Mika
2 “Ekölöhini la itre ka mekun troa kuca la ngazo,
Itre ka hnëkëne la ngazo hune la ili i angatr!
Nge e lai hë, angatr ha eatrën,
Ke ijiji angatre hi.
2 Angatr a meciun me thapa la itre hlapa;
Ketre tune mina fe kowe la itre uma;
Angatr a qenatrekënö matre thapa la uma i ketre,
Memine la edrö ne la ketre atr.
3 Celë hi matre, öni Iehova:
‘Eni a hnëkëne la ketre akötr kowe la nöje ce,* nge pëkö ka atrein troa neën.*
Tha tro hmaca kö epuni a tro me pi tru, ke ijine akötre lai.
4 Ngöne la drai cili, tro ha eetre pi epun,
Me treije latresi pi epun.
Tro ha qaja ka hape: “Luzi asë hë la itre ewekë së!
Hnei nyidrë hna hamën koi itre xan la edrö ne la nöje së! Hnei nyidrëti hna thapa lai qaathe së!
Hnei nyidrë hna hamëne la itre hlapa së kowe la itre ka tha mele nyipici kö.”
5 Matre ame ngöne la nöje i Iehova, pëkö ca
Ka troa tuluthe la nöj memine la ketre eno me thawa ej.
6 Öni angatr, “Loi ju hë hna cainöj!*
Tha tro kö a cainöjëne la itre ewekë celë;
Tha tro kö a traqa koi së la hmahma!”
7 Nöje i Iakobo fe, hetre ka qaja kö thei ö ka hape:
“Hapeu, thatreine hë la ua i Iehova troa itreqe?
Nyipici kö laka, itre aqane ujë i nyidrëti lai?”
Tha kolo kö a akeukawane la itre ka meköt hnene la itre trengewekëng?
8 Ngo eue hi lo, hnene la nöjeng hna mejë kösë ithupëjia.
Qëmekei nöjei atr, epuni a huletrije la emingömingöne la iheetr
Ne la itre atr ka tro hnyawa, tune lo itre ka bëeke qa hna isi.
9 Epuni a helëne la itre föe ne la nöjeng qa ngöne la itre uma i angatr ka mingöming;
Epuni a thapa paluane la elolong qaathene la itre nekö i angatr.
10 Cile jë nge tro jë, ke tha hnë mano hmaca kö la götrane celë.
Pine laka, pui ngazo hë la nöj, tro ha apatren ej, nge tha fene akötre kö.
11 Maine tro la atr ka nyenyape thenge la eny me iaö a thoi ka hape:
“Tro ha tiqa hnei waina me kahaitr i epun,”
Tro hë epuni lai a canga kepe angeic ceitu me ketre perofeta!
12 Eje hi, tro ni a acasi ö Iakobo;
Tro ni a nyipi acasine la angetre Isaraela ka lapa pe.
Tro ni a acasi angatr asë, tune la itre mamoe ngöne la ihag,
Tune la hnënge öni ngöne la hna axö öni;
Nge tro ha tru la mej e cili.’
13 Ame la atre thë la ihag, ke tro angeic a tro pa;
Tro angatr a fe atrune la gaa kaqa, me cili thenge matre tro qa lai.
Tro la joxu i angatr a tro qëmekei angatr,
Nge Iehova la ka elemeken.”