Esodro

40 Thupene lai, öni Iehova jë hi koi Mose: 2 “Ngöne la pane drai ne la pane treu, tro eö a acile la uma maano, ene la itat ne icasikeu. 3 Nge tro eö a amë hnine ej la pua ne Anyipicin, me juetrëne hnene la imaano ne thewe hnahag. 4 Tro eö a traqa fë la laulau, me atë la itre ewekë nyine troa amë e koho hun. Nge tro eö a traqa fë la tane laam, me amelene la itre laam. 5 Nge amë ju la ita ne dreu ka pui loi gool qëmekene la pua ne Anyipicin. Nge athipe jë lai irido ka hmelele ngöne la hnë lö ne la uma maano.

6 “Tro eö a amë la ita ne dreu ka pui loi qëmekene la hnë lö ne la itat ne icasikeu.* 7 Nge tro eö a amë la trepene tim nyipine la itat ne icasikeu memine la ita ne huuj, nge tro eö a nyialien hnei tim. 8 Nge tro eö a kuca la götrane gaa pë ihakun xötreithe la uma maano, me athipe la imaano ngöne la hnë lö ne la götrane gaa pë ihakun. 9 Thupene lai, tro eö a xome la oel ne iën, me fii la uma maano, me itre ewekë ka lapa e kuhu hnin. Nge tro eö a ahmitrötrën ej, ene la uma maano, me nöjei ewekë ka ce tro memin, matre tro ej a hmitrötr. 10 Tro eö a fii hnei oel la ita ne huuj thatraqane la itre huuj ne dreuth asë, me nöjei ewekë ka ce tro memin. Nge tro eö a ahmitrötrëne la ita ne huuj, matre tro ej a ketre ita ne huuj ka nyipi hmitrötr. 11 Nge tro eö a fii hnei oel la trepene tim me trepen ej, nge tro fe eö a ahmitrötrën.

12 “Nge xomi Arona jë me itre nekö i angeic kowe la hnë lö ne la itat ne icasikeu, nge sië angatre jë hnei tim. 13 Nge tro eö a heetrë Arona hnene la itre iheetre ka hmitrötr, me fii angeic hnei oel, nge tro eö a ahmitrötrë angeic, matre tro angeic a atre huuje koi ni. 14 Thupene lai, traqa fë pi la itre nekö i angeic, nge heetrë angatre jë hnene la itre iheetre ka qea. 15 Tro eö a fii angatr hnei oel tune la aqane fii eö la keme i angatr, matre tro angatr a itre atre huuje koi ni. Nge ame la kola fii angatre hnei oel, tro hë angatre lai a itre atre huuj ka epine palua, ngöne la nöjei xötre i angatr.”

16 Mose a kuca asë jë la hna amekötin hnei Iehova. Angeic a kuca asë jë la hna qaja.

17 Nge ame la uma maano, hna acil ej ngöne la pane drai, ne la pane treu ne la hnaaluene macatre. 18 Ame la Mose a acile la uma maano, hnei angeic hna pane amë la itre trepene hna kuj, me acatrene la itre inehe, me amë la itre agö, me acilëne la itre sine feni. 19 Nge hnei angeic hna seluthe la ketre imaano hune la uma maano, me sitrën ej, tune lo hnei Iehova hna amekötine koi angeic.

20 Thupene lai, hnei angeic hna xome la nyine Anyipicin, me amë ngöne la Pua, me line la itre tan hnine la itre otru ne lai Pua, me amë la ithingen hune la Pua. 21 Angeic a traqa fë jë la Pua ngöne la uma maano, me acatrene lai imaano ne thewe hnahag, me juetrëne la pua ne Anyipicin, tune lo hnei Iehova hna amekötine koi angeic.

22 Nge hnei angeic hna amë la laulau e hnine la itat ne icasikeu, ngöne la götrane kolopi ne la uma maano, hmekune la götran qëmekene lai imaano ne thewe hnahag. 23 Nge hnei angeic hna amë wengën la itre falawa hune la laulau qëmeke i Iehova, tune lo hnei Iehova hna amekötine koi angeic.

24 Nge hnei angeic hna amë la ita ne laam ngöne la itat ne icasikeu, qëmekene la laulau, ngöne la götrane kolojë ne la uma maano. 25 Nge hnei angeic hna amelene la itre laam qëmeke i Iehova, tune lo hnei Iehova hna amekötine koi angeic.

26 Nge hnei angeic hna amë la ita ne huuj gool hnine la itat ne icasikeu, qëmekene la imaano ne thewe hnahag, 27 matre dreuth hune ej la nyine dreu ka pui loi, tune lo hnei Iehova hna amekötine koi angeic.

28 Thupene lai, hnei angeic hna athipe lai irido ka hmelele ngöne la hnë lö ne la uma maano.

29 Nge hnei angeic hna amë la ita ne huuj thatraqane la itre huuj ne dreuth asë ngöne la hnë lö ne la uma maano, ene la itat ne icasikeu, matre dreuth hun ej la itre huuj ne dreuth asë, me itre huuj ne la itre wene feja, tune lo hnei Iehova hna amekötine koi angeic.

30 Nge hnei angeic hna amë la trepene tim nyipine la itat ne icasikeu memine la ita ne huuj, me nyialien hnei tim matre nyine si. 31 Nge e cili hi la hnei Mose, me Arona me itre nekö i angeic hna wasi wanakoim me waca. 32 Nge ame ngöne la nöjei ijin angatr a lö hnine la itat ne icasikeu, maine easenyine la ita ne huuj, angatr a pane si, tune lo hnei Iehova hna amekötine koi Mose.

33 Thupene lai, hnei angatr hna kuca la götrane gaa pë ihakun xötreithe la uma maano memine la ita ne huuj, nge angatr a athipe jë lai imaano ngöne la hnë lö ne la götran gaa pë ihakun.

Ame hnei Mose hna afenesine la huliwa. 34 Ame hna he la itat ne icasikeu hnene la iaw, nge hna atiqane la uma maano hnene la lolo i Iehova. 35 Thatreine kö Mose troa lö hnine la itat ne icasikeu, ke kolo pala hi a cil la iaw hun ej, nge kola tiqa la uma maano hnene la lolo i Iehova.

36 Nge ngöne la nöjei tronge i angetre Isaraela, maine kola elë draië la iaw hune la uma maano, angatr a isa xomi trengetrenge jë me tro. 37 Ngo maine tha elë kö la iaw, tha angatre kö a sa trengetreng me tro. 38 Ke ame la iaw i Iehova, ej a lapa hune la uma maano e lai, nge e jidr, kola mel la eë hune la uma maano, qëmekene la angetre Isaraela asë, ngöne la nöjei tronge i angatr.