Ieremia

25 Ame ngöne la hna 4 ne macatre ne musi Iehoiakima, nekö i Iosea joxu ne Iudra, ene lo pane macatre ne musi Nebukaneza* joxu ne Babulona, hnei Akötresie hna ithanata koi Ieremia göne la nöje Iudra. 2 Hane hi la hna qaja hnei Ieremia perofeta göne la nöje Iudra, me angetre Ierusalema:

3 “Traqa ha koi 23 lao macatre ne Iehova a ithanata koi ni, qaane lo kola 13 lao macatre ne musi Iosea, nekö i Amona joxu ne Iudra, uti hë enehila. Tha mano kö ni* ithanata koi epun, ngo xele pala hi epuni ma dreng. 4 Nge hnei Iehova pala hi* hna upe koi epun la itre hlue i nyidrë perofeta, ngo xele kö epuni ma dreng me hnangenyën. 5 Öni angatre lo: ‘Eni a sipo epuni asë, nuetrije pi la itre aqane ujë me itre huliwa i epuni ka ngazo. Nge tro hë epun a lapa aqeanyi ngöne la nöj hnei Iehova hna hamën ekö koi epun me itre qaaqaa i epun. 6 The drenge kö la itre xaa haze, me nyihluen, me thili kow, ke epuni hi lai a akötrë ni la epuni a xupi idrola. Wanga tro ni a axulune la akötre koi epun.’

7 “‘Ngo xele kö epuni ma dreng,’ öni Iehova. ‘Hnei epuni pe hna akötrë ni la epuni a xupi idrola, matre kola ha traqa la akötr koi epun.’

8 “Hane hi la hna qaja hnei Iehova joxu ne la itre trongene isi e hnengödrai: ‘“Pine laka, xele kö epuni ma drei ni,” 9 öni Iehova, “tro ni a hëne la itre nöj asë qa kolopi memine la hlueng, Nebukaneza joxu ne Babulona. Tro ni a hë angatr matre lepe la nöje ce, me itre atren, me itre nöje xötreith. Tro hë ni a apatren la nöje ce, memine la itre nöje cili. Nge tro hë ni a kuca matre itra etë ju pe hi la itre götrane cili epine palua. Nge tro la itre ka öhne lai, a xou me qejine la ewekë ka traqa. Tro ni a kuca matre tra etë pe hi e cili epine palua. 10 Tro ni a apatrene la itre mejene feet me madrin, memine la nine ne la trahmany ka xötrei faipoipo me föi angeic, me mejene imulë, memine la ehudrumene la laam. 11 Eje hi, tro pe hi a tra etë la nöj asë, ketre götran hna xouene pë hë. Nge tro la itre atren ej a nyihluene la joxu ne Babulona koi 70 lao macatre.”’

12 “‘Ngo thupene la 70 lao macatre, tro ni a amekötin* la joxu ne Babulona memine la nöje cili, pine la itre ngazo i angatr,’ öni Iehova. ‘Nge tro ni a kuca matre tro la nöje Kaledaia, a tune la nöj hna trotrij epine palua. 13 Tro ni a eatrën asë la hnenge hna qaja göne la nöje ce, lo itre hna cinyanyin ngöne la tusi celë, nge hna perofetan hnei Ieremia kowe la nöjei nöj. 14 Ke tro la itre nöj ka nyimutre me itre joxu ka tru a xomi angatr troa nyi hlu, nge tro ni a të koi angatr, thenge la itre huliwa i angatr me itre hnei angatr hna kuca.’”

15 Ke hane hi la hna qaja koi ni hnei Iehova, Akötresi Isaraela: “Xome pi qa ngöne la imeng la verë waina ne la elëhning, nge tra imene jë la itre nöj hnenge hna upi ö kow. 16 Nge tro hë angatr a ij me keikei, me ujë tune la itre hmo, pine la taua hnenge hna upe koi angatr.”

17 Ame hnenge hna xome la ver qa ngöne la ime i Iehova, me tra imene la nöjei nöj hnei Iehova hna upi ni kow: 18 Hnenge hna nyiqane qaa Ierusalema me itre traon ne Iudra, me itre joxu me itre nekö i joxu i angatr, matre tro itre ej a tune la nöj hna trotrij nge hna sisin. Nge tro hë la itre atr a qejin la ewekë ka traqa, me qeje angatr ngöne la kola ieji, ke tro ha eatrën enehila; 19 thupene lai, hnenge hna tra ime i Farao joxu ne Aigupito, me itre ka huliwa i angeic, me itre nekö i joxu, me nöje i angeic asë, 20 memine la nöjei trenyiwa ka mel ngöne la nöje i angatr. Thupene lai, hna tra imene fe la nöjei joxu ne Uza, me nöjei joxu ne Filisiti, me Asekelona, me Gaza, me Ekerona, me angetre Asedoda ka mele pe; 21 me Edroma, me Moaba, me angetre Amona; 22 me kowe la nöjei joxu ne Turo, me nöjei joxu asë ne Sidona, me itre joxu ne la hnapet nyipine la hnagejë; 23 me Dedana, me Tema, me Buza, memine la itre ka cine la lue hnaqathë i angatr; 24 memine la nöjei joxu Arab, me nöjei joxu ne la itre nöj ka mel ngöne la hnapapa; 25 me nöjei joxu ne Zimeri, me nöjei joxu ne Elama, me nöjei joxu ne Madai; 26 memine la nöjei joxu ne kolopi, itre ka lapa easeny me gaa nany, thupei ketre matre ketre, me nöjei baselaia ne la fen asë; nge thupei angatr asë lai, tro ha tra imene la joxu ne Sesaka.*

27 “Nge qai ö troa qaja koi angatr ka hape: ‘Hane hi la hna qaja hnei Iehova joxu ne la itre trongene isi e hnengödrai, Akötresi Isaraela: “Iji jë, hnaitö jë, nge hmitra pi. Kei pi uti hë la thatreine hë epuni mejë, pine la taua hnenge hna upe koi epun.”’ 28 Nge maine xele kö angatr ma kapa me ij la ver qaathei ö, hape jë: ‘Hane hi la hna qaja hnei Iehova joxu ne la itre trongene isi e hnengödrai: “Iji jë! 29 Ke tha hape kö, tro ni a lepe la traon ka xome la ëjeng, ngo tha epuni fe kö!”’

“‘Waea, tha tro kö a trianyi epun, ke eni hë la a upe la taua troa lepe la itre atrene la fene asë,’ öni Iehova joxu ne la itre trongene isi e hnengödrai.

Tro nyidrëti a ho catr kowe la hnë lapa i nyidrë.

Eje hi, tro nyidrëti a amekötine la nöjei atr asë.*

Nge tro nyidrëti a nue la itre atr ka ngazo kowe la taua,’ öni Iehova.

32 Hane hi la hna qaja hnei Iehova joxu ne la itre trongene isi e hnengödrai:

33 “‘Ngöne la drai cili, tro Iehova a humuthe la itre atr qane la ketre cane la fen uti hë la ketre. Tha tro kö a treije pi angatr, me xome la ngönetrei i angatr troa kelem. Nge tro hë angatr a tune la agetrin hune la ihnadro.’

34 Treije jë, nge sue jë itre ka thupë mamoe!