Nehemia
6 Nge ame hë la Sanebalata, me Tobia, me Gesem qa Arabia, me itre xa ithupëjia me eahuni a drenge laka, ase hë ni acile hmaca la ihag, nge pëhë gaa thöni, (ngo tha acile pala kö ni la itre hune* qëhnelö ne la traon), 2 hnei Sanebalata, me Gesem hna canga iupi fë maca koi ni me hape: “Trohemi, tro sa isapui me itrony ngöne la itre hunahmi ne la Hnathup e Ono.” Ngo nyidroti hi a thele troa tra thethi ni. 3 Matre hnenge hna upe koi nyidro la itre ka tro fë maca, me hape: “Ase hë ni nyiqaane la ketre huliwa ka tru, nge thatreine kö ni troa uti koi epon, wanga cile pi la huliwa.” 4 Ame hnei nyidroti hna a 4 lao upe koi ni la maca celë, nge casi pala hi la aqane sang.
5 Matre hnei Sanebalata hna upe hmaca koi ni la hlue i angeic, troa a 5 lao qaja la maca cili. Nge angeic a cile fë la ketre tusi hna fe. 6 Hna cinyihane ka hape: “Kola iqajakeun ngöne la itre nöj, nge Geseme fe a qaja ka hape, eö me angetre Iudra a thele troa icilekeu. Celë hi matre eö a xupi ihag. Nge kolo fe a qaja e cahu ka hape, tro eö a joxu i angatr. 7 Nge hnei eö fe hna acile la itre perofeta, matre tro angatr a qaja e Ierusalema ka hape, ‘Hetre joxu hë e Iudra!’ Nge tro ha qajaqaja lai koi joxu. Matre trohemi, nge tro nyiso a pane ce ithanatan.”
8 Ngo hnenge hna upe la maca celë koi angeic: “Pëkö ca trengewekë ka nyipici hnei ö hna qaja, eö hi a sili ithanata.”* 9 Eje hi, angatr a thele troa axouenyi hun, ke öni angatr: “Tro ha pë trengecatre* i angatr, nge tro ha cile la huliwa.” “Celë hi matre, Akötresinge fe, aegöcatrenyi* ni jë!”
10 Thupene lai, hnenge hna tro kowe la uma i Semaia nekö i Delaia, nekö i Mehetabela, lo ka umë ngöne la hnalapa i angeic. Öni Semaia koi ni: “Tro nyiso a isapui, matre troa itrony hnine la uma ne la nyipi Akötresie, hnine la uma ne hmi, nge tro nyiso a thinge la itre qëhnelö ne la uma ne hmi, ke tro angatr a traqa troa humuthi ö. Tro angatr a traqa e jidr troa humuthi ö.” 11 Ngo öninge koi angeic: “Tro kö la ketre atr ka tung a kötr? Tro kö la ka tui eni a kötre kowe la uma ne hmi me mel? Waea, tha tro kö ni a lö kowe la uma ne hmi.” 12 Qa ngöne lai, trotrohnine ju hi ni laka, tha Akötresieti kö la ka upi angeic, ngo hnei Tobia me Sanebalata hna nyithupei angeic troa perofetane koi ni. 13 Hnei nyidro hna nyithupei angeic troa axouenyi ni, me uku ni troa kuca la ngazo. Matre hetre nyine tro nyidroti a qaja koi ni, me nyizö ni.
14 “Haawe Akötresinge fe, the thëthëhmine kö la hna kuca hnei Tobia me Sanebalata, me Noadia perofeta föe, me itre xa perofeta ka thele pala hi troa axouenyi ni!”
15 Hna afenesine la ihag ngöne la hna 25 ne drai ne la treu Elul,* matre traqa koi 52 lao drai ne huliwa.
16 Nge ame hë la kola drenge lai hnene la itre ithupëjia, nge kola öhne hnei itre nöj ezin, tru la hmahma* i angatr, ke trotrohnine hë angatre laka, hna eatrën la huliwa cili hnene la ixatua ne la Akötresi hun. 17 Nge ngöne la ijine cili, hnene la itre hene ka tru ne Iudra hna iupi fë la nyimu tusi koi Tobia, nge Tobia a sa koi angatr. 18 Nge ngöne la ijine cili, ala nyimu la angetre Iudra ka sisinyi troa nyixöle i Tobia, ke angeice la tresi Sekania nekö i Ara. Nge hnene la nekö i angeic Iohanana hna xome la nekö i Mesulama jajiny, nekö i Berekia. 19 Ketre, angatre pala hi a qaja aloinyi Tobia koi ni, nge angatr a qajaqaja koi Tobia la itre trengewekëng. Matre hnei angeic hna iupi fë tusi koi ni nyine axouenyi ni.