Numera

15 Öni Iehova koi Mose: 2 “Qaja jë kowe la angetre Isaraela, ka hape: ‘Ame hë la epuni a lö kowe la nöj hnenge hna hamë epuni troa lapan, 3 nge tro epuni a huujëne koi Iehova la ketre öni ka tru maine öni ka co nyine huuj ne eë ka pui loi* koi Iehova (ene la huuj ne dreuth asë, maine huuj nyine sisiny troa eatrëne la ketre ewekë ka ketrepengön, maine huuj hna tro fë xanën, maine huuj hna tro fë ngöne la itre ijine feete i epun), 4 qa ne la atr ka tro fë huuj, troa tro fë koi Iehova la ca huuj ne la itre wene feja, ene la ca omera* ne farin ka lolo hna ce lomën me ca sine* hine ne oel. 5 Nge ame la epuni a tro fë la huuj ne dreuth asë maine huujëne la ketre neköi mamoe, tro fe epuni a tro fë la ca sine hine waina nyine fii huuj. 6 Nge ame göne la mamoe trahmany, tro epuni a tro fë la huuje ne wene feja, ene la lue omera* ne farin ka lolo hna ce lomën me ca sine* hine oel. 7 Nge tro epuni a tro fë la ca sine* hine waina nyine fii huuj, matre pui loi koi Iehova.

8 “‘Ngo maine epuni a huujëne la ketre kau nyine huuj ne dreuth asë, maine ketre huuje pena, matre eatrëne la ketre ewekë hna sisiny, maine nyine huuj ne tingeting koi lehova, 9 tro epuni a ce tro fë memine la kau, la huuje ne wene feja, ene la köni omera* ne farin ka lolo hna ce lomën me ca sine hine* oel. 10 Nge tro fe epuni a tro fë la ca sine hine* waina nyine fii huuj, nyine huuj ne eë ka pui loi koi Iehova. 11 Celë hi aqane troa kuca kowe la nöjei kau, me nöjei mamoe trahmany, me nöjei neköi mamoe, me nöjei nani föe. 12 Ngacama nyimutre ju hë la itre öni hnei epuni hna troa huujën, ngo celë hi aqane tro epuni a kuca kowe la isa ca öni, thenge la etrune la itre öni. 13 Hane hi la aqane tro la angetre Isaraela a tro fë huuj ne eë ka pui loi koi Iehova.

14 “‘Maine hetre trenyiwa ka lapa thei epun, maine ka hekö hë ngöne la nöj, tro fe angeic a tro fë huuj ne eë nyine pui loi koi Iehova, qa i angeic troa kuca tune la aqane kuca i epun. 15 Casi hi la wathebo koi epuni asë, angetre Isaraela me itre trenyiwa ka lapa thei epun. Celë hi wathebo ka cile hut ngöne la nöjei xötr asë. Ame koi Iehova, ceitu i epuni hi memine la trenyiwa. 16 Casi hi la wathebo me hna amekötin thatraqai epun, memine la trenyiwa ka ce lapa me epun.’”

17 Öni Iehova hmaca jë hi koi Mose: 18 “Qaja jë kowe la angetre Isaraela ka hape: ‘Ame la epuni a troa lö kowe la nöj hnenge hna tro sai epuni kow, 19 me xeni la falawa* ne la nöj, ke tro epuni a hamë ahnahna koi Iehova. 20 Tro epuni a hamë ahnahna qa ngöne la pane* farin ka tru i epun; qa i epuni troa sa falawa kösë korona. Nge tro epuni a tro fë ej tune la aqane tro fë ahnahna hna xom qa ngöne la hna lepe qitr. 21 Nge ngöne la nöjei xötr asë, qa i epuni troa hamë ahnahna koi Iehova qa ngöne la pane farin ka tru i epun.

22 “‘Maine tro epuni a tria, me tha trongëne la nöjei wathebo hnei Iehova hna ahnithe koi Mose, 23 (ene la hnei Iehova hna ahnithe koi epun, me itre matra i epun jëne Mose, qaane lo drai ne hamëne Iehova la itre wathebo cili koi epun), 24 nge maine thatre kö la nöj la tria hna kuca, tro hë angatr a huujëne la ca neköi kau nyine huuj ne dreuth asë ka pui loi koi Iehova, cememine la huuj ne wene feja, me waina nyine fii huuj thenge la hna amekötin, me ca neköi nani nyine huuj ne ngazo. 25 Nge qa ne la atre huuj troa kuca la huuj ne ialoinekeun kowe la angetre Isaraela asë, göi troa nue la ngazo i angatr, ke eje hi, hnei angatr hna tria. Hnei angatre lo hna tro fë huuj ne eë koi Iehova, memine la huuj ne ngazo qëmekei Iehova, pine la tria i angatr. 26 Qa ngöne lai, tro ha nue la ngazo ne la angetre Isaraela, memine la trenyiwa ka lapa nyipi angatr, ke tria lai hna kuca hnene la nöj asë.

27 “‘Nge maine tro la ketre atr a tria nge tha hna thë kö, qa i angeic troa tro fë huuj ne la ngazo, ene la ca nani föe ka ca macatre. 28 Tro la atre huuj a kuca la huuj ne ialoinekeun qëmekei Iehova, kowe la atr ka tria nge tha hna thë kö. Tro la atre huuj a kuca la huuj ne ialoinekeun, nge tro ha nue la ngazo ne la atr ka tria. 29 Ame göne la tria hna kuca nge tha hna thë kö, ke casi hi la wathebo kowe la angetre Isaraela, memine la trenyiwa ka lapa thei epun.

30 “‘Ngo maine tro la ketre atr (atre Isaraela maine ketre trenyiwa) a kuca atre la ngazo, angeice hi lai a qaja angazo Iehova; tro ha apatrene la atre cili qa ngöne la nöj. 31 Nyipiewekë troa canga humuthi angeic, pine angeic methinëne la trengewekë i Iehova me sasaithe la wathebo i nyidrë. Tro hë angeice lai a xeni pune la ngazo i angeic.’”

32 Ame lo angetre Isaraela pala kö ngöne la hnapapa, hna öhn la ketre trahmanyi ka hle sinöe ngöne la drai sabath. 33 Hnene la itre atr ka öhnyi angeic hna tro sai angeic koi Mose me Arona memine la nöj asë. 34 Ame hna thupë angeice hnyawa, ke tha nyipi mama pala kö la nyine troa kuca koi angeic.

35 Matre öni Iehova jë hi koi Mose: “Troa humuthe la atre cili, tro la nöj asë a tranyi angeic hnei etë tröne la lapa.” 36 Ame hnene la nöj asë hna tro sai angeic tröne la lapa me tranyi angeic hnei etë. Nge hnei angeic hna mec e cili, tune la hna ahnith hnei Iehova jëne Mose.

37 Öni Iehova hmaca jë hi koi Mose: 38 “Ithanata jë memine la angetre Isaraela, nge upi angatre jë ka hape, ngöne la nöjei xötr asë, tro angatr a kuca la ketre xötr ezine ngöne la pune la iheetre i angatr, me amë la eno ka bulu hune la xötr ezin. 39 ‘Loi e tro epuni a hetre xötr ezin ngöne la itre iheetre i epun, matre ame hë la epuni a goeën ej, ke tro ej a amekunë epun la itre wathebo i Iehova, me upi epun troa trongën. Tha tro kö epuni a xötrethenge la itre hni i epun, me luemeke i epun, ke celë hi ka uku epun troa nyixetënetrije la hmi. 40 Tro ej a xatua epun troa lapa mekun la nöjei wathebong asë, matre tro epuni a trongën itre ej, nge matre tro hë epuni a hmitrötr kowe la Akötresi epun. 41 Iehova ni, Akötresi epun, atre lö sai epun qa Aigupito, matre mama jë laka, eni la Akötresi epun. Iehova ni Akötresi epun.’”