Hnaaluene Tus i Samuela
6 Dravita a hëne hmaca jë la itre soc ka maca ne Isaraela, ala 30 000. 2 Nge Dravita me itre soce i nyidrë a tro ju a tro Baala-Iudra, troa xome la Pua ne la nyipi Akötresie. Nge itre atr a thithi qëmekene la Pua koi Iehova, Joxu ne la itre trongene isi e hnengödrai, nge atre lapane la therone i nyidrë hune* la itre kerubi. 3 Angatr a tro ju koi Abinadab ka lapa hune la sasala, ngo hnei angatre hna atë la Pua ne la nyipi Akötresie hune ikatr ka hnyipixe. Nge Uza me Ahio, lue nekö i Abinadab, la ka wejemeken.
4 Angatr a xome ju la Pua ne la nyipi Akötresie qa ngöne la uma i Abinadab, lo ka cil hune sasala. Angatr a atë jë la Pua hune la ikatr. Nge Ahio a tro qëmekene la Pua. 5 Nge Dravita me Isaraela asë a feetëne lai qëmeke i Iehova. Angatr a elone la itre nyine elo miuzik hna kuca hnei göti ka lapalapa, me itre arp, me itre xa nyine elo miuzik ka hetre ifilen, me itre itrapë, me itre xa nyine lepelep, me itre sëbal.* 6 Nge ame hë la angatr a traqa kowe la hnë lepelepe qitr e Nakan, hnene la itre kau hna troa akeine la Pua ne la nyipi Akötresie, matre hnei Uza hna li im troa xolouth ej. 7 Ngo kolo ke hnei angeice hna tha metrötrëne la wathebo i Akötresie, matre hna elëhni* hnei Iehova koi Uza, nge nyidrëti a humuthi Uza pi. Haawe, meci ju hi Uza e cili, ezine la Pua ne la nyipi Akötresie. 8 Nge tha madrine kö Dravita pine Iehova lepi Uza. Matre qaane ju hi lai, hna hëne la götrane cili ka hape, Farez-Uza.* 9 Nge ngöne la drai cili, hnei Dravita hna xoue Iehova. Matre öni angeic: “Tro ni a alöne tune kaa la Pua i Iehova hnine la traoneng?” 10 Xele ju hi Dravita ma alöne la Pua i Iehova hnine la Traone i Dravita, lo hna lapa hnei nyidrë. Ngo Dravita a amë ju la Pua hnine la hnalapa i Obed-Edoma, lo atre Gatha.
11 Köni treu ne pane lapa la Pua i Iehova hnine la hnalapa i Obed-Edoma, atre Gatha. Nge Iehova a amanathithi angeic, me fami i angeic asë. 12 Ngöne la ketre drai, hna thuemacanyi Dravita ka hape: “Iehova a amanathithi Obed-Edoma, me fami angeic, me nöjei ewekë i angeic, ke thei angeic la Pua ne la nyipi Akötresie.” Matre Dravita a tro ju troa xome qa ngöne la hnalapa i Obed-Edoma la Pua ne la nyipi Akötresie, me iup troa kapa trongën uti hë ngöne la Traone i Dravita. Nge madrine catre la itre atr. 13 Ame hë la kola a 6 lao feke ca hnene ka itre ka kapa trongëne la Pua i Iehova, Dravita a huujëne jë la ketre kau, me ketre öni ka giris.
14 Dravita a fiafia catr me xötre kano qëmeke i Iehova, nge nyidrë a heetrëne* la iefoda lino. 15 Dravita me nöje Isaraela asë a xötrethenge la Pua i Iehova, nge angatr a sue madrin me ufi trutru. 16 Ngo ame ju hi la kola lö la Pua i Iehova hnine la Traone i Dravita, Mikala, lo nekö i Saulo a tu qa ngöne mamalama, angeic a öhnyi Dravita joxu a kola sesësesë, me fia, me xötre kano qëmeke i Iehova. Angeic a methinë Dravita ju e kuhu hni angeic. 17 Nge hna traqa fë la Pua, me amë hnine la göhnë hna hnëkën, ngöne lo itat hnei Dravita hna acil thatraqane lai Pua. Ame hnei Dravita hna tro fë la itre huuj ne dreuth asë, me itre huuj ne tingeting qëmeke i Iehova. 18 Thupene la hna tro fë huuj ne dreuth asë, me itre huuj ne tingeting, Dravita a amanathithine ju la nöj ngöne la ëje i Iehova, joxu ne la itre trongene isi e hnengödrai. 19 Nge nyidrëti a isa hamën kowe la angetre Isaraela ka ca lapa, itre trahmanyi me föe, la falawa kösë korona, me ca gato hna kuca hnei wene pama, me ca gato vin* ka qaqacil. Nge angatr a isa ije hmaca pi koi isa hnalapan.
20 Nge ame hë la Dravita a ketre lö kowe la hnalapa i nyidrë troa amanathithine la fami i nyidrë, canga tro ju hi Mikala troa itronyi me nyidrë. Öni Mikala jë hi: “Tha aqane lolo kö la joxu ne Isaraela, lo nyidrëti a mama pë iheetr kowe la itre jajiny ka huliwa kowe la itre tane isi i nyidrë, kösë xeti he!” 21 Ngo sa jë hi Dravita ka hape: “Eni a feetëne la ijine celë qëmeke i Iehova, nyidrë lo atre hnimi ni hune la keme i eö, me fami ne la keme i eö, nge atre acili ni troa tane la nöje Isaraela, lo nöje i Iehova. Celë hi matre eni a feetëne la ijine celë qëmeke i Iehova. 22 Nge tro pala kö ni a thaipië ni, me sipu wangaconyi ni. Nge ame la itre hlu jajiny hnei eö hna qaja, tro kö nyudreni a atrunyi ni.” 23 Pine lai, tha hnaho pi kö Mikala nekö i Saulo uti hë la angeic a mec.