Pane Tus Samuela
23 Thupene lai, hna thuemacanyi Dravita laka, angetre Filisiti a isi me angetre Keila, nge angatr a atrekënö xen ngöne la hnë lepe qitr. 2 Matre Dravita a hnyinge jë koi Iehova me hape: “Tro kö ni a tro troa isi me angetre Filisiti?” Nge sa jë hi Iehova ka hape: “Tro jë, isi jë me angetre Filisiti, nge amele Keila jë.” 3 Ngo önine la itre atre i Dravita ka hape: “Dreng! Eahuni a xou nge easë pala kö e Iudra, matre the qaja pala ha e traqa pi së e Keila, me isi me itre soce i angetre Filisiti!” 4 Dravita a hnyinge hmaca jë koi Iehova, nge öni Iehova: “Tro jë e Keila, ke tro ni a xatua eö troa ngaa angetre Filisiti.” 5 Dravita a tro ju a tro Keila me itre atre i angeic, troa isi me angetre Filisiti. Ala nyimu la angetre Filisiti hnei angeic hna humuth, nge angeic a xome pi la itro öni i angatr. Celë hi aqane amele angetre Keila hnei Dravita.
6 Ame lo Abiathara, nekö i Ahimelek a kötr koi Dravita e Keila, hnei angeic hna xometrongëne la ca iefoda.* 7 Ame hna qaja koi Saulo ka hape, Dravita e Keila. Matre öni Saulo: “Ase hë Akötresie nue* angeic koi ni, ke jötre hë Dravita, hnei angeic hna sipu lö kowe la traon hna thinge la qëhnelö hnei agö.” 8 Matre Saulo a hën asë jë la itre soce i nyidrë, troa isi me Dravita me itre sinexöle i angeic e Keila. 9 Nge ame hë la Dravita a drenge laka, mai Saulo hë lai troa isi, öni angeic koi Abiathara, lo atre huuj: “Traqa fë pi la iefoda e ce.” 10 Nge öni Dravita hmaca: “Iehova fe, Akötresi Isaraela, drei mejene hë ni laka, mai Saulo hë lai, nge aja i nyidrë troa lep apatrenyi Keila pi ni. 11 Nge tro kö la itre he ne nöj* e Keila a nue ni koi Saulo? Nyipici kö ka hape, tro Saulo a traqa troa isi me eahun? Iehova fe, Akötresi Isaraela, epi tro nyipëti a sa koi ni.” Nge öni Iehova jë hi: “Mai angeice hë lai.” 12 Öni Dravita jë hi: “Tro kö la itre he ne nöj e Keila a nue ni, me itre atreng koi Saulo?” Sa jë hi Iehova ka hape: “Tro angatr a nue epuni koi Saulo.”
13 Ame hnei Dravita hna canga mejë qa Keila. Nge drenge hë Saulo, ngo tha huzu Dravita kö hnei nyidrë. Ala 600 Dravita me itre atre i angeic, nge angatr a feke trootro kowe la itre götrane hnei angatr hna öhn. 14 Dravita a lapa ngöne la hnapapa ne Zif, me zae ngöne la itre götrane gaa jol ne la wetr. Meci hë Saulo hna thel agö angeic, ngo tha nue kö Iehova tro Saulo a öhnyi Dravita. 15 Nge ame lo Dravita a lapa e Horec, ngöne la hnapapa ne Zif, drenge* ju hi angeic ka hape, hnei Saulo hna hnëkë trongene isi troa humuthi angeic.
16 Ngöne la ketre drai, hnei Ionathana nekö i Saulo, hna tro koi Dravita e Horec. Ionathana a xatua Dravita jë troa acatrene* la mejiune i angeic koi Iehova. 17 Öni Ionathana: “The xou kö, ke tha tro kö kaka a öhnyi eö. Tro kö eö a joxu i Isaraela, nge tro ni a hnaaluen thupei eö. Atre hi kaka lai.” 18 Ame hnei Ionathana me Dravita hna isisinyikeu qëmeke i Iehova. Dravita a lapa ju e Horec, nge Ionathana a bëeke ju kowe la hnalapa i angeic.
19 Ame hë la ketre ijin, hnene la angetre Zif hna tro koi Saulo e Gibea, me hape: “Dravita e hnine la itre hnë zae e Horec, hune la wetr e Hakila, götrane kolojë* e Iesimon.* 20 Matre joxu, maine aja i nyipë, ijiji nyipëti hi troa traqa koi hun, nge tro huni a nue Dravita koi nyipë.” 21 Nge öni Saulo ka hape: “Epi tro Iehova a amanathithi epun, ke hnei epun hna utipi ni. 22 Ngo tro jë, nge thele jë la hmeku i angeic. Nge thele jë fe la itre ka öhnyi angeic e cili, ke atre catr angeic iewath. 23 Thele jë la nöjei götrane hnei angeice hna zae, nge bëeke fë jë koi ni la itre ithuemacanyi ka nyipici, matre tro pë hë ni a ce tro me epun. Nge e traqa ju ka hape, angeic e Iudra, tro ni a thel agö angeic ngöne la nöjei lapa ne Iudra.”
24 Hnene la itre atrene Zif hna tro qaathei Saulo, me bëeke koi isa hnalapan. Nge ngöne la ijine cili, ce Dravita me itre atre i angeic ngöne la hnapapa e Maon, hmekune la Araba,* götrane kolojë ne Iesimon. 25 Ame hnei Saulo me itre soce i nyidrë hna tro troa thele Dravita. Matre ame hë la kola qaja lai koi Dravita, angeic a canga tro ju kowe la ketre git ngöne la hnapapa e Maon, me lapa e cili. Nge ame ju hi la Saulo a atre, nyidrë a thele Dravita jë ngöne la hnapapa. 26 Saulo a fetra pi ngöne la ketre pala ne la wetr, nge Dravita me itre atre i angeic a lapa ngöne la ketre pala. Matre hnei Dravita me itre atre i angeic hna canga thele troa kötre Saulo. Ngo Saulo pala hi me itre soce i nyidrë a easenyi trootro koi angatr, matre troa xolouthi angatr. 27 Ame hna traqa pi koi Saulo la ketre atr ka tro fë maca. Öni angeic: “Loi e tro nyipëti a canga bëek, ke kola ha isi hnei angetre Filisiti memine la nöj.” 28 Saulo a nue Dravita pi, me tro troa isi me angetre Filisiti. Celë hi matre hëne jë la giti celë ka hape, Giti Ne Inu.
29 Haawe, Dravita a tro pi qa lai, me lapa ngöne la itre götrane gaa jole troa tro kow ezine Eni-Gedi.