Hnaaluene Tus i Samuela

13 Hetre xa i Abasaloma nekö i Dravita, Tamara la ëjen, nge nekö jajinyi ka mingöminge catr. Matre hnene la ketre nekö i Dravita, Aminona, hna hmo sai Tamara. 2 Jole hë la he i Aminona, nge angeic a meciu Tamara xa i angeic, ke nekö jajinyi* Tamara. Ketre, Aminona a pi easenyi Tamara, ngo thatre pe angeic la nyine kuca. 3 Ngo hetre sinee i Aminona, Ionadaba la ëjen, nekö i Simea, mama i Dravita. Ketre trahmanyi lai ka atreine iewath. 4 Öni angeic koi Aminona: “Nekö i joxu eö, ngo hnauëne laka, eö a hleuhleu e nöjei drai? Maine hetre hnei eö hna pi qaja koi ni, qaja jë.” Sa jë hi Aminona ka hape: “Ke eni ha hmo sai Tamara, xa i Abasaloma trejin me eni.” 5 Öni Ionadaba jë hi: “Pane meköle ju hune la ili, nge wezipo thoi jë. Matre e traqa ha keme i ö troa wai ö, hape jë: ‘Pane upi Tamara pi, xa i eni troa hnëkën qëmekeng la xeni thatraqai wezipo,* me ithuang. Nge tro hë ni a xen.’”

6 Aminona a meköle ju hune ili me thë troa wezipo, matre Dravita joxu a tro ju troa wai angeic. Öni Aminona jë hi: “Pane upi Tamara jë xa i eni koi ni, matre hnëkë lue neköi gato, me ithuang.” 7 Matre Dravita a upi ketre jë troa thei Tamara ngöne la hnalapa, me hape: “Pane tro jë troa wai Aminona mama i ö, nge hnëkë xeni* jë koi angeic.” 8 Tamara a tro ju kowe la hnalapa i Aminona, ngöne lo götran hnei angeic hna meköl. Nge Tamara a xomi farine ju hna ce loon me tim, me sane la gato qëmeke i angeic, me atron. 9 Thupene lai, Tamara a xome pi la falaipen, me ithuai Aminona gato. Ngo xele kö angeic ma xen, nge öni angeic: “Lö asë pi epun!” Nge angatr a lö pi.

10 Ame hnei Aminona hna qaja koi Tamara ka hape: “Pane kepe trepange* jë kowe la hnahag ne meköl, nge ithuange jë.” Haawe, Tamara a xome ju la itre gato hnei angeic hna kuca, me tro fë koi Aminona hnine la hnahag. 11 Matre ame hë la Tamara a lö fë xen, angeic a xolouthi Tamara ju me hape: “Trohemi jining ma ce meköle me eni!” 12 Ngo öni Tamara: “Waea mama! The ahmahmanyi ni kö. Tha huliwa nyine kuca kö lai e Isaraela. The kuca kö la nyine hmahman. 13 Thatreine kö ni lai troa elë hune la hmahmang, nge tro lai a methinë eö e Isaraela. Ithanatane jë pe koi joxu, ke tro kö nyidrëti lai a kapa troa hamë ni koi ö.” 14 Ngo tha drei Tamara kö hnei Aminona. Aminona a xolouthe catrë Tamara ju, me angazo nyën, me ahmahmanyi nyën. 15 Ame hnei Aminona hna nyiqaane methinë Tamara, nge ase hë thahe la ihnimi angeic hnei imethinë. Nge öni angeice jë hi koi Tamara: “Cile jë, nge tro pi!” 16 Ngo öni Tamara: “Waea mama. E helë ni hë hnei ö, ngazo catre kö lai hune lo hnei ö hna kuca.” Ngo xele pala hi Aminona ma drei angeic.

17 Aminona a hëne jë la nekö trahmanyi ka huliwa koi angeic, me hape: “Xome pi la föe celë qa la, nge kiine ju la qëhnelö hutrö i ö.” 18 (Nge ka mingöminge* catre la iheetre i Tamara. Iheetr ne la itre nekö i joxu ka tha ce meköle pala kö me trahmany.) Matre hnene lai hlu hna lö sai angeic e trön, me kiine la qëhnelö. 19 Ame hnei Tamara hna köle hnatresijine la he i angeic, me kuie zezene la iheetre ka mingöming i angeic. Nge Tamara a tro ju, lue im hune la he i angeic, me ho trootro.

20 Nge öni Abasaloma kowe la xa i angeic ka hape: “Aminona mama i eö la ka kuca lai koi eö? The qaja pi kö koi ketre, ke mama i ö lai. The mekune hmaca kö la ewekë celë.” Haawe, qaane ju hi lai, hnei Tamara hna umë me lapa thei Abasaloma xa i angeic. 21 Matre ame hë la Dravita joxu a drenge lai, elëhni catre ju hi nyidrë, ngo xele nyidrë ma akötrë Aminona, ke Dravita a hnimi angeic, ke pane nekö i nyidrëti lai. 22 Qaane ju hi lai, tha ithanata ha Abasaloma koi Aminona. Pëkö ithanata ka loi maine ka akötr, ke tru la hnei angeic hna methinë Aminona pi Tamara xa i angeic.

23 Thupene la lue macatre, hmekune lo Abasaloma a xötre pene mamoe e Baala-Hazor, ezine Eferaima, angeic a hëne asë jë la itre nekö i joxu troa xen. 24 Angeic a lö jë koi joxu me hape: “Joxu fe, eni hi la a xötre pene mamoe, matre jë fe me eni, nyipë me itre ka huliwa koi nyipë.” 25 Ngo önine la joxu: “Waea neköng, ke e tro huni asë a ce ut, tro huni a ahacenyi ö.” Abasaloma a catre fë jë, ngo xele pala hi joxu ma ce tro me angeic. Hnei joxu pe hna amanathithi angeic. 26 Ame hnei Abasaloma hna qaja ka hape: “Maine tha nyipëti kö a hane tro, nue Aminona pi mamang troa ce tro me eahun.” Ngo öni joxu ka hape: “Hnauëne la tro angeic a ce tro me eö?” 27 Nge Abasaloma a catre fë jë, nge joxu a kei thenge ju, me upi Aminona me itre xa nekö i nyidrë trahmany, troa ce tro me Abasaloma.

28 Thupene lai, Abasaloma a amekötine jë kowe la itre hlue i angeic ka hape: “Tro epuni a thupën, e hmo hë Aminona hnei ka haitr, tro hë ni a qaja ka hape, ‘humuthi angeice pi!’ Nge tro epuni a humuthi angeic, nge the xou kö, eni la ka upi epun. Catre pi, nge the cile hnö kö.” 29 Itre hlu a kuca jë koi Aminona thenge la hna amekötin hnei Abasaloma. Ame hnene la itre xa nekö i joxu hna mejë, me të hune la meul,* me kötr. 30 Nge angatre pala kö e kuhu gojeny, ame hnene la ketre atr hna qaja koi Dravita ka hape: “Ase hë Abasaloma humuthe la nöjei nekö i nyipë, nge pëkö ka mel.” 31 Matre hnene la joxu hna mejë jë, me kuie zezene la iheetre i nyidrë, nge nyidrëti a meköle ju e kuhu hnadro. Ame hnene la nöjei hlue i nyidrë hna lapa ezi nyidrë, nge ka zezenyi fe la itre iheetre i angatr.

32 Ngo öni Ionadaba, nekö i Simea, mama i Dravita ka hape: “Joxu fe, tha hna humuth asë kö la itre nekö i nyipë, ngo Aminona hi. Abasaloma la ka amekötin troa humuthi angeic, ke ekö hë Abasaloma mekune lai, qaane lo Aminona a angazo Tamara, xa i angeic. 33 Matre joxu fe, the drenge menune* kö la hna qaja koi nyipë, ke tha meci asë kö la itre nekö i nyipë, ngo Aminona casi hi.”

34 Nge ngöne la ijine cili, hnei Abasaloma hna kötr. Nge hnene la atre thupëne la traon, hna öhne la itre atr ka traqa qa ngöne la gojeny ezine la wetr. 35 Ame hnei Ionadaba hna qaja koi joxu ka hape: “Joxu fe, tha eni kö lo a thoi, bëeke hë la itre nekö i nyipë.” 36 Angeice hi a ase ithanata, nge lö jë hi la itre nekö i joxu, nge angatr a itreijeny. Nge hnene la joxu me itre xa hlu, hna hane treije catr. 37 Nge ame Abasaloma, hnei angeic hna kötre koi Talemai, nekö i Amihuda, joxu ne Gesuri. Nyimu drai ne treije pine Dravita la nekö i nyidrë. 38 Hnei Abasaloma hna kötr a tro Gesuri, nge angeic a lapa ju e cili koi köni macatre.

39 Ame ju hi la ketre ijin, hnei Dravita hna pi iöhnyi me Abasaloma, ke ase hë nyidrë kapa* la meci Aminona.