Ezera
3 Ame hë la kola traqa la hna 7 ne treu, nge ase hë angetre Isaraela* lapane la itre traone i angatr, hnei angatr hna ce mekun troa icasikeu e Ierusalema. 2 Hnei Iesua nekö i Iozadaka, me itre atre huuj ka ce huliwa me angeic, me Zerubabela nekö i Sealetiela me itre trejin me angeic, hna nyiqaane huliwa, me xupe la ita ne huuj ne la Akötresi Isaraela, matre huujëne hmaca la itre huuj ne dreuth asë,* thenge lo hna cinyianyin ngöne la Wathebo i Mose, atre ne la nyipi Akötresie.
3 Angatr a acile jë la ita ne huuj ngöne lo göhnë hnapan, ngacama angatr a xouene la itre nöj ezin. Nge angatr a huujëne jë koi Iehova la itre huuj ne dreuth asë, itre huuj e hmakanyi me hej. 4 Thupene lai, angatr a feetëne jë la Feet Ne Ihmelekap, tune lo hna amekötin hnene la wathebo. Nge angatr a huujën jë e nöjei drai, la etrune la itre huuj ne dreuth asë hna amekötin. 5 Nge angatr a tro fë jë la itre huuj hna majemin, me itre huuj kowe la treu ka hnyipixe, me göne la itre ijine kola feet koi Iehova, itre ijin hna ahmitrötrën, me nöjei huuj hna tro fë xanën* koi Iehova. 6 Qaane ju hi la pane drai ne la hna 7 ne treu, hnei angatr hna nyiqaane tro fë la itre huuj ne dreuth asë koi Iehova, ngacama tha hna ami trepene pala kö la uma ne hmi Iehova.
7 Nge hnei angatr hna hamë mani kowe la itre ka thupe etë, me koi itre ka atreine kuca la nöjei pengöne huliwa. Nge hnei angatre fe hna hamë oel, me xen me nyine iji kowe la angetre Sidona me Turo, matre tro angatr a iupi fë qa hnagejë, la itre sinöe arasi ne Lebanona a tro Iopa, thenge la hna axeciën hnei Koreso joxu ne Peresi.
8 Ngöne la hnaaluene macatre, thupene lo angatr a traqa kowe la uma ne hmi ne la nyipi Akötresie e Ierusalema, hmekune la hnaaluene treu, hnei Zerubabela nekö i Sealetiela, me Iesua nekö i Iozadaka, me itre xa trejin me angatr, lo itre atre huuj me angetre Levi, me nöjei atr ka traqa e Ierusalema thupene lo hna xomi angatr kowe la nöje trenyiwa, hna nyiqaane kuca la huliwa. Angatr a upe jë la angetre Levi ka 20 lao macatre a tro draië, troa xomiujine la huliwa ne xupe la uma ne hmi Iehova. 9 Hnei Iesua me itre nekö i angeic me itre trejine me angeic, me Kademiel me itre nekö i angeic qaathene la fami Iudra, hna ce huliwa troa xomiujine la itre ka huliwa hnine la uma ne la nyipi Akötresie. Nge hnene fe la itre nekö i Henadada, me itre nekö i angatr, me itre trejine me angatr, lo angetre Levi, hna hane ixatua.
10 Ame la itre ka huliwa a ase ami trepene la uma ne hmi Iehova, hnene la itre atre huuj ka heetrë iheetr ka qea, me cile fë trutru, me angetre Levi, itre nekö i Asafa ka cile fë sëbal, hna cilë göhnën matre atrunyi Iehova, thenge lo hna amekötin hnei Dravita joxu ne Isaraela. 11 Nge angatr a nyiqaane nyima jë, me atrunyi Iehova, me olene koi nyidrë. Itre gurup a nyima me isakeun me hape: “Ke ka loi hni nyidrë, nge ka cile hut la ihnimi nyipici i nyidrë koi Isaraela.” Nge hnene la nöj hna sue draië me atrunyi Iehova, ke ase hë ami trepene la uma ne hmi Iehova. 12 Ngo ame la kola ami trepene la uma ne hmi cili, ala nyimu la itre atre huuj, me angetre Levi, me itre tixe ne lapa—itre qatr ka öhne lo uma ne hmi hnapan—ka treije catr, nge ala nyimu fe la itre xa ka sue madrin. 13 Matre tha wangatrehmekune hë së la mejene madrin me mejene treij. Ke eje hi, tru catre la meje i angatr, matre hna drenge fe uti hë e gaa nanyi catr.