Ezera

9 Ngo ame ju hi la kola ase kuca la itre ewekë cili, hnei itre he ne nöj hna traqa koi ni me hape: “Tha hnei angetre Isaraela kö, me itre atre huuj, me angetre Levi hna iananyi memine la itre xa nöj, me itre huliwa ka sis i angatr, ene lo angetre Kanana, me Heth, me Perizi, me Iebusi, me Amona, me Moaba, me Aigupito, me Amora. 2 Hnei angatr me itre nekö i angatr trahmany, hna xome la itre nekö jajiny ne la itre nöje cili. Angatre hi lo matran hna ahmitrötrën, ngo hnei angatre pena hna isilekeu me itre xa nöj. Nge itre he ne nöj, me itre ka isenyine la itre ka pane kuca la ngazo cili.”

3 Ame ju hi la eni a drenge lai, hnenge hna tha zezene la iheetreng, me iheetreng ka qea nge ka pë imen, nge hnenge hna hlethe la itre peneheng, me enajing, nge eni a lapa thili ju. 4 Thupene lai, hnene la itre ka metrötrëne* la trengewekë ne la Akötresi Isaraela, hna ce traqa me cil xötreithi ni, pine la aqane tha mele nyipici ne la angetre Isaraela hna kötre fë.* Nge ame ni, eni pala hi a lapa thil, uti hë la ijine huujëne la itre huuj ne wene feja e hej.

5 Ase jë hi ni pane ipië, hnenge hna mejë hmekune la hawa ne huujëne la itre huuj ne wene feja e hej. Ka zezenyi la iheetreng, me iheetreng ka qea nge ka pë imen, nge eni pë hë a sa iwatingöneca, me xejë la lue imeng koi Iehova Akötresing. 6 Thupene lai öning: “Hmahma ha ni Akötresinge fe, tha ijijinge kö troa goeë nyipë Akötresinge fe, ke tru catre hë nge hace catre* hë la itre ngazo hun, nge traqa fe hë itre ej e hnengödrai. 7 Qaane lo ijin ne la itre qaaqaa hun uti hë enehila, tru catre la itre ngazo hun, nge pine la itre ngazo hne huni hna kuca, hna nue hun, me itre joxu hun, me itre atre huuj thei eahun, kowe la imene la itre joxu ne la itre xa nöj. Hna humuthi huni hnei taua, nge hna xomi hun kowe la nöje trenyiwa, me atrekënö hun, me ahmahmanyi hun, nge tune pala hi enehila. 8 Nge ngöne la ketre hnepe ijin Iehova Akötresi hun, hnei nyipëti hna amamane la ihnimi nyipë, me aijijëne la itre xa ka mele pe, troa öhnyi hnë zae* ngöne la götrane i nyipë ka hmitrötr, matre mele hmaca pi la luemeke hun, Akötresi huni fe, nge matre aegöcatrenyi hun ngacama eahun la itre hlu. 9 Nge maine nyipici laka, eahuni la itre hlu, ngo ame nyipë Akötresi hun, tha hnei nyipëti kö hna nue hun troa itre hlue uti hë epine palua. Hnei nyipëti hna amamane la ihnimi nyipici i nyipë, me kuca matre hnimi huni jë hnene la itre joxu ne Peresi, matre aegöcatrenyi hun troa xupe hmaca la uma ne la Akötresi hun, me acile hmaca la itre hna thëtrij, me hamë huni la ihag etë* e Iudra me Ierusalema.

10 “Ngo thupene la ewekë ka traqa, tro hmaca huni a qeje nemen? Ke ase hë huni nuetrije la itre hnei nyipëti hna amekötin. 11 Lo hnei nyipëti hna hamë hun jëne la itre perofeta itre hlue i nyipë, lo öni angatr: ‘Nöje hna adron la nöj hnei epuni hna lö kow troa thapa. Hna adron hnene la itre ewekë ka sis ne la itre nöj ka mel e cili, me itre huliwa i angatr nyine methinën, itre huliwa ka sis nge ka apuingazone la nöj, qaane la ketre can uti hë la ketre. 12 Celë hi kepin matre, the hamëne kö la itre nekö i epuni jajiny kowe la itre nekö i angatr trahmany, nge the xome kö la itre nekö i angatre jajiny kowe la itre nekö i epuni trahmany, nge the kuca kö la ketre ewekë nyine xatua angatr troa tingeting me trenamo. Nyipiewekë tro epuni a catr, me xeni la itre wene ne la nöj, nge tro epuni a thapa la nöj, matre tro ej a zi ne la itre nekö i epun trahmany, uti hë epin.’ 13 Ame la nöjei ewekë ka traqa koi hun, eahun hi a xeni pune la itre huliwa ka ngazo hne huni hna kuca, me aqane ngazo hun—Ngo tha hnei nyipëti kö Akötresi hun hna të koi hun thenge la aqane ngazo hun, nge hnei nyipë hna aijijëne la itre atr e celë, troa bëeke qa ngöne la nöje trenyiwa— 14 Nge enehila, hapeu, tro pala kö huni a ena la wathebo i nyipë me faipoipo me itre nöj ka kuca la itre huliwa ka sisi cili? Hapeu, tha tro kö nyipëti lai a elëhni catre koi hun, me apatrenyi hun uti hë pëhë ca ka mel? 15 Iehova Akötresi Isaraela fe, ka meköti nyipë, ke hetre munëne ka mele pe kö uti hë enehila. Matre eahuni a cil qëmeke i nyipë memine la itre ngazo hun. Ngo eje hi laka, thupene la ewekë ka traqa, pëkö ka ijije troa cile qëmeke i nyipë.”