Nehemia
11 Itre he ne nöj a lapa e Ierusalema. Nge ame pë hë la munëne la nöj, hnei angatr hna uthi trikitr,* matre tro la ca fami thene la 10 a lapa e Ierusalema, lo traone ka hmitrötr. Nge tro pë hë la 9 lao fami a lapa ngöne la itre xa traon. 2 Ketre, hnene la itre xa trahmanyi hna saen troa lapa e Ierusalema, nge hnene la nöj hna qaja aloinyi* angatr.
3 Hane hi la itre tane provës ka lapa e Ierusalema. (Nge ame la munëne la nöje Isaraela, me itre atre huuj, me angetre Levi, me itre hlue ne la uma ne hmi,* me itre nekö* ne la itre hlue i Solomona, angatr a lapa ngöne la itre xa traon ne Iudra, ngöne la isa hnepadro i angatr hnine la itre traone i angatr.
4 Nge kolo fe a lapa e cili hnene la itre xa atrene la itre tribu ne Iudra me Beniamina.) Thene la tribu i Iudra: Athaia, nekö i Uzia, nekö i Zakaria, nekö i Amaria, nekö i Sefata, nekö i Mahalaleel, qaathene la itre matra i Farez, 5 me Maseia, nekö i Baruka, nekö i Kole-hoz, nekö i Hazaia, nekö i Adaia, nekö i Ioiarib, nekö i Zakaria, qaathene la fami i Siloni. 6 Kola e la 468 lao matra i Farez, itre ka maca troa isi. Angatr a lapa e Ierusalema.
7 Thene la tribu ne Beniamina: Salu nekö i Mesulama, nekö i Ioed, nekö i Pedaia, nekö i Kolaia, nekö i Maseia, nekö i Ithiela, nekö i Isaia. 8 Nge thupei angeic Gabai me Salai, ala 928. 9 Nge Ioela nekö i Zikeri la atre thupë angatr hnine la traon, nge Iudra nekö i Senua la ka xatua angeic.
10 Thene la itre atre huuj, Iedaia nekö i Ioiarib, me Iakina, 11 me Seraia nekö i Hilekia, nekö i Mesulama, nekö i Zadoka, nekö i Meraioth, nekö i Ahituba, atre ka tru hnine la uma ne hmi* ne la nyipi Akötresie, 12 me itre trejin me angatr ka huliwa hnine la uma ne hmi. Kola e la 822 lao trahmany. Nge ce angatr me Adaia, nekö i Ierohama, nekö i Pelalia, nekö i Amezi, nekö i Zakaria, nekö i Pasur, nekö i Malekia, 13 me itre trejin me angatr, itre tixe ne lapa. Kola e la 242 lao trahmany. Nge ce angatr me Amasai nekö i Azareela, nekö i Ahazi, nekö i Mesilemoth, nekö i Imer, 14 me itre trejin me angatr, itre ka tru trengecatr, nge ka catr. kola e la 128 lao trahmany. Zabediela la ka thupë angatr, ketre atre lai ka xulu qaathene la ketre fami ka hlemu.
15 Thene la angetre Levi: Semaia nekö i Hasuba, nekö i Azerikam, nekö i Hasabia, nekö i Buni, 16 me Sabetai me Iozabada, lue tan thei angetre Levi, nge lue ka thupëne la itre huliwa hna kuca e tröne la uma ne hmi ne la nyipi Akötresie. 17 Ce angatr me Matania nekö i Mika, nekö i Zabedi, nekö i Asafa, lo tane la itre ka nyima, nge ka iujine la itre nyima la kola hmi, me Bakebukia, atre xatua angeic, me Abeda nekö i Samua, nekö i Galal, nekö i Ieduthun. 18 Matre ngöne la traon ka hmitrötr, kola e la 284 lao atre Levi.
19 Hane hi la itre ka thupë qëhnelö: Akub, me Talemon, me itre trejine me nyidro ka thupë qëhnelö, matre kola e la 172 lao trahmany.
20 Nge ame la munëne la angetre Isaraela, me itre atre huuj, me angetre Levi, angatr asë ngöne la itre xa traon ne Iudra. Angatr a lapa ngöne la isa hnepadro hnei angatr hna kapa qaathene la itre qaaqaa i angatr. 21 Nge itre hlue ne la uma ne hmi a lapa e Ofela, nge Ziha me Gisepa la lue tane i angatr.
22 Ame la tane la angetre Levi e Ierusalema, ke Uzi, nekö i Bani, nekö i Hasabia, nekö i Matania, nekö i Mika, qaathene la itre matra i Asafa, lo atre ka nyima. Angeic la ka thupëne la huliwa hna kuca hnine la uma ne hmi* ne la nyipi Akötresie. 23 Hetre ewekë hna amekötin hnene la joxu thatraqane la itre ka nyima. Tro angatr a kepe thupen, thenge la ka ijij e nöjei drai. 24 Nge Pethaia nekö i Mesezabel, qaathene la fami Zera, nekö i Iudra, la atre hamë eamo* koi joxu göne la itre jol ne la nöj.
25 Nge ame kowe la itre hunahmi me itre hlapa, itre atrene la tribu i Iudra la ka lapa e Kiriath-areba, me itre hnepadro ezin, me Dibona, me itre hnepadro ezin, me Iekabezel, me itre hunahmi ezin, 26 me Iesua, me Molada, me Bethe-palet, 27 me Hazara-sual, me Bere-seba, me itre hnepadro ezin, 28 me Zikelag me Mekona, me itre hnepadro ezin, 29 me Ene-rimon, me Zorea, me Iamuth, 30 me Zanoa, me Adulama, me itre hunahmi ezin, me Lakisa me itre hnepadro ezin, me Azeka me itre hnepadro ezin. Hnei angatr hna lapa* qa Bere-seba, uti hë la hnathupe e Hinom.
31 Nge hnene la itre atrene la tribu i Beniamina hna lapa e Geba, me Mikemas, me Aia, me Bethela, me itre hnepadro ezin, 32 me Anathoth, me Nob, me Anania, 33 me Hazora, me Rama, me Gitaim, 34 me Hadid, me Zeboim, me Nebalat, 35 me Lod, me Ono, lo hnathup ne la itre ka atreine huliwa. 36 Nge hnene la itre xa lapa i angetre Levi qa Iudra, hna lapa ngöne la zi i angetre Beniamina.