Hnaaluene Tus i Samuela
10 E thupen, meci pi hi la joxu i angetre Amona, matre hna acili Hanuna nekö i angeic troa nyihna i angeic. 2 Nge öni Dravita jë hi: “Tro ni a hnimi Hanuna nekö i Nahasa, ke hna hnimi ni hnene la keme i angeic.” Haawe, Dravita a upe pi la itre ka tro fë maca troa fetra koi angeic. Ngo ame la itre ka tro fë maca a traqa ngöne la nöje i angetre Amona, 3 önine la itre xa tan koi Hanuna joxu i angatr ka hape: “Ame koi nyipë, Dravita kö lai a upe la itre atre i angeic troa fetra matre atrune la keme i nyipë? Ngo hapeu, tha hna upi angatre kö troa goeëne juetrëne la traon matre apatren?” 4 Qa ngöne lai, hnei Hanuna hna acilëne la itre ka tro fë maca i Dravita, me cine la sine la ienaje i angatr, me thupa la itre iheetre i angatr uti hë ngöne la hune itrepë, me upi angatre hmaca. 5 Nge ame hë la Dravita a drenge lai, nyidrëti a canga upi itre xane jë koi angatr, ke tru la hna ahmahmanyi angatr. Dravita a upe jë la maca celë: “Pane lapa ju e Ieriko uti hë e cia hmaca la ienaji epun. Nge e thupen, bëeke hmaca jë.”
6 Nge trotrohnine hë angetre Amona ka hape, pui ngazo hë angatr koi Dravita. Angatr a upe pi la itre ka tro fë maca, troa nyithupene la angetre Suria qa Bethe-rehob, me angetre Suria qa Zoba troa ce isi me angatr, ala 20 000 lao soc ka trongë ihnadro, memine la joxu ne Maaka me 1 000 lao soc, nge qa Tob, 12 000 lao atr. 7 Nge ame hë la Dravita a drenge lai, hnei nyidrëti hna upi Ioaba koi angatr, me itre soc ka catr i nyidrë, memine la trongene isi asë. 8 Ame hnei angetre Amona hna cile xötrë qëmekene la qëhnelö ne la traon. Nge ame angetre Suria qa Zoba, me Rehob, me itre soc qa Tob, me itre soc i Maaka, hnei angatr hna cil e gaa nanyi ngöne la itre hlapa.
9 Ame hë la Ioaba a öhn e qëmeken me e hutrö la itre ithupëjia a fetra troa isi, angeic a iëne jë la itre xa soc ka catr thei angetre Isaraela, me acile xötrë angatr troa isi me angetre Suria. 10 Nge angeic a upe* jë la itre xa soc koi Abisai trejin me angeic, me sipo Abisai troa acile xötrë angatr troa isi me angetre Amona. 11 Thupene lai, öni angeic: “E lepi ni hë hnei angetre Suria, qa i eö troa xatua ni. Ngo e tro angetre Amona a lepi eö, tro hë ni a xatua eö. 12 Loi e tro sa catr me isigöline la nöje së, me itre traon ne la Akötresi së, nge qanyi Iehova kö apexejen.”
13 Ame hnei Ioaba me itre soc hna tro troa isi me angetre Suria, ngo kötre pi hi angetre Suria. 14 Matre ame hë la angetre Amona a öhne laka, kötre hë la angetre Suria, angatr a ananyi Abisai jë, me zae hnine la traon. Thupene lai, hnei Ioaba hna tro qaathei angetre Amona, me bëek a tro Ierusalema.
15 Thupene la hna lepe la angetre Suria hnei angetre Isaraela, hnei angetre Suria hna acasine hmaca la trongene isi i angatr. 16 Nge Hadadeza a sipone hmaca jë kowe la itre xa atre Suria, lo itre ka mel ezine la Hneopegejë,* troa nyixane la tronge i angatr. Haawe, angatr a tro ju a tro Helam, nge Sobaka, tane la itre soc i Hadadeza la ka wejemekene la tronge i angatr.
17 Ame hë la Dravita a drei mejene lai, nyidrëti a canga acasine jë la trongene isi i Isaraela, nge angatr a sasaithe jë la Ioridrano troa tro Helam. Qa ngöne lai, angetre Suria a cile xötrë jë, nge angatr a tro ju troa isi me Dravita. 18 Ngo angatr a kötre hmaca pi qëmekei Isaraela. Hnei Dravita hna humuthe la 700 lao soc ka ti ikatr, me 40 000 lao soc ka ti hos qa Suria, me Sobaka, tane la itre soce i angatr. 19 Nge ame hë la nöjei joxu ka nyixöle i Hadadeza a öhne laka, hna ngaa angatr hnei angetre Isaraela, angatr a canga thele tingetinge ju me Isaraela, nge angatr a huliwa jë koi Isaraela. Qaane ju hi lai, tha xatua angetre Amona hmaca kö hnei angetre Suria.