ngo önine pe la itre xa ka pë hnënyöngön ka hape: “A tro angeic la a amele së tune kaa?” Angatr a methinë Saulo, nge xele fe angatr ma tro fë ahnahna koi angeic. Ngo pëkö hna sa hnei Saulo.*